[TC2] 慢

同家人去咗太子嘅TC2食晚餐，我哋叫咗幾份套餐再加小食，不過因為意粉類感覺麻麻，就唔特別講喇。

 煙三文魚沙律，啲菜都幾新鮮。

 鮮果沙律，呢份就跟套餐嘅，不過都唔細份，同埋冇話出晒水咁，唔似係整定放入雪櫃嗰種。

 小食拼盤，有墨西哥辣汁粟米片、餃子雞翼、台灣腸同炸薯角，成碟都係香口炸嘢，都幾邪惡。

 三色焗薯皮，即係分別釀咗洋蔥火腿、蛋沙律同吞拿魚嘅焗薯皮，同之前啲小食比明顯唔係太出眾，不過入面啲餡都幾多，睇得出唔hea。

木糠布甸，其實仲叫咗其他甜品，不過呢款係最眼前一亮，木糠餅碎同煉奶忌廉嘅比例適中，又唔會甜到漏。

以一間俾人上去飲嘢傾偈嘅cafe嚟講，嘢食都幾有心思唔敷衍，唯一唔好係當日可能人手唔夠，上菜上得非常慢，每碟食物都要等好耐先有得食。

[寶星咖啡餐廳] 花臣嘢

呢間之前已經食過幾次，今次同朋友叫咗兩份下午茶。

我飲熱奶茶，唔知點解當日杯熱奶茶有啲澀，但又唔係討好嗰種，奶亦唔夠香滑。


朋友嘅自選三拼麵，沙爹牛肉、芝士腸、太陽蛋配公仔麵，太陽蛋煎得幾好，味道正正常常。


反而想講一下條芝士腸，唔知係刻意定不經意，條腸好似隻手指咁，都幾搞笑。


我嘅餃子釀雞翼拼碎蛋沙律，雞翼用類似瑞士汁、鹹鹹甜甜嘅醬料調味，中間就拆骨並釀入肉餡，我覺得質感唔夠實在、食起來有啲「霉」（唔係真係霉，只係質感似），純粹花時間拆雞骨嘅心機搭救。慶幸碎蛋沙律味道仍然唔錯，保持到之前食過嘅水準。

呢度同其他茶餐廳唔同，佢哋傍晚六點就收舖。定價算便宜，基本食物如麵食等等OK，碎蛋沙律亦唔錯，惟呢次食比較花臣嘅餃子釀雞翼就有啲失望喇。

[新華茶餐廳] 歲月痕跡

 去長沙灣嗰邊睇嘢，之後就去新華茶餐廳食午餐，呢度嘅裝修都充滿歲月痕跡，餐牌仲係印住七個位嘅電話號碼。

 我同朋友嘅凍熱奶茶，都算茶香奶滑。

沙嗲牛肉麵配火腿奄列牛油餐包，同埋雪菜肉絲粉絲配火腿奄列牛油餐包，餐包鬆軟，呢度嘅雪菜肉絲都幾好食。

[Solera] 外國風西班牙菜

同朋友去咗Solera，呢間係西班牙菜餐廳，入面都幾外國風，侍應係外藉人士為主。店入面有數個大玻璃窗，某啲位仲係面海景，採納唔少天然光線，坐起來都算舒服。


點咗嘢食後侍應就拎咗籃農夫包嚟，質感有彈性而煙韌，可以單吃或蘸橄欖油黑醋一齊食。



Red Sangria，用紅酒、鮮橙、檸檬同青檸調配，係非常易入口嘅西班牙果酒，自己上網搵食譜晌屋企調配都唔難。



Fresh Tuna carpaccio, escabeche sauce, Salmon roe and crispy leek，生吞拿魚配三文魚籽，有啲日式感覺，加上大蒜絲同油醋醬，有咬口之餘都幾開胃。



A Selection of 4 Spanish cheese, quince jelly and candied walnuts，四款鹹度適中嘅芝士，配上甜甜哋嘅合桃，同埋第一次食微微酸嘅桃梅啫喱，都幾特別同討好。


芝士拼盤跟咗碟Toasted Farmhouse Bread rubbed with a Tomato Spread，底層農夫包烘至脆口，上層番茄混有蒜蓉等等，無添加太多額外調味，都係食材本身味道，唔一定配芝士，單食都OK。



Black ink Seafood Linguine with a touch of chili，面層放咗一隻烤虎蝦，每條意粉表面都沾有墨魚汁，再加埋其他醬汁同旁邊嘅辣椒粉一齊食。辣度係輕輕透出嗰種，反而鮮味較出。


Roasted sucking pig Segovia style, quince allioli and roasted apple，有別於我哋平日嘅中式乳豬，呢款西班牙燒乳豬外皮仍有韌性，肉汁少但肉質唔鞋口，可以同附上嘅木梨醬同焗蘋果一齊食來減輕膩感。


Rotisserie Chicken – Spanish style whole chicken ，menu話係用檸檬同香草塗抹雞隻表面，再原隻攞去燒。我覺得皮脆，但雞肉太乾身，旁邊嘅薯角同香草汁亦唔太出眾。


Seafood Paella，上面有藍青口、中蝦同大蜆，以高湯、番茄等煮成嘅西班牙飯入面混有什錦海鮮，近鍋邊位置微微焦脆、內層質感較黏稠，調味唔濃，主要來自海鮮同番茄本身。

呢間餐廳嘅菜式有別於我一向認知嘅西班牙菜，以前就只係知道西班牙海鮮炒飯同西班牙辣肉腸，我未有資格評論佢正唔正宗，但整體都算啱口味。

[雲來軒] 新派中菜

夜晚去咗雲來軒同班朋友食飯，呢度係走新派路線嘅中菜館。

 姬松茸黑蒜燉刺參，燉湯入面除咗姬松茸同刺參，仲有雞腳、響螺、瘦肉，都幾足料，同埋冇咩油。

 蟲草花圓肉浸翡翠苗，因為有圓肉所以令個汁好甜，加上配搭好清，感覺好健康。

 草莓金沙骨，個金沙骨夾埋底下個窩巴一齊食，酸酸甜甜又脆脆哋，係呢晚咁多款之中我最欣賞嘅。

 醒胃話梅雞，隻雞唔滑，同埋唔係好食到話梅味，一般般。

三十年陳皮紅豆沙，聞落好香，個質地好稠，不過食落陳皮同紅豆味唔太明顯。

少貴，不過賣相同味道都唔差，份量又唔會話太細份，都OK。

[Hero Sandwich] 腥味蛋

同朋友去咗大角咀嘅Hero Sandwich食早餐，呢份煙肉早餐除咗煙肉外，仲有焗豆、粟米、煎蛋、薯餅、多士同雜菜，都真係幾豐富啊。以差唔多類型嘅食店嚟講，呢個價係抵食水平。

我就叫咗煙三文魚水煮蛋早餐，英式鬆餅冇切開、係原個上，水煮蛋就得一隻，仲要已經裂開咗流晒啲蛋汁出嚟，食落仲有一陣腥味。好彩煙三文魚同雜菜沙律味道正常咋。另外，跟餐嘅即磨咖啡就苦咗啲。

感覺上兩款食物嘅反差好大，水煮蛋真係又唔抵食又唔好食，不過份煙肉早餐又真係幾OK嘅，所以今次就俾OK。