[XOXO Café Lab] 外國小屋fusion菜

淘大花園嘅XOXO Café Lab開咗成年，門口放咗幾棵聖誕樹，未到十二月已感受到濃濃嘅聖誕節氣氛。


入口旁仲有個擺放咗人造盆栽嘅小窗。


店內燈光偏暖，好似身處晌外國小屋咁。


色調方面係淺藍襯白色。


感覺都幾柔和。


細心一睇，原來牆紙印咗小鹿等等圖案，都幾可愛啊。


呢度係韓台等多國fusion料理，我對泡泡鍋飯幾有興趣，始終其他地方少見，不過最後只係試咗比較輕巧嘅食物。


熱烙神雪梨茶，茶壺同茶杯用色圖案都好靚，對於女仔嚟講可謂愛不釋手。浸住烙神花嘅熱水被染成天然紅色，當中仲有雪梨蓉，飲落酸甜消滯。


鹽酥豆腐，沾有辣粉嘅外皮薄而脆，入面嘅豆腐口感滑溜，係無乜負擔嘅小食。


煙三文魚煙腿三文治，最上層係將蛋白打發，再入焗爐焗成嘅泡泡，中間就有粒流心蛋黃。


從側面睇呢份三文治，每層饀料都幾豐富。


食前先將頂層蛋黃刺穿，等啲蛋汁慢慢流出。

有別於平時嘅甜食版蛋白泡泡，呢個嘅質感較實在但算軟綿。厚身麵包經烘脆，蘸蛋汁食都唔錯。


三文治中層夾有煙三文魚、洋蔥，底層就係煙火腿、紫生菜、番茄片，兩層同樣配上沙律醬，再加上碟上面嘅韓式辣醬汁，食起嚟濃郁惹味。要留意嘅係辣醬汁嘅辣度唔弱，如果唔係好食得辣嘅人就要注意一下。


沖繩燒紫番薯霜淇淋配黃粉黑糖，原本想影得好啲，但牛奶雪糕嘅份量唔少，影咗一兩張相後已支撐唔住倒塌咗落嚟。上層牛奶雪糕冰凍，下層燒番薯溫度暖暖哋、中空呈冬甩狀，兩者一齊食冷熱交融，配上甘甜黑糖，無驚喜，但幾好味。