[Mini Club] 玩味十足

山林道附近嘅Mini Club雖然開業有一段時間，但啲裝修都尚算新淨。



佢哋係用平板電腦做餐牌，都幾時尚。



先試呢度嘅飲品，呢支叫Lindemans Apple嘅手工啤，飲起嚟酸酸甜甜近似果汁，幾啱女仔口味。



What the Duck，隻鴨仔好似晌度浸緊泡泡浴咁，仲有啲爆炸糖晌度，玩味十足。泡泡之下係用咗青蘋果、奇異果、菠蘿汁、紅莓汁同紅石榴糖漿混合而成嘅cocktail，飲起嚟甜甜哋咁。



Honey Bee，木盤上嘅小裝飾都好得意。餐廳將Grand Marnier、Advocaat、Baileys、菠蘿汁同桃肉打成沙冰，上面仲插咗塊蜂膠點綴，旁邊就有樽蜂蜜，將佢加入去，雖然用咗多款酒精，甜味卻突出，完全唔似晌度飲酒，口味偏向女仔一啲。



之後就試呢度嘅嘢食，海鮮拼盤入面有熟龍蝦、睡蟹、鮑魚、翡翠螺、蒜味青口、玫瑰蝦，陣容鼎盛。



泰式生蝦，生蝦質感脆口，泰式醬汁嘅辣勁好強，食唔到辣嘅人就唔建議挑戰喇！



韓式醬燒安格斯牛柳粒，牛柳粒切成厚身條狀，外層就蘸咗香甜嘅醬汁，同埋灑咗啲紫菜絲同白芝麻上去，另外仲有泡菜、醃蘿蔔同韓式辣醬跟埋一齊食，味道唔錯。



我哋仲試埋餐廳新出嘅The Love of Eiffel，桃紅色嘅巴黎鐵塔上面放咗各式各樣嘅精緻甜品，最底下嘅黑色托盤就內有機關，可以做出煙霧效果，都幾觸目。



頂層嗰三粒銀河圖案嘅大朱古力豆幾靚，旁邊有印咗餐廳名嘅朱古力牌，後面仲有朵糖膠玫瑰花。



另一邊亦有三粒印咗唔同圖案嘅馬卡龍，外層脆脆。另外嗰粒印咗I Love You字樣嘅心形朱古力中間位置就香軟，有少少似松露朱古力嘅感覺。

下層就有三個唔同造型嘅冬甩形小圈圈，分別用咗彩色糖霜同唔同形狀嘅碎糖點綴，入面就係蛋糕嘅質感，整體嚟講唔會話非常非常甜。

[金羅寶韓國料理] 份量唔少

同人嚟到銅鑼灣嘅金羅寶韓國料理，餐廳係晌金百利廣場入面，呢度都有唔少食肆。



佢係間比較傳統嘅韓國菜，已經開咗幾多年，不過今次係第一次嚟試。



同大部份韓國菜一樣，呢度係有嵌入式嘅燒烤爐，同埋係有燒肉嘅。



午市時段嘅套餐定價七十幾至百幾左右，選擇仲幾多。



叫完嘢食之後，侍應就拎咗一堆餐前涼菜嚟，泡菜、馬鈴薯、銀魚仔乾、青瓜、蓮藕、菠菜大豆芽、魷魚絲、四季豆，就咁睇都覺得豐富。每次食韓國菜都最期待色彩繽紛嘅餐前涼菜，除咗可以增加蔬菜攝取量之外，又可以解膩，不過新派嘅韓國菜就反而無咁多款式喇。



每份午餐都包一碗湯，當日湯入面有牛肉、蘿蔔同胡蘿蔔，飲起嚟清清甜甜。



鐵板烤豬頸肉，口感爽嫩，調味足夠唔過重，只係多油咗少少。



辣泡菜餅，煎餅粉漿唔過厚又唔過薄，入面仲有唔少泡菜粒，食起嚟外脆內軟。



可以點埋佢個特製嘅醬汁嚟食，表現唔錯。



牛肉石鍋雜錦飯，燒紅咗嘅石鍋入面有牛肉、大豆芽、菠菜、胡蘿蔔、冬菇、煎蛋、紫菜同米飯，侍應晌我哋面前加埋韓式辣醬之後就將佢哋撈勻。



每口飯都有配料跟埋一齊食，近石鍋邊位仲有脆脆嘅飯焦。



我哋仲加多咗份調味牛肋骨肉，份量比想像中多。



將牛肋骨肉放晌燒烤爐上面燒，肉質軟嫩。



最後嘅甜品係紅棗茶，紅棗味香甜，感覺養生。

呢次試嘅午餐一份先八十幾左右，但係份量就唔少，以銅鑼灣區嚟講都幾抵食。

[Mike’s Chicken Comida de Portugal Restaurant] 尖沙咀葡國菜

去咗美麗華酒店嗰邊嘅商場，試咗呢間Mike’s Chicken Comida de Portugal Restaurant。



顧名思義，佢係間食葡國菜嘅餐廳。香港嘅葡國菜好似唔多，而我上次食都已經係幾年前晌澳門嘅事。



打開餐牌，除咗葡國菜式，仲有多款多國菜式去揀。



叫完嘢食之後，侍應就拎咗餐前麵包嚟，質感外脆內有韌性，仲跟埋牛油、黑橄欖同橄欖一齊食。



啤梨番石榴沙律，啤梨配番石榴好似幾少見，前者腍身，後者爽口，配埋紫洋蔥、紫生菜同醬汁等等，都幾酸香開胃。



香蒜燒春雞，春雞表面鋪滿香蒜，拎嚟時香噴噴。切開時雞肉仍然有啲肉汁，用車厘茄、西蘭花同薯條伴碟都唔錯。



葡式烤乳豬，呢款係需要預訂嘅，同埋可以揀全隻、半隻或四分一隻。我哋呢份係四分一嘅份量，乳豬外皮香脆，中間夾住膠質感嘅肥脂，肉質就幾嫩。旁邊嘅炒飯就有切粒肉腸、番茄醬、紅腰豆同提子乾晌度，食完乳豬再食雜菜沙律就可以解膩。



餐廳嘅凍櫃陳列咗多款甜品，睇起嚟好吸引，可惜胃口有限，唯有留返下次有機會再嚟嘅話先試。

[鉄人旨花] 視覺與味覺

食過鉄人旨花嘅omakase覺得唔錯，呢次就嚟試試佢哋嘅鐵板燒。同上次嚟相比，環境無大改變，都係分咗omakase同鐵板燒兩個區域，另外仲有啲獨立房。



日式鐵板燒係食客圍住半圓形鐵板燒檯而坐，師傅就企晌另一邊中間位烹調食物。我覺得食omakase同鐵板燒，除咗享受美食之外，欣賞師傅處理食物嘅過程亦係重點之一。所以除非同行人數比較多或其他原因，如果唔係坐壽司吧或鐵板燒檯真係會開心啲。



當晚有幾款套餐，我哋就揀咗伊勢海老鐵板燒二人前。

|

兩款前菜，都幾開胃。



然後，師傅就即席烹調銀鱈魚，佢先將銀鱈魚同櫻花葉兩面煎香，淋咗西京味噌醬後就用火槍燒呀燒，場面都幾壯觀。



煎過嘅櫻花葉薄脆又有少少鹹味，幾得意。上面啲玫瑰乾花瓣傳嚟陣陣花香，除咗有點綴作用之外，同魚肉一齊食就更顯清新。



海膽汁煮龍蝦，師傅將原隻龍蝦放晌鐵板上。



稍為煎一下之後，師傅就將龍蝦肉同龍蝦殻分開處理，同時炒勻牛油同海膽，最後將兩者炒勻。



龍蝦煮得啱啱好，感覺唔錯。



A5日本產和牛，師傅話呢個係宮崎牛肉嚟，肉味會比較重。



煮好之後，連擺盤都一絲不苟。



我哋揀咗五成熟，肉質軟嫩。師傅仲特登將靠邊嘅位置切開分開嚟煎，出嚟嘅效果微焦香脆，一份和牛有兩種唔同口感。食完和牛再食食燒過嘅大啡菇、青椒仔同番茄，啱啱好可以中和一下。



炒飯，師傅先將蛋打晌鐵板上，同埋米飯一齊炒，同時晌另一邊炒其他配料，炒咗一陣之後就將佢哋炒埋一齊。

之後，加埋蔥花略炒就完成。



白魚湯，湯色奶白有魚香，入面仲有少少切粒豆腐同蔥花。



嚟到甜品環節，當晚係番薯豆腐雪糕，表面有唔少番薯粒粒，口感軟糯，豆腐雪糕就清清甜甜。

一邊食嘢一邊睇住師傅晌我哋面前烹調食物再細心裝飾，呢啲就係食鐵板燒嘅樂趣嚟喇！



（附上影片，openrice要電腦桌面版先可以睇到）

[Amina Modern European] 急速城市四小時

呢晚同人嚟到Amina Modern European，佢係間位於尖沙咀旺區嘅西式私房菜。



由入口走入去經過走廊之後，就係水吧同蠔吧。



燈光係柔和嘅暖色系，氣氛都唔錯。

（因為我唔想啲相出嚟嘅效果偏暖色，所以之後都較咗白平衡）



餐廳分咗八道菜同十道菜兩種，其中後者仲有四款主菜去揀，我哋就叫咗兩份十道菜嚟試試。



侍應先將餐上小品拎嚟，呢啲係餅乾條。



當晚嘅麵包有兩款，烘得外脆內軟，我比較鍾意加咗核桃同提子乾嗰款，蘸埋特製甘筍蓉，唔經唔覺就食晒。



風乾火腿鹹香，食完再飲埋杯梨蓉汁，酸酸甜甜啱啱好互相中和。



輕炙北海道元貝，北海道元貝燒得焦香，上面嘅三文魚子令佢更加鹹鮮，伴住椰菜花泡沫、椰菜花蓉、藜麥同醃青瓜，既清新又爽口。

番茄清湯，呢個係凍湯嚟嘅，湯色清澈，仲用三文魚子同脆片裝飾，睇落唔錯。



飲起嚟凍凍哋同帶甜味，餐廳仲特登用紙巾包住支凍匙羹，幾細心。中間有兩粒圓形，其實係分子料理嚟嘅，比較大嘅係用蝶豆花整，甜甜哋有啲似啫喱。比較細嘅就用番茄整，擺入口之後一咬即破，幾得意。



當晚餐廳嘅鵝肝醬凍轉咗做三文魚醬凍，口感軟滑，下面仲有威化餅，同埋用黑椒碎、血橙汁同血橙肉伴碟，入面仲有屬於分子料理嘅油醋汁爆珠，同沙律菜一齊食好夾。



龍蝦濃湯，侍應話碟邊嘅係乾身嘅龍蝦籽，可以將佢加入湯度飲。湯味濃郁、質感creamy，溫度就暖暖哋，唔怕辣到嘴唇。



香煎法國鵝肝，同行嘅人話鵝肝好香口，油份又唔會太重，同灑晌上面嘅炸牛蒡絲、開心果碎，仲有南瓜薯蓉、黑醋一齊食就可以解膩。



因為我唔食鵝肝，所以就改咗做香煎大蝦，大蝦燒得香噴噴，伴碟方面除咗無開心果碎等等之外，其他嘅大致相若。



檸檬木煙燻阿拉斯加蟹肉，蟹肉、梨肉、紫椰菜、生菜、麵包粒等等用玻璃樽載住，另外嘅有機雞蛋同羅勒油柚子醬就分別用兩個小量杯拎嚟。



將木蓋打開，樽入面嘅燻煙即時湧出，傳嚟陣陣怡人嘅檸檬木芳香。再將小量杯入面嘅嘢加入去撈勻嚟食，感覺軟滑輕盈。



餐廳晌上主菜前先用番石榴雪葩做間場，微微酸甜，可以清一清味蕾。



然後就係主菜之一嘅香煎澳洲黑盲鰽魚，魚皮煎得香脆，魚肉就比一般魚類扎實，下面有啲燴雜菜，加埋一齊食幾討好。



紅酒燴牛面肉，牛面肉花咗長時間去燉煮，用刀叉切開已經覺得軟腍腍，咬起嚟就好鬆化，用小番茄、小甘筍、海鹽等等伴碟，食起嚟幾平衡。



食完主菜，侍應就拎咗個小木盒嚟，入面放咗多款茶包同花茶。



我哋分別揀咗茉莉花同菊花，餐後飲花茶可以消滯。

之後就到甜品時間，自家製柚子芝士蛋糕用鮮藍莓、紅桑子、啫喱、開心果碎等等點綴。

另一碟用咗木板咁拎嚟，賣相就更加吸引。柚子芝士蛋糕食起嚟滑溜，味道就比較溫和。



雪影，餐牌寫有五款口味，而我哋當晚就係紅桑子同榛子兩款，甜度唔高，仲有微微嘅可可豆甘澀。

呢度嘅食物幾有驚喜，仲大玩分子料理，出嚟效果同味道都討好。餐牌仲寫咗大部份菜式嘅主要材料，侍應拎嚟時亦會稍為講解一吓。

要留意嘅係，餐廳每道菜之間都有一段幾長嘅空檔，當晚食吓食吓，都最少用咗四小時先完成。對於步伐急速嘅香港人嚟講，四小時實在太花時間，但係偶爾同摯愛或親朋好友停落嚟慶祝相聚都不為過。