[蘇記] 如果無比較的話

我鍾意食嘅嘢都幾多元化，西餐中餐、貴嘢地踎，都冇咩特別偏好，總之唔難食就得。每次出去都係因應地區而決定食啲咩，例如去深水埗就主要食啲地踎嘢、大坑就飲咖啡，當然有時都會轉吓口味同習慣嘅。

呢日同朋友去深水埗影相，咁就去咗附近嘅蘇記食早餐先。

呢度係全開放式嘅舊式茶檔，雖然有簷篷遮一遮，但都係好天曬落雨淋。呢種食店通常只會晌舊區先有，環境一定會比室內嘅茶餐廳無咁好同熱，不過都算係香港嘅本地特色之一嚟。

因為見豬扒係佢哋嘅招牌貨，咁我哋就分別叫咗豬扒麵、豬扒豬膶麵。我唔食豬膶所以唔知咩味，豬扒就切咗件，食起上嚟都幾方便，肉質都幾鬆化，調味恰好，冇俾鬆肉粉醃過頭嘅感覺，同埋成碗都係骨位、冇咩肉食，似係湊湊埋埋咁、唔似來自同一塊豬扒。其實我影咗成碟骨嘅食後相，我諗都冇人想睇食物殘渣相掛？！不過連骨位嘅豬扒都有好處，通常會入味啲，同埋比只有肉嘅位香啲。

麵就係平常茶餐廳嗰種大光麵，浸耐咗都冇話會太腍身，嗰日仲見到食店啲人灑水晌啲未煮嘅麵餅度，應該係想啲麵快熟啲，節省煮嘅時間，咁香港人分秒必爭，都可以理解嘅。

然後我哋叫咗油占多，係厚身麵包嚟，搽咗果占同牛油再烘到脆脆哋。另外仲有熱奶茶、凍奶茶，唔知係唔係我嘅口味比較奇怪，呢排飲嘅奶茶都好似冇咩茶味咁，不過都幾順喉幾滑嘅。

呢度係冇套餐，全部嘢食都係散叫，以深水埗物價嚟講夾夾埋埋都唔係好平。食物係正常以上嘅水準，招牌豬扒方面，如果冇比較嘅話我哋會覺得呢間幾好，但係因為我哋食過尖沙咀某間又係地踎茶檔嘅（唔講名喇），有比較之下好似佢哋比呢間好食啲。