呢間位於宏利金融中心入面嘅囍，舖名似係中菜館，其實係間有啲日式風格嘅火鍋放題嚟。
店入面環境大而光猛，坐位算多但唔迫，仲有幾多卡位，私隱度相對起嚟較為高少少。
佢哋嘅火鍋放題係入座起計限時九十分鐘，收費按肉類嘅等級區分，除特別註明之外，所有食物都任叫任食，某啲火鍋料、飲品同甜品仲可以晌自助區自取。聽講農曆新年期間佢哋推出咗啲優惠，呢次雖然已經變返正價，不過牛肉類嘅收費先$128起（未計加一），如果唔食牛嘅話仲可以揀佢哋最平嘅黑豚肉餐。近日仲可以$39一位額外多配刺身放題，好似幾吸引。
晌四款牛肉等級之中，試咗任叫任食美國特選牛小排、嚴選肩胛牛肉、特選牛脷、美國黑豚肉、黃金雞同海產盛盤嗰款。
湯底有幾款揀，分別係濃蝦湯、四川麻辣湯、番茄湯、木魚湯、香濃雞湯、韓風泡菜湯、壽喜燒等等，以黃金雞木瓜湯最特別，佢哋採用印尼直送鮮椰子水，黃金雞就嚟自自設農場，木瓜亦係有機貨，於是揀咗呢款試試。
然後就去睇睇自助區，醬料有韓式辣醬、胡麻醬、燒肉汁、柚子醋、蔥、七味粉、炸蒜蓉、蒜蓉、辣椒等等，睇咗其他人嘅文，原來仲有有機蛋，可惜當晚無提供，無緣一試。
蔬菜方面都有十多款，包括西洋菜、菜心、白菜、菠菜、油麥菜、西蘭花、蘿蔔、粟米、南瓜、萵荀、翠肉瓜、勝瓜、芋頭、蓮藕、冬菇、金菇、杏鮑菇、木耳等等，當中以秋葵最特別。
丸腸類就有黑椒牛筋丸、貢丸、芝士丸、魚包丸、手打魚蛋、魚片角、脆皮芝士腸、香腸、紅腸、午餐肉、豆腐、芋絲等等，麵食就係坊間少見嘅蕎麥麵、日式綠茶麵同四川擔擔麵等等。
除咗火鍋配料外，仲有唔少可以即食嘅嘢，例如卷物、雜菜沙律、茶葉蛋同炒飯等等。
飲品就有紙包裝嘅柑桔檸檬、烏龍茶、蜂蜜綠茶等等，另有百事、七喜同罐裝啤酒等等。甜品係自助雪糕機，旁邊仲有多款topping，淨係睇都覺得吸引。
行咗陣自助區，無幾耐侍應就將首輪嘅任叫任食火鍋料拎到嚟。
二人份量黃金雞，件數唔少。
檯上面仲有個沙漏，先將整碟黃金雞放入鍋度，再將沙漏倒轉計時，煮大約十分鐘後就可以食喇！
先飲啖湯，椰香味清新，木瓜令佢仲香甜，當中嘅主角黃金雞肉厚脆嫩，味道的確唔錯。
特選牛脷，牛脷爽滑又有咬口，我都幾鍾意。
美國特選牛小排，油脂分佈算均勻香口。
嚴選肩胛牛肉，比牛小排較有嚼勁。
美國黑豚肉，無難耐嘅豬臊味，肉質鬆化唔癡牙。
牛肉切得薄薄嘅，輕輕放入鍋度涮涮就得。
海產盛盤，魷魚鮮鹹、青口爽彈、生蠔柔滑，當中以魷魚較為出眾。
自助火鍋料方面就食咗呢幾款，整體表現正常。
比較突出嘅係西洋菜都幾脆嫩，豆腐滑溜，粟米清甜，秋葵就有益健康。
醬料方面燒汁微鹹惹味，柚子醋酸香，但我覺得湯底本身已經夠味，唔蘸醬料都OK。
飲品飲咗烏龍茶同柑桔檸檬，兩款都可以消滯。
嚟到尾聲，當然要試玩嗰部自助雪糕機，當晚有雪糕同乳酪兩款口味，我就分別整咗杯裝同威化筒裝嘅。
乳酪嘅冰感稍重，食起嚟微微酸香。topping就加咗迷你棉花糖同彩色粟米片，都無受潮變腍變濕嘅情況。
雪糕同樣冰感稍重，口感都算滑溜，但同乳酪分別唔大，只係奶味比較明顯一啲。
限時九十分鐘，成個過程都晌度爭取時間烚呀烚，所以都無加錢食刺身放題喇！任叫任食嘅火鍋料之中，我最欣賞黃金雞、特選牛脷、美國特選牛小排同魷魚。自助區入面最過癮嘅係可以自己斟乳酪同雪糕嚟食，都幾好玩呀！場內仲有部棉花糖機，可惜當晚無運作，如果唔係又多樣嘢食同玩喇！
