[靚靚 不一樣的車仔麵] 失望車仔麵

同朋友去尖沙咀行街行到攰，只係想求其醫肚，就去咗食車仔麵。


可能呢度晌馬會附近，手畫點餐紙嘅設計好似六合彩票咁，都幾得意。


叫三餸麵嘅話會免費奉送指定飲品，朋友要咗山楂洛神花，都幾蠻大杯，不過佢話飲落有啲似利賓納。我就叫咗熱奶茶，以為可以加錢換購，原來都係正價，茶味同奶味一般。


冇幾耐侍應就拎咗啲食物嚟，某啲車仔餸晌無特別要求之下都係分開上。

我叫咗沙嗲湯底配油麵、蘿白、沙茶豬皮同麻辣咖哩魚蛋，朋友就係酸麻辣湯配油麵、沙茶豬皮、九轉大腸、牛腩、咖哩魷魚同腐乳通菜。

我碗湯底只有微暖溫度，其他食物亦然，蘿白煮得透同無渣、沙茶豬皮亦正常，不過麻辣咖哩魚蛋嘅醬汁唔辣，反而甜甜哋，同麻辣完全扯唔上關係。

朋友啲車仔餸同樣只係微溫，慶幸大致唔難食，不過咖哩魷魚最差，魷魚醃到本身味道盡失，味同嚼蠟。

唔係第一次食呢間，記得上次雖然唔算出眾，但未至於差，呢次之後對佢哋都幾失望。