[第一城冰站] 過口癮雞蛋仔

去到附近口痕痕，晌第一城冰站買咗份雙拼雞蛋仔，我揀咗香芋拼芝士，前者係貪佢嘅顏色，可惜當日從外觀嚟睇紫色唔突出，反而撕落嚟之後先見到入面係深紫色。雞蛋仔食起來蛋香稍遜，慶幸外脆內有彈性，但就感受唔到香芋味。



芝士口味唔算非常非常濃郁，除頭幾啖較明顯外，再食落去就好似同原味雞蛋仔差唔多。

呢排食過唔同食店嘅雞蛋仔，綜合而言呢間唔算出眾。不過以花臣類雞蛋仔嚟講，一份唔洗廿蚊，都算係想過口癮時嘅選擇之一。