[Cafe Paradise] 豐富嘅全日早餐

Cafe Paradise嘅本店係晌太子，上年就晌長沙灣開咗分店，一直都好想試，呢日終於扚起心肝嚟食喇！



門口擺咗塊黑板，上面嘅手繪貓咪好得意。



走入去之後，仲有兩隻特大熊公仔迎接。



餐廳嘅面積唔大，幾乎可以一眼睇晒，不過都幾舒適嘅。



水吧旁邊擺咗唔同圖案嘅陶瓷杯，仲有旋轉木馬音樂盒同食客嘅即影即有相。



呢日嚟到除咗有午餐，仲有下午茶餐，不過都係決定叫佢哋嘅All Day Breakfast。



All Day Breakfast包橙汁一杯，亦都可以加錢轉其他嘢飲，我就揀咗玫瑰花茶。



入口有淡淡甘甜花香，既清新又養顏。



另外再叫多杯玫瑰鮮奶咖啡，拉花幼細，味道甜甜哋，仲有啲玫瑰花香，感覺唔錯。



Paradise Full，碟上放滿炒蛋、煙火腿、煙三文魚、煙肉、漢堡扒、法蘭克福腸、茄汁豆、薯餅、烤番茄、炒雜菌、粟米、田園沙律，我仲將多士轉做窩夫，非常豐富。



薯餅炸得香脆可口，煙肉煎得焦香。漢堡扒細細件不過幾厚身，似係自家手打。窩夫中間就夾住吉士醬，都幾得意。其他嘅食材都唔錯，食得出係即叫即煮嘅，睇落簡單但唔馬虎。



芒果拿破崙，就咁睇個名以為係酥皮夾住餡料嗰種，實際係海綿蛋糕嚟嘅。



芒果粒熟透香甜，海綿蛋糕之間夾住酥皮碎同忌廉。雖然同我預期中嘅樣有少少唔同，但係用朱古力醬晌碟上面寫字做裝飾，總算有誠意。

[和牛燒肉‧純] 日本產和牛

想試和牛燒肉純好耐，呢日終於同人嚟食喇。餐廳就晌半島中心對面嘅希爾頓大廈入面，都幾方便。



裝修唔係好花巧，係偏向端莊嘅路線。



餐廳採用嘅都係日本產和牛，餐牌入面仲有幾版用嚟解釋要有乜條件先可以叫做和牛，另外仲有各部位嘅介紹。



單係牛肉都有唔同部位揀，同埋仲有豚肉等等，如果唔食燒肉嘅話都有刺身等等日式料理提供。



飲品方面酒精佔咗兩大版，亦有少量無酒精飲品。



巨峰梳打同白桃梳打，分別呈深紫色同粉橙色嘅，酸甜有致都唔錯。

無幾耐，侍應就將我哋嘅食物拎嚟。



餐前先食沙律，入面有生菜、洋蔥、車厘茄等等，配埋柚子醋，好酸香醒胃。



餐廳將幾款和牛放埋一齊，睇起上嚟幾別緻。

日本產和牛肩眼，油份唔多，柔軟而有咬口。

和牛赤身肉，色澤比其餘三款深，肉表面淋上醬汁，幾惹味。

特選日本產和牛牛排肉，餐牌寫係燒肉中最高評價嘅部位。肉軟滑有油香，就好似晌度食燒肉版嘅吞拿魚腩咁。

特選日本產和牛肉眼，呢款係最厚同最易沉積脂肪嘅部位，價錢亦比較高，燒好之後入口即化。



一邊食一邊燒，又可以按自己嘅喜好揀生熟度。

餐廳嘅和牛質素高，我覺得就咁食已經夠味。



鹽燒嘅和牛本身已經灑咗鹽同黑胡椒，如果覺得唔夠嘅話亦都可以按需要再加。



蘸埋酸汁、檸檬汁或鹽嘅話，就可以提味。

伴碟嘅南瓜、冬菇、彩椒同粟米，燒好之後同和牛一齊食可以解膩。

[麵屋元祖達摩] 去大埔食拉麵

由鐵路站行過嚟，無幾耐就嚟到新開無耐嘅麵屋元祖達摩。



一走入去，就見入面擺咗大大小小嘅日本達摩公仔。



同大部份拉麵店一樣設有吧檯，另一邊就係一排二人檯。



檯上面擺咗調味料例如有白芝麻、七味粉、酸薑、檸檬汁，同埋加咗檸檬片嘅凍水，仲有提供紙巾，都幾細心。



呢度係用畫紙仔嘅方式叫嘢食，拉麵可以揀麵條嘅硬度、湯嘅濃度，另外亦可以揀要唔要蔥、筍、蒜蓉同香味油。我除咗筍之外，全部揀咗要。



試咗期間限定嘅北海道3.6牛乳黑松露蟹肉拉麵，炙燒豚肩叉燒、炙燒豚腩叉燒同紫菜晌碗邊整齊排列，中間仲放咗一堆松葉蟹肉絲、蟹籽同黑松露，睇起嚟好豐富。



湯底加咗北海道3.6牛乳，濃度揀咗普通，湯色奶白，飲起嚟有淡淡牛奶同蒜香，唔會過份鹹重。隨後將松葉蟹肉絲、蟹籽同黑松露撈勻，令整體多咗份鮮甜。



麵條硬度揀咗普通，口感幼細彈牙。



炙燒豚肩叉燒，餐牌寫用咗西班牙黑毛豬上肩，切得稍薄，咀嚼起嚟幾鬆化。



炙燒豚腩叉燒，用咗鹿兒島五花腩，相對嚟講比較厚身，入口有焦香同油香，兩者之中我比較鍾意呢款。配料方面有本菇、木耳、粟米同蔥，蔬菜量比其他拉麵店多，整體好有咬口。



櫻花水信玄餅已經唔係新鮮事，但係晌拉麵店發現佢嘅蹤影都係第一次，於是叫嚟試試。



外表呈半圓形，晶瑩剔透得清楚可見入面嘅櫻花漬。食起嚟Q彈滑溜而帶啲爽口，櫻花漬就微鹹，整體味道較清，配上黃豆粉同黑糖漿就多添幾分甜味。



達摩梳打，估唔到連汽水都係達摩，咁就試埋佢，味道微甜，有啲似七喜同雪碧，以可愛賣相取勝。

[Espuma] 多姿多采嘅炎夏

呢日我哋去咗中環M88入面嘅Espuma。



位處十七樓，景觀好開揚。



假期日頭嚟到，都幾光猛舒服。



已經唔係第一次試Espuma，呢次嚟係因為佢出咗好多色彩繽紛嘅夏日菜式，又成功吸引到我嚟食喇！



清新夏日風味沙律，嗰幾朵食用花令佢多添幾分田園氣息。餐廳用咗厚切西瓜肉模仿吞拿魚，上面灑滿黑芝麻同白芝麻，食起嚟清甜多汁。



伴碟有蟹肉牛油果番茄洋蔥沙沙，可以搽晌牛油多士條上面食，加上夾雜芝士粒嘅雜菜沙律，感覺輕盈。



冰雪鮮果叢林椰子沙律，睇起嚟似甜品，其實係前菜沙律嚟嘅。用咗半個椰子殻載住，用埋食用花點綴，玩味十足。入面放咗大量鮮果，例如有紅莓、藍莓、士多啤梨、奇異果、火龍果、青提子、紅提子等等。旁邊嘅椰子雪條就係餐廳自家製，既濃郁又消暑。整體酸酸甜甜，我覺得餐前食幾開胃。



烤風乾番茄同菠菜釀豬柳卷配蘋果蓉，將風乾蕃茄同菠菜夾晌豬柳上面，再捲起攞去烤。



豬柳外層焦脆，幾有咬口，中間嘅菠菜汁就令佢唔會太乾身。



薄荷朱古力瑪奇朵，飲起嚟薄荷味同朱古力味幾重，對於唔太習慣咖啡甘香嘅人嚟講都唔錯。



自問唔係女神，但特飲餐牌中嘅你是女神賣相實在太靚，就算覺得汗顏都要叫嚟試試。



實物好可愛，迷你Flamingo水泡真係好呃like。頂層係鮮忌廉同食用花，下層係士多啤梨同香芋沙冰，兩者味道突出而討好。



最後仲試埋棉棉夏日，黃、紫（粉紅？）、藍三色棉花糖就好似一朵雲咁，呃like度一啲都唔輸蝕。芭菲就用雪糕、粟米片、乳酪、士多啤梨啫喱、士多啤梨醬組合而成，酸甜唔膩，尤其係乳酪同粟米片嗰部份仲好啱我平時嘅口味，食吓食吓，差唔多俾我食晒大半杯喇。



（附上影片，openrice要電腦桌面版先可以睇到）

[Mela Italian & Spanish Cuisine] 闊條麵與羊架

晌愛琴坊巧明街嗰邊嘅入口走入嚟之後，就係呢間啱啱晌附近工廈搬嚟幾個月嘅Mela Italian & Spanish Cuisine。



餐廳係全開放式，同埋用咗好似花圃咁嘅半身屏風略為阻隔。



賣嘅係意大利同西班牙菜，由前菜到甜品都有提供，另外仲有二人套餐，我哋呢次就散叫幾款嘢食試試。



煙三文魚凱撒沙律配溫泉蛋，先將中間嘅溫泉蛋刺穿，再同煙三文魚、羅馬生菜、煙肉乾、烘麵包粒、凱撒沙律醬撈勻。煙三文魚食起嚟鹹香，質感有咬口又唔鬆散，個沙律加埋溫泉蛋之後仲多咗份creamy嘅感覺。



西班牙黑毛豬火腿白菌芝士釀炸薯球，同類型餐廳大多都係球形，呢度就搓成長條形。外層炸得脆口，中間加咗切粒西班牙黑毛豬火腿同白菌嘅薯蓉就軟滑。



鮮蜆蒜片辣椒車厘茄欖油汁手製墨汁闊條麵，連殼嘅蜆肉厚身肥大，咬起嚟彈牙多汁、鮮甜無沙。手製墨汁闊條麵口感煙韌，欖油汁入面嘅辣椒味唔明顯，但有淡淡嘅羅勒香，都幾惹味。



56℃低溫慢煮羊架配小銀魚香草醬，賣相吸引。



羊架用咗低溫慢煮嘅方法烹調，再煎到五成熟，肉嫩腍身、羶味輕而有油香，仲可以點埋黃芥末醬同小銀魚香草醬。伴碟嘅烤蒜頭少咗份辛辣，味道甜而軟糯，其他嘅炸薯粒、烤法邊豆、車厘茄都唔錯。

薄荷青檸梳打，飲起嚟清新消滯。

餐廳係開放式，環境有少少似food court，不過呢晚試完就覺得食物表現好好，唔係敷衍了事。