[Buddy’s Kitchen] 午餐

晌Buddy’s Kitchen食晏，叫咗兩份午餐，分別揀咗甘筍橙湯同雜菜沙律，甘筍橙湯飲落真係幾香橙味，甜甜哋都幾討好。


英式早餐，有煎蛋、薯餅、牛仔腸、煙肉同焗茄汁豆，賣相都幾靚。


原來煙肉下面仲有炒雜菌同法包多士，雖然油份略多，不過都OK。


朋友嘅醬汁燒豬仔髀，佢揀咗配薯菜，同我一樣都係有炒雜菌，佢話個豬仔髀冇燒得太乾身，食落仲有肉汁。

個餐仲包咗飲品，我哋分別叫咗熱檸茶同凍咖啡，不過冇影相。

[Lucy Coffee n Food] 從火炭搬到荃灣

 其實Lucy Coffee n Food晌火炭時已經好想去，不過因為某啲原因，去到人哋搬咗都去唔成。

 講真，其實火炭店嘅環境比荃灣店大同多啲自然光，我係鍾意火炭店多啲。

 不過好彩去嗰日唔係多人嘅時段，同埋佢本身啲位都唔會排得太迫、係有少少距離嗰種，整體環境唔錯。

好想食佢啲甜品，最後都勒住自己，只係買咗杯Latte，個拉花都幾幼細，飲落奶滑而帶微微甘香。

唔，成間舖嘅座位都有自己嘅特色，但唔係坐得人好舒服，自問體重都算輕，不過我坐嗰張櫈好似搖搖欲墜，就快掉落地下咁，好冇安全感呀。

[Pheromone Dessert] 好睇但係…

個環境好明顯係走少女（熟女）路線。

 餐牌好似本雜誌咁。

綠茶慕絲棉花堡，最吸引嘅地方就係嗰舊粉紅色棉花糖。杯入面就係雪糕、綠茶慕絲、紅豆蓉、爆谷同燕麥，綠茶慕絲同紅豆蓉正常，爆谷同燕麥好腍，唔太討好，感覺上呢個係好睇但味道麻麻嘅甜品。

[程班長台灣美食] 嚟得快去得快

同朋友去咗程班長食晚餐，其實已經嚟過一次，今次係第二次喇。

 我哋叫咗兩杯冬瓜茶，甜度OK，冬瓜仲有清熱作用添。

紅燒半筋半肉麵，即係有牛筋同牛肉，另外仲有蔥同酸菜等等。飲咗淡湯，濃郁得嚟亦討好，而且飲完唔會有口渴感。麵條係闊身嗰種，都算掛湯，食起嚟幾彈牙。
今次仲叫咗啲小食，不過唔詳細講喇，我自己就覺得台式滷味大腸比較OK。

同上次比牛肉麵水準都冇咩點變，不過啲位真係好迫，大家都係嚟得快去得快，同埋唔係咁啱一班人嚟食。

[石屋咖啡冰室] 價位唔貴all day breakfast

見到有雜誌介紹石屋家園入面嘅石屋咖啡冰室，價位唔貴，於是就同家人一齊去行吓食吓嘢。

 個環境好好呀，不過附近其實有墳場。

 入面係仿懷舊裝修，都幾特別。

我同家人分別叫咗三份all day breakfast，再加三杯咖啡。分別係Regular Coffee、Hazelnut Latte同Caramel Latte，後面兩款跟餐要加十蚊。我飲Hazelnut Latte，榛子味唔係好出，同埋超超超超超甜，不過兔仔同貓仔拉花又真係幾得意。

水煮蛋配三文魚及英式鬆餅、水煮蛋配煙肉及英式鬆餅，以四十幾五十蚊就食到eggs benedict，真係好抵。切開都幾流心，同埋冇腥味，可能有人覺得「吓呢個都係評語？」，不過我曾經晌其他地方食過個eggs benedict係有腥味，所以呢點對我嚟講都幾緊要。伴碟嘅雜菜沙律有車厘茄、青瓜、粟米粒、生菜等等，整體嚟講都幾健康。唯一要彈煙肉嗰份，啲煙肉煎得好乾同有啲硬。

另外仲叫咗份deluxe breakfast，包括：煎蛋、煙肉、雞肉腸、煙三文魚、焗豆同多士。呢份唔係我食，所以講唔到咩味，不過就咁睇就好似冇eggs benedict咁開心，呢款仲要係咁多款all day breakfast之中最貴嘅。

整體嚟講真係好抵食，睇得出唔hea，但今次啲煙肉真係煎得好乾，如果我哋只係食水煮蛋配煙肉及英式鬆餅嘅話，應該會扣好多分。

[靚靚 不一樣的車仔麵] 失望車仔麵

同朋友去尖沙咀行街行到攰，只係想求其醫肚，就去咗食車仔麵。


可能呢度晌馬會附近，手畫點餐紙嘅設計好似六合彩票咁，都幾得意。


叫三餸麵嘅話會免費奉送指定飲品，朋友要咗山楂洛神花，都幾蠻大杯，不過佢話飲落有啲似利賓納。我就叫咗熱奶茶，以為可以加錢換購，原來都係正價，茶味同奶味一般。


冇幾耐侍應就拎咗啲食物嚟，某啲車仔餸晌無特別要求之下都係分開上。

我叫咗沙嗲湯底配油麵、蘿白、沙茶豬皮同麻辣咖哩魚蛋，朋友就係酸麻辣湯配油麵、沙茶豬皮、九轉大腸、牛腩、咖哩魷魚同腐乳通菜。

我碗湯底只有微暖溫度，其他食物亦然，蘿白煮得透同無渣、沙茶豬皮亦正常，不過麻辣咖哩魚蛋嘅醬汁唔辣，反而甜甜哋，同麻辣完全扯唔上關係。

朋友啲車仔餸同樣只係微溫，慶幸大致唔難食，不過咖哩魷魚最差，魷魚醃到本身味道盡失，味同嚼蠟。

唔係第一次食呢間，記得上次雖然唔算出眾，但未至於差，呢次之後對佢哋都幾失望。