[Friends] 不一樣嘅餐廳

呢間Friends係觀塘Go Inside Kitchen嘅姐妹店，餐廳部份侍應為聾人或弱聽人士，以黑色制服去分辨，當日所見樓面大部份都係黑色制服侍應。


午餐主菜同觀塘嗰間有啲分別，不過其他嘢就大致相同。


有需要嘅話可以舉起佢哋提供嘅牌，侍應就會行過嚟協助。


餐紙上明確地印上各種物件嘅名稱同圖案，例如係用餐時可能會用到嘅調味料，甚至係走甜等等特別需求嘅字句，當日我同黑色制服侍應落order就係靠佢。


田園沙律，入面有車厘茄、粟米、青瓜、紅椰菜、紅生菜、飛機菜等等，蔬菜爽脆，柚子醋酸香，餐前食多啲菜感覺好似健康啲。


新鮮空運美國安格斯肉眼配黑椒汁，見餐牌寫每日限售十二份，於是叫嚟試試。肉眼扒頗大塊，厚薄度剛好，生熟度揀咗五成熟，肉質尚算鬆化，只係某啲筋位要咀嚼多幾吓。就咁食已經夠味，又者蘸黑椒汁嚟食。伴碟嘅薯角炸得脆口，肉眼扒下就有炒椰菜、翠玉瓜、茄子、小甘筍等等。


莫卡咖啡，係甜香朱古力味爲主嘅咖啡。


最後仲試埋意大利芝士餅，一碟有三小件，質感挺身軟綿，帶少少咖啡酒甜香。

呢度黑色制服侍應（聾人或弱聽人士）嘅服務態度唔錯，感覺上比一般餐廳侍應更勤快有禮。不過如果想搵佢哋幫忙嘅話就要包容一下，只要晌佢哋嘅視線範圍內舉牌就一定會得到回應。