[海連茶樓] 荃灣早茶

呢日去咗開業幾十年嘅海連茶樓飲早茶。


牆上菜牌嘅價錢都係用幾近絕跡嘅花碼字表示，仲有提供唔少懷舊點心。

由於係舊式茶樓，少不免要同其他人搭檯，茶客以街坊同晌附近做嘢嘅人為主，當日見有唔少人晌度互相寒暄，別有一番風味。


我哋坐低咗就開咗壺普洱，都幾香濃。


早上茶市仍保留手推車叫賣點心嘅傳統，雖然唔係細個嗰陣有保暖設備嗰種，不過都算係佢哋嘅一大特色。


從姐姐手上接過一籠熱辣辣嘅燒賣，佢哋嘅size比某啲新式酒樓嘅出品大，餡入面嘅豬肉無太多肥肉，同埋加咗啲冬菇，咀嚼起來比較實在，仲有少少肉汁。


乾蒸牛肉，即係牛肉版嘅燒賣，仲加入咗馬蹄粒，令佢幾爽脆，味道同平時食嘅山竹牛肉相似。


魚翅餃，可謂坊間少見嘅懷舊點心之一。質感彈牙，肉餡入面有甘筍同韭黃等等蔬果粒，口感豐富，但就完全想像唔到佢同魚翅有乜關聯。


鹹魚肉餅缽仔飯，肉餅非常非常非常多汁，底層嘅飯粒粒分明，仲吸滿肉汁精華，配上鹹魚同帶甜味嘅豉油就更惹味。


麻蓉包，呢個都係坊間少見嘅點心，外表呈橢圓形，比我之前食過嘅略大，不過餡料嘅比例就偏少，麻蓉質感較稀身，好彩包身唔癡牙。


馬拉糕，好耐無食呢種無餡嘅傳統馬拉糕，入面嘅氣孔較多，甜度輕微，鬆軟唔嚡，接近底部嘅位置就偏乾身。

[川味雞烤魚大王] 食得輕鬆嘅泡椒酸辣烤魚

呢條公共屋邨嘅商場陸續進行翻新工程，街市近馬路嗰邊開咗好多唔同形式嘅食肆，呢晚就試試川味雞烤魚大王。


座位以四人以上為主，不過同同類型餐廳相比編排得唔算擠迫，但如果同行嘅人數少嘅話就要同其他人搭檯。


佢哋除有烤魚同雞煲外，仲有其他湯底嘅火鍋，以及川式小食如口水雞、涼拌青瓜等等。


我哋係為烤魚而來，晌重慶麻辣烤魚、泡椒酸辣烤魚、剁指天椒烤魚、酸菜烤魚之中周旋。最後試咗泡椒酸辣烤原條魽魚，雖然平時都算食得辣，不過呢次想食得輕鬆啲，所以就揀咗小辣。等咗陣店員就拎咗呢盤份量十足嘅烤魚嚟，原條魽魚開邊浸晌奶白色嘅湯中，並鋪滿泡椒、辣椒、酸菜、芫茜、唐芹、京蔥、蘿蔔、大豆芽同紹菜等等，配料大多數都係可食用蔬菜，比例亦唔少。


等啲湯煮滾就食得，途中要不時用匙羹將熱湯淋晌魚身上。魚皮食落有烤過嘅焦香，肉質滑溜，湯嘅味道微酸微辣帶甜香，仲會愈煮愈濃郁，不過飲完都無乜口渴嘅感覺。分別輕輕一咬呈青黃色嘅泡椒同比較矮小嘅辣椒，強勁嘅辣度即時晌口腔四散，建議唔太食得辣嘅人士要小心。


我哋另外加咗啲火鍋料試試，黑毛豬肉片，鬆化而唔太癡牙。


紫洋蔥，可以令個湯底更甜。爆沙豬皮，爽口無異味，仲吸滿湯汁精華。

食物講唔不上非常出眾，但都幾惹味。我哋仲差唔多將成盤烤魚嘅配料食晒，一啲都唔浪費。另外，佢哋啲抽風系統唔錯，走嗰陣身上都無乜濃烈嘅味道。

[拉麵來] 日本風

呢日去開咗幾年嘅馳名人氣店拉麵來。


從店外到店內，都係濃濃嘅日本風。


入面面積唔大，總共只有大約十幾張櫈，難怪經常大排長龍。


牆上貼咗唔少同日本有關嘅懷舊海報等等。

屋頂仲掛咗好多懷舊玩具。


餐牌入面啲食物都係用手繪方式展示，畫風可愛，原來係出自香港知名畫家小不啦嘰嘅手筆。


嚟之前都睇過有關呢度嘅嘢，對佢哋嘅極上海老吟釀湯麵幾有興趣，最後就試咗人間限定嘅款式，始終極上海老吟釀嗰款係佢哋嘅恆常口味，下次如果再嚟嘅話先食都唔遲。


檯面放咗餐具、加咗檸檬片嘅水、昆布醋、即磨白芝麻，另外仲有醃蒜頭同醃菜等，可以自己拎嚟用。


人間限定嘅牛舌牛尾湯拉麵，由於我唔要香筍，賣相就顯得唔太突出。兩片安格斯牛舌切得算厚，肉質腍而有牛香。湯濃度同麵質就揀咗普通，湯底用牛脊骨同牛尾熬煮成，色澤比用豚骨烹調嘅清澈，另以黑椒粒、香蔥、蒜蓉同香味油提味，調味料嘅味道稍重，蓋過牛尾湯本身味道。


另加嘅味玉食落軟滑，中間幾流心。


之後一口氣試咗三款小食。


自家製餃子，底部煎到微微香脆，另外兩邊嘅餃子皮仍帶煙韌度，內裡肉餡唔多唔少，配上加咗香蔥、味道酸酸嘅醬汁，可中和膩感。


鹿兒島豬軟骨，煮得入味，滿口都係骨膠原，肉質亦都幾易咀嚼。


雞免治，外層醬汁甜鹹惹味，免治雞肉食落爽口有嚼勁，估計加咗啲雞軟骨。


我仲試咗呢支蘋果梳打，都幾酸香討好。

[Goobne Chicken] 又食烤雞

之前食過Goobne Chicken嘅銅鑼灣分店，覺得食物唔錯，呢日就同人去咗荃灣分店試試。


餐牌用色就比較可愛風，似乎唔同分店想營造唔同風格。


Somersby Apple Rita，酸酸甜甜嘅沙冰，加上整支倒轉放嘅Somersby Apple Cider，酒味唔濃，女仔飲就啱啱好。


Blue Orangeade，相對起嚟呢款嘅橙味就唔出，以甜味為主。


海鮮鍋巴湯，湯內有大蝦、藍青口同蝦仁等等，另外仲有木耳、雞髀菇、蘑菇、本菇、小棠菜、洋蔥、青紅椒同辣椒等等，份量算多。鍋巴已預先放晌湯中，一面脆口，另一面就被湯浸到軟身。湯質較濃稠，有啲似中式湯羹，辣度比較輕微。


蜜糖咖哩烤雞，淋上烤杏仁片以增加口感。烤雞外皮沾滿蜜糖，脆口肉嫩，當中仲有微微咖哩粉香。


亦可蘸另附上嘅芥末醬，味道唔嗆，又係另一種感覺。

[New York Diner] 多肉多澱粉質晚餐

銅鑼灣好多餐廳都滿座或要排長龍，可能係新開無耐嘅關係，澳門逸園中心嘅New York Diner就無乜人，不過坐低無耐都有六、七成滿。


裝修係比較摩登嘅感覺。


我覺得呢個高身檯係整間餐廳中最有特色嘅，天花板上仲掛咗倒轉嘅樓宇模型。


呢度嘅美國菜以漢堡包同扒類等偏向多肉類嘅菜式為主，我哋最後叫咗$428（未計加一）嘅二人晚餐嚟試試。


是日餐湯係雜菌忌廉湯，質感非常濃稠，雜菌碎比例唔多，不過都夠味。


脆炸魷魚圈，就咁睇餐牌以為純粹只有魷魚圈，實際仲有魷魚鬚。表層炸漿唔平均，不過魷魚肉彈牙。另外兩種醬，白色嗰款幾酸香討好。


太平洋海鮮薄餅，配料有蝦肉、墨魚仔、魷魚圈、青口、雜菌、車厘茄同豆苗，芝士適中，菇菌味較濃，番茄醬味似被完全蓋過。批底方面就較鬆，我哋比較偏好薄身脆口嗰種質感。


紐約客烤肉眼扒，我哋揀咗五成熟。肉眼扒厚身，外層焦脆度唔強，本身調味唔算濃，但肉質鬆化，可以點少少燒汁嚟食。底下就有意大利青黃瓜（西式版翠玉瓜）、烤番茄同炸薯角配茄汁，食得太多肉類，絕對需要蔬菜嚟中和一下。


海洋梳打，嗰兩條鯨魚（其實係軟糖）似晌海洋暢泳緊咁，非常吸睛。入面仲有鮮藍莓、檸檬片同椰果，係偏甜嘅梳打特飲嚟。


草莓柚子沙冰，用咗鮮士多啤梨、薄荷葉同檸檬片點綴，賣相好靚，威化紙蝴蝶仲有錦上添花嘅作用。沙冰打得幼細，柚子味比士多啤梨味更突出，非常非常非常消滯，佢完全可以減輕肉類帶嚟嘅膩感。


是日甜品。

餐廳嘅食物份量適中，多數以肉類為主，配菜嘅薯角佔隻碟一半，滿滿嘅澱粉質，食完其實幾飽。