[鮑記大食部] 晌街邊立食

 呢期晌IG好紅嘅小食都唔少，其中最有興趣嘅係荃灣鮑記大食部。嗰日舖入面嘅都係紋身大漢叔叔，見我晌度望吓望吓佢哋貼出嚟嘅餐牌，會主動問我想要咩，比想像中nice。

我嚟之前已經諗好咗要比較特別嘅火山爆發溶岩牛堡，等咗一陣就拎得。多到漏出嚟嘅粉紅色芝士係用紅菜頭整，仲非常稠身，個感覺有少少似香口膠，我原本想好似人哋咁整拉絲，不過啲粉紅色芝士本身好黏，但又黏唔住個包面，當我拎起少少個麵包時，啲芝士好快就抵受唔住掉返落嚟，我心諗到底其他人係點整嘅呢？！？！

講返個包，入面啲肥牛都幾多，食起嚟幾juicy，夾雜住微微辣酸嘅泡菜，仲有番茄片同紅椰菜絲一齊食唔算漏。

食物OK，唯一唔好係因為開放式嘅關係，本身整食物個廚房已經佔咗間舖所有空間，所以就要晌街邊立食。當日都幾熱，一邊食一邊抹汗，好彩食食吓見附近有個公園仔，就轉咗去嗰邊坐低食喇。