[Aroma] fusion西餐

嚟到藍屋附近嘅Aroma，係間食fusion菜嘅西餐廳。


佢哋有地下同一樓，呢次我哋就係坐樓上。


呢度啲佈置都幾特別，睇得出店主應該係一位籃球愛好者。


向下望仲可以睇到樓下嘅情況。


檯面花紋幾有特色。


因為呢度啲燈光偏暖色，所以我就較返個白平衡，等陣間影嘢食嗰陣個感覺無咁黃。

好多嘢都好想食，奈何我哋只有兩把口，呢次試得唔係太多款。

先叫兩杯飲品，Grapefruit Mojito，當中夾雜唔少鮮青檸同薄荷葉，再加上西柚汁，酸酸甜甜，清新醒胃。Orange Iced Tea，個鮮橙大約有四分一至三分一個，紅茶味出，每啖都係甜香味。

Deep-fried Cauliflower，表面灑上巴馬臣芝士絲、香蔥同辣粉，椰菜花食落爽脆，伴著特製嘅咖哩醬格外惹味，亦無油膩感。

Deep-fried Chicken Wings，用咗廣東人愛食嘅鹹蛋入膳，鹹蛋黃碎同鹹蛋黃汁沾滿雞翼表面，外皮就炸到微脆，香氣十足。睇上去邪惡，味道就唔會過於濃郁。雞翼仲係單骨嘅姿態出場，方便進食，都幾細心。

Grilled US Angus Rib Eye，伴碟有燒秋葵、雞髀菇、蒜頭、炒洋蔥、腐乳薯蓉同疑似馬蹄。牛肉眼我哋揀咗五成熟，聽侍應講有八安士重，食落就肉質鬆化，近筋位位置有牛油香。秋葵脆而帶焦香，不過略嫌有啲啲燶。最意想不到嘅係中式腐乳同薯蓉原來都幾夾，甚至有啲似晌度食緊芝士薯蓉嘅錯覺。

餐廳將常用晌中菜嘅調味料同食材如腐乳等等融匯於西餐之中，嶄新得來味道都幾匹配又唔突兀，感覺討好。

[酒鍋] 滿足嘅下午

上次嚟V point食韓式烤雞，呢次就更上兩層樓，嚟到以火鍋馳名嘅酒鍋。

坐擁銅鑼灣鬧市廿多層樓高嘅景致。

裝修就比一般火鍋店多一份時尚感。

陳設都幾有特色，座位亦夠寬敞。


不過呢日我哋唔係為火鍋嚟，而係為咗呢度賣相可愛嘅點心。


茗茶揀咗玄米綠茶，味道比較清，用鐵茶壼載住仲好保暖。

我哋分別試咗幾款點心同小菜等等，先係皮蛋豆腐，切片豆腐上放咗皮蛋粒、薑絲同香蔥，係一份無乜負擔嘅涼菜。

酒窩獸，個樣好似外星人咁，餡料有微辣泡菜同芝士等等，都幾過癮。

魷來游去，好似魷魚晌上湯中暢游咁，造型可愛。上湯加咗啲疑似紫菜碎，同埋仲有啲豆苗點綴。小魷魚嘅外皮通透煙韌，入面就有切絲胡蘿蔔等等，口感爽脆，當中仲有微微嘅黑松露味。

黑松露櫻花蝦燒賣，上面嘅櫻花蝦同黑松露鮮香，豬絞肉肥瘦均勻富肉汁。

原隻鮮蝦帶子腸，呈粉紅色嘅腸粉皮係用紅米嚟整，比一般嘅嚟得特別，中間仲包住中蝦同帶子，外滑溜內爽彈。

京城香煎蔥餅配咖哩醬，煎餅油酥味香，沾晌手中嘅多餘油份唔多，附上嘅咖哩醬仲暖暖哋嘅，都幾香辣惹味。

蟲草花滑雞籠仔蒸飯，配料有雞件、蟲草花、木耳、紅棗同香蔥，米飯粒粒分明，同埋好有荷葉香，雞件亦滑口唔嚡。

紫心薯軟糕，外層包住椰絲，中間係軟糯紫薯餡，甜度適中唔膩。

呢次除咗大飽口福外，仲大飽眼福，確係個幾滿足嘅下午。

[Cafe Yawn] 甜品咖啡

終於去試銅鑼灣希雲街嘅Cafe Yawn。

入面嘅面積唔算好大，當日仲只係得一位店員，收銀處、沖咖啡、煮熱食、整甜品都係一腳踢，睇見都覺得忙，不過都係一輪輪，啲人食完好快就走晒喇。


牆上面有唔少用粉筆字寫嘅字句。


同埋有啲同咖啡有關嘅裝飾。


呢排向街嘅高身吧檯都唔錯，因為個視線比較高，所以望住出面咁坐都唔會出現同路人眼望望嘅尷尬情況。


同好多咖啡店一樣，呢度都係有個自助位，俾人自己斟水攞醬料等等。


收銀處側邊仲列咗有咩特別款式嘅飲品或食物。


雖然對佢哋嘅熱食好有興趣，但最後只係試甜品同咖啡。


T骨排布朗尼。


食之前將朱古力漿倒晌熱燙燙嘅鐵板上，隨即發出唧唧聲，視覺同聽覺效果滿分，呢個都係鐵板類食物一向受人喜愛嘅原因之一。用布朗尼扮嘅T骨排質感扎實，外脆內軟綿，朱古力味幾濃郁，配上雪糕一齊食，冷熱交融，口感唔錯。

香蕉布甸，將香蕉蛋糕放咗晌熱奶之中，賣相就好似海中嘅小浮島。吸滿熱奶嘅香蕉蛋糕，再加焦糖脆脆同呍呢嗱雪糕，個味道都幾得意。

Caffe Mocha，朱古力味同咖啡味平衡，對於想飲咖啡又怕飲太多咖啡因嘅人係個唔錯嘅選擇。

Rose Latte，放近個鼻嗰陣已聞到陣陣玫瑰香，奶泡綿滑，拉花都幾靚，味道係討好嘅甜，隨後就係淡淡咖啡香。

[De Luna] 黑布街酒吧西餐廳

旺角黑布街，昔日車房林立嘅街道，已逐漸變成食街。當中有唔少馳名嘅甜品店，不過呢晚我哋嘅目標係De Luna Tapas Bar & Restaurant。


近年興起酒吧式西餐廳，既可飲酒消閒，又可飽餐一頓。


佢哋啲檯櫈係高身吧檯為主，同埋係全開放式，可清楚睇到餐廳外街景，比傳統嘅酒吧開揚，對於好似我呢啲唔係時常去酒吧嘅人嚟講，確係減輕唔少疑慮。


佢哋用LUNA為名，LOGO上都係一彎新月，感覺神秘又美麗。


臨近聖誕，呢度就出咗Christmas Set Dinner，$458包前菜、餐湯、意大利飯/螺絲粉、主菜同甜品，內容都幾豐富，於是叫咗份晚餐，再散叫啲嘢試試。


侍應只係提供酒精餐牌俾我哋，見同行人唔飲酒，我又記得之前睇過其他人影嘅mocktail相，問一問先知原來係叫Honeymoon，用咗橙汁、蜜糖同糖水等等調配，同埋用香橙同車厘子點綴，飲落滿口甜香，無人工化嘅假味，幾適合唔飲酒嘅人。


而只係淺嚐嘅我大多會揀Mojito或Margarita等等相對較穩陣嘅cocktail，晌餐牌入面發現Flavour Mojito，細問下原來有蜜桃、菠蘿、荔枝或士多啤梨口味，決定要杯菠蘿味嘅試試。出到嚟嘅賣相好靚，由杯嘅側邊就可以清楚睇到打碎咗嘅薄荷葉、鮮菠蘿肉同青檸，最頂層中間加咗碎冰，旁邊就用咗鮮菠蘿片同薄荷葉粉飾，飲落酸香溫和易入口，亦無某啲餐廳出品嘅苦澀味。


帶子薄片伴紅菜頭及美國露筍，露筍整齊排列晌薄切帶子刺身上，仲有紅菜頭碎同疑似檸檬皮嘅小黃粒，都幾鮮香清新。


牛肝菌忌廉湯，拎嚟時已經聞到陣陣香氣，表面灑咗啲橄欖油同黑松露醬，湯質濃稠，每啖都係菇菌馥香同微微討好嘅酸味。


意大利豬肉腸螺絲粉配黑松露菌番茄汁，餐廳特意將豬肉腸剁碎，同醬汁更為融合，番茄味偏向自然，當中嘅蒜香同黑松露醬味較濃郁。螺絲粉煮得煙韌彈牙，可以輕易咁將醬汁藏於螺絲紋之間。


炭燒美國頂級肉眼配牛肝菌芥末，份量十足，肉眼上面嘅炭燒格紋分明。


叫嘢食時侍應都無問生熟度，不過出到嚟嘅效果啱啱好，應該大約係平時嘅五成熟左右。肉眼用咗黑椒等等調味，肉質軟腍有油香同焦香，就咁食都已經幾惹味，亦可蘸附上嘅牛肝菌芥末醬。伴碟嘅雜菜沙律有切絲生菜、紫生菜、菊苣等等，仲有炸新薯，食啲蔬菜作緩衝都唔錯。


最後就係散叫嘅意式焗紙包鰽魚，侍應拎咗包小小嘅包袱出嚟，再直接晌我哋面前將袋口剪開，香氣即時四溢，入面除咗有鰽魚肉外，仲有車厘茄、黑橄欖、酸豆、新薯同疑似羅勒嘅香草等等。因為係將所有材料一併放入去厚身嘅透明保鮮紙，再包好放入焗爐焗成，咁就可以保留所有食材嘅鮮味。鰽魚魚身扎實唔鬆散，爽嫩得來又唔會太實，當中嘅湯汁仲甜中帶黑椒嘅微辣。

Christmas Set Dinner雖設定供一人享用，但我覺得份量唔少，同行人細食嘅話share一份可能已經覺得飽。食物方面，以一間酒吧西餐廳嚟講烹調得一啲都唔草率，並非敷衍了事。

De Luna Tapas Bar & Restaurant
地址：旺角黑布街17號地下