炑八韓烤晌黃大仙開咗新店，仲用韓牛做主打，呢日就同朋友嚟試吓。入面嘅環境光猛，每張檯都有抽油煙囪，有啲檯就係油桶凳。
有啲就係四人卡位。
裝修方面就有啲咖啡店嘅感覺。
每個角落嘅陳設都略有不同，呢個位就好似人哋屋企嘅書櫃，側邊仲貼咗韓國明星海報。
牆上嘅圖案都幾多款。
例如係呢個，標示咗一隻牛唔同部位嘅韓文名呢！
我覺得呢塊黑板嘅烤肉圖案好得意。
同好多韓式燒烤一樣，呢度有提供前菜嘅，其中嘅大豆芽就有麻油香、昆布入面嘅醬汁微甜，仲有生菜、青瓜、甘筍用嚟同燒肉一齊食，而且某啲前菜係可以同侍應要求refill，大大提升蔬菜攝取量，呢點係我對韓式燒烤印象唔錯嘅原因，同埋食多啲菜感覺都唔會太膩。
醬料方面就已經預先放晌檯上，由食客自己斟嚟用。
醬油、海鹽同大醬，不過呢晚都係食肉嘅原味，都無乜點用過呢！
餐廳有兩本餐牌，呢本主要係餐廳嘅推介菜式，其中有啲仲只係黃大仙店先有嘅。
呢本就係餐廳嘅全部菜式，燒肉細分咗牛、豬、雞同海鮮類等，另外仲有其他韓國菜式、甜品同飲品。
同一般韓式燒烤一樣，餐廳採用嘅係好似龜背咁嘅鐵板。
餐廳係直接由韓國進口韓牛，餐牌入面仲指採用嘅係最頂級1+同1++級別嘅短角金毛韓牛，質素等同A5和牛，呢晚嚟就當然要試試。
韓牛珍貴部位拼盤，用咗木塊造型嘅盤當係碟，玩味十足，中間就有三色椒、磨菇、洋蔥同番茜。拼盤入面嘅韓牛分別係貝身肉、西冷扒、肩胛肉同牛五花肉，每個部位嘅油脂分佈都略有不同，有比較軟嫩嘅、有有嚼勁嘅，牛味濃郁可口。
鐵板除咗可以整烤泡菜蛋同芝士粟米之外，仲有個細細哋嘅網架，既可用嚟擺未能即時食嘅肉，又可以用嚟保溫，當然牛肉要盡快食，唔係嘅話餘溫有可能會令肉質過熟，咁就會影響口感。
食燒烤時可以用生菜包住食，又或者按自己喜好加唔同嘅前菜同醬料一齊食。
我哋仲試咗韓牛牛胸大醬湯，牛胸肉用熱湯稍稍涮一涮咁食，都幾爽脆。另外仲有其他配料，例如係蜆、豆腐、翠玉瓜、蘿蔔等等，蜆肉無沙，湯底就用小魚乾等等煮成，飲落鮮甜，仲跟埋紫菜白飯用嚟撈湯食。
同埋仲有飲品同甜品，菊花梳打嘅杯邊有朵仿菊花，拎嚟影相都唔錯，味道方面就係一杯清熱嘅有氣菊花蜜。
跟住兩款就只係黃大仙分店先有，香芒橙汁嘅杯邊就放咗一片厚切鮮橙，下層係用咗芒果同鮮橙打成嘅果汁，質感濃稠，甜味就適中。
草莓塔，睇過餐牌嘅參考圖，即時令我諗起近月晌港島區新開嘅韓國過江龍甜品店，不過呢度嘅價錢就平接近一半。
高身杯最下層係士多啤梨沙冰，中間同最上層就用咗鮮忌廉同鮮士多啤梨點綴，實際賣相都唔弱。士多啤梨微甜唔過酸，下層嘅沙冰打得細碎，味較人工化但可接受。不過建議最好將杯上面嘅士多啤梨食晒先，過程亦要快速咁進行，如果唔係會有跌落嚟嘅可能，而且一杯份量都唔少，同朋友share就啱啱好。
炑八韓國紅豆冰沫，其實已經唔係第一次試呢款冰品，晌其他地方食過相類似嘅，覺得配搭上比較穩陣，所以就叫嚟一齊食。
佢係用麻糬、紅豆蓉、杏仁片、黃豆粉同牛奶冰沫組成，冰沫入口即化，中間仲撈咗啲麻糬，因為佢本身已經有甜味，所以都無再淋煉奶，有時簡簡單單無太多花巧反而可能仲好。
走嗰陣身上無乜油煙味，唔錯呀！
