[Layback Cafe & Bar] 鬧市咖啡店

嚟到呢間位於尖沙咀鬧市，嘉威大厦入面嘅Layback Cafe & Bar。



餐廳嘅面積唔算大亦唔算細，入到去有少少似去咗人哋屋企嘅感覺。



由佈置睇嚟，似乎花咗唔少心思。



佢哋另外仲有室外座。



走出去八卦一下，座位比室內仲多呢！



呢度仲有個有少少日式feel嘅高台位，坐晌上面食嘢嘅話應該幾得意。



食物方面選擇唔太多，主要以意粉同小食為主。



佢哋始終係間樓上咖啡店，所以飲品餐牌就豐富得多。



呢次叫咗幾樣嘢試，等咗陣店員就拎到嚟喇。



芝士煙肉焗有機大燒烤菇，幾乎每次睇到餐牌入面有類似嘅菜式嘅話都會叫嚟食，因為配搭穩陣又唔易失手。



大燒烤菇juicy，中間嘅芝士有微微拉絲效果，配埋煙肉絲，正常嚟講無可能唔好食。



香蒜白酒蜆肉露筍扁意粉，用四隻連殼蜆肉點綴，賣相吸引。扁意粉軟硬度適中，蒜味香濃，微辣惹味。當中仲有唔少蜆肉、磨菇片同露筍，以一間樓上咖啡店嚟講水準唔錯。



貢菊杞子茶，睇住啲花晌壺入面飄浮，唔知點解有種莫名嘅治癒感。



菊花芳香撲鼻，杞子清肝明目，飲起上嚟仲有陣陣甜味，好順喉。



士多啤梨朱古力沙冰，餐牌寫係新出嘅。同士多啤梨一齊打碎，令朱古力多咗份果味酸甜。



藍莓芝士蛋糕，上面嘅藍莓醬都幾多。芝士蛋糕香軟微酸，完全唔覺得漏。

雖然離尖沙咀地標The OXX唔遠，但就有種幽靜嘅感覺。平日夜晚嚟到，食完嘢之後都無被催促離座，睇嚟係個唔錯嘅休息地方。

[肚餓了串燒烤焗專門店] 人氣串燒店

早年已經聽過亞士厘道嘅肚餓了串燒烤焗專門店，以為熱潮會冷卻，到埗後見座無虛席，睇嚟食串燒真係無興唔興呢樣嘢。



選擇都幾豐富，呢次我哋就叫咗幾樣嘢嚟試。



檯上面已經放咗一系列調味料，例如係孜然粉、辣粉、黑椒同鹽，不過我覺得串燒已經夠味，所以都無另外再加喇！



叫完嘢食無耐，店員就陸續將啲串燒拎嚟。

惹味燒厚切牛舌，的確好似個名咁切得好厚，口感爽口，牛味濃郁。



惹味燒安格斯牛柳粒，表面醬汁香，肉質軟嫩。

兩款牛類串燒之中，我比較鍾意牛舌多啲，原本仲叫咗串燒京蔥牛舌尖，可惜當日已經賣晒無緣一試。



脆燒日本鰻魚，食起上嚟軟綿綿咁。



蒜蓉燒原條茄子，面層嘅蒜蓉好惹味，不過啲油就比較多。



汁燒雞髀菇，醬汁微鹹中帶甜味，同埋切成幾件，食起上嚟幾方便。

汁燒秋葵，外層爽脆，入面就有潺滑口感。



紫金甜薯串，食啲甜甜哋嘅嘢可以中和一下。



黃金薯條，呢個係佢哋嘅名物之一，薯條炸得脆身，表面仲蘸滿起沙嘅鹹蛋黃，既邪惡又美味。



四式燒蠔，分別加咗芝士、黑松露香菇醬、蒜蓉、黃金醬燒成。芝士鹹香兼可以拉絲、黑松露香菇醬濃郁、蒜蓉香甜、黃金醬微酸同埋撈咗粟米同蟹柳絲。四款口味各有特色，我比較鍾意黑松露香菇醬，不過就將蠔肉本身嘅味道蓋過。



冬陰公汁烤焗翡翠螺，拎到嚟時香噴噴，湯汁幾有鮮味，對於我呢類算食到辣嘅人嚟講辣度都唔弱，真係估佢唔到。主角嘅翡翠螺有十幾隻，全部都肥大彈牙，仲有啲金菇、冬菇、雞髀菇晌度，成份個份量都真係幾多。



呢晚仲試埋Pear Cider，啤酒味唔會太濃，對女仔嚟講幾易入口。

[Mimosa Pudica] 荔枝角午餐

最近知道億利工業中心入面新開咗呢間Mimosa Pudica，呢日就嚟試試。入口附近擺咗怕羞草，同店名首尾呼應。

入面環境唔錯，窗上面嘅小鹿玻璃貼好夢幻呀！



餐墊嘅樹林圖案，都幾有特色。



檯上面嘅橄欖油黑醋樽既可以用嚟做裝飾，又有實際用途。



佢哋午餐價錢由七十幾到百幾不等，下午茶就由四十幾至八十幾左右。



我叫咗份午餐，先嚟嘅係番茄沙律，除咗番茄之外仲有牛油生菜、紫生菜、紫椰菜、櫻桃蘿蔔，蔬菜爽脆，配埋芝麻醬幾開胃。



周打海鮮湯，入面有唔少蜆肉、魷魚同切粒西芹等等。跟埋嘅牛油蒜蓉多士烘到脆脆哋，用佢蘸湯食都唔錯。



紐西蘭西冷牛扒配馬沙拿燒汁，伴碟有燒茄子、意大利青瓜、西蘭花同薯蓉。



西冷扒煎得香口，食起嚟唔會太濃又啱啱夠味。



我仲加多咗份Tiramisu，口感軟綿都算討好。



蝶豆花梳打，呈漸變紫紅色，味道唔濃，以賣相取勝。

[花子舍] 花叢中下午茶

之前都有經過花子舍，不過就以為係間花店嚟。



最近先發現其實係咖啡店，佢哋仲有好多款主菜小食，呢日就同人嚟試試。



由入口走入去，旁邊有個細細哋嘅位置擺咗唔同嘅擺設。



另一邊就用永生花同小盆栽做佈置，就好似個小花園咁。



身處其中，都幾舒服。



餐檯上面預先擺咗一支水，入面仲有兩大片薄荷葉，多咗份清新感之餘又可以用嚟做裝飾。



佢哋用牛皮紙做餐牌，簡單得嚟又切合餐廳嘅田園主題。



我們叫咗兩份午餐，餐湯用咗忌廉嚟畫拉花圖案，令佢變得唔單調。



燒鯛魚火龍果沙律，鯛魚燒得微焦，食起嚟軟綿。沙律用火龍果、豆苗、粟米、車厘茄、紫椰菜、紫生菜等等組成，口味都幾夏日。



6oz美國肉眼扒配薯菜，我哋揀咗七成熟。肉眼扒幾厚身，切開之後仲見到粉嫩紅色，既多汁又軟腍，蘸青醬嚟食就可以解膩。伴碟嘅沙律有紫生菜、車厘茄、粟米、紫椰菜等等，仲淋咗微酸嘅醬汁，薯條就炸到好香脆，整體唔錯。



玫瑰草莓芭菲，頂層放咗兩球雲呢嗱雪糕，下面嘅玫瑰啫喱就有啲玫瑰花乾晌度。然後就有鮮士多啤梨、香蕉同棉花糖撈晌鮮忌廉之中，最底層就係海綿蛋糕，成杯嘅味道都唔算好甜。

話說叫嘢食時店員話玫瑰芝士蛋糕太好賣而暫時售罄，仲話廚師已經晌度努力趕製中，同埋需要啲時間去冷藏嚟定型。好彩我哋食完主菜之後店員就話蛋糕都啱啱好成形，名符其實新鮮出「爐（雪櫃）」。

用雕到成朵玫瑰花咁嘅鮮士多啤梨伴碟，再加埋鮮忌廉同朱古力畫花，賣相好靚。蛋糕上嘅玫瑰啫喱鏡面清澈，仲用埋玫瑰花乾點綴。中間嘅芝士慕絲滑溜有奶香，下層嘅威化餅碎質感脆脆兼鋪得平均。

我嚟之前已經好想試呢個甜品，實際表現亦符合期望，可以掹車邊食到真係好開心呀！



洛神花茶，味道微酸，都幾消滯。



花子冰，呢個係餐廳嘅名物之一。



佢哋特登將藍莓、紅莓、士多啤梨等雜莓同香草雪成冰塊，飲起嚟有淡淡甜甜果香，加埋薄荷葉，炎炎夏日之下的確既消暑又解渴。