[海連茶樓] 荃灣早茶

呢日去咗開業幾十年嘅海連茶樓飲早茶。


牆上菜牌嘅價錢都係用幾近絕跡嘅花碼字表示，仲有提供唔少懷舊點心。

由於係舊式茶樓，少不免要同其他人搭檯，茶客以街坊同晌附近做嘢嘅人為主，當日見有唔少人晌度互相寒暄，別有一番風味。


我哋坐低咗就開咗壺普洱，都幾香濃。


早上茶市仍保留手推車叫賣點心嘅傳統，雖然唔係細個嗰陣有保暖設備嗰種，不過都算係佢哋嘅一大特色。


從姐姐手上接過一籠熱辣辣嘅燒賣，佢哋嘅size比某啲新式酒樓嘅出品大，餡入面嘅豬肉無太多肥肉，同埋加咗啲冬菇，咀嚼起來比較實在，仲有少少肉汁。


乾蒸牛肉，即係牛肉版嘅燒賣，仲加入咗馬蹄粒，令佢幾爽脆，味道同平時食嘅山竹牛肉相似。


魚翅餃，可謂坊間少見嘅懷舊點心之一。質感彈牙，肉餡入面有甘筍同韭黃等等蔬果粒，口感豐富，但就完全想像唔到佢同魚翅有乜關聯。


鹹魚肉餅缽仔飯，肉餅非常非常非常多汁，底層嘅飯粒粒分明，仲吸滿肉汁精華，配上鹹魚同帶甜味嘅豉油就更惹味。


麻蓉包，呢個都係坊間少見嘅點心，外表呈橢圓形，比我之前食過嘅略大，不過餡料嘅比例就偏少，麻蓉質感較稀身，好彩包身唔癡牙。


馬拉糕，好耐無食呢種無餡嘅傳統馬拉糕，入面嘅氣孔較多，甜度輕微，鬆軟唔嚡，接近底部嘅位置就偏乾身。