[川味雞烤魚大王] 食得輕鬆嘅泡椒酸辣烤魚

呢條公共屋邨嘅商場陸續進行翻新工程，街市近馬路嗰邊開咗好多唔同形式嘅食肆，呢晚就試試川味雞烤魚大王。


座位以四人以上為主，不過同同類型餐廳相比編排得唔算擠迫，但如果同行嘅人數少嘅話就要同其他人搭檯。


佢哋除有烤魚同雞煲外，仲有其他湯底嘅火鍋，以及川式小食如口水雞、涼拌青瓜等等。


我哋係為烤魚而來，晌重慶麻辣烤魚、泡椒酸辣烤魚、剁指天椒烤魚、酸菜烤魚之中周旋。最後試咗泡椒酸辣烤原條魽魚，雖然平時都算食得辣，不過呢次想食得輕鬆啲，所以就揀咗小辣。等咗陣店員就拎咗呢盤份量十足嘅烤魚嚟，原條魽魚開邊浸晌奶白色嘅湯中，並鋪滿泡椒、辣椒、酸菜、芫茜、唐芹、京蔥、蘿蔔、大豆芽同紹菜等等，配料大多數都係可食用蔬菜，比例亦唔少。


等啲湯煮滾就食得，途中要不時用匙羹將熱湯淋晌魚身上。魚皮食落有烤過嘅焦香，肉質滑溜，湯嘅味道微酸微辣帶甜香，仲會愈煮愈濃郁，不過飲完都無乜口渴嘅感覺。分別輕輕一咬呈青黃色嘅泡椒同比較矮小嘅辣椒，強勁嘅辣度即時晌口腔四散，建議唔太食得辣嘅人士要小心。


我哋另外加咗啲火鍋料試試，黑毛豬肉片，鬆化而唔太癡牙。


紫洋蔥，可以令個湯底更甜。爆沙豬皮，爽口無異味，仲吸滿湯汁精華。

食物講唔不上非常出眾，但都幾惹味。我哋仲差唔多將成盤烤魚嘅配料食晒，一啲都唔浪費。另外，佢哋啲抽風系統唔錯，走嗰陣身上都無乜濃烈嘅味道。