[Ivan The Kozak] 東歐浪漫晚餐

lift門一打開就見到仿小屋設計嘅Ivan The Kozak，餐廳原位於閣麟街，經營咗有十多年，惟該地段重建先搬嚟呢度。


佢係間食俄羅斯同烏克蘭菜嘅餐廳，聘用嘅廚師都係嚟自當地。


呢度裝修充滿外國風情，我都係第一次試東歐菜咋。


環境燈光昏暗，再加檯上嘅蠟燭座，都幾有氣氛。


某啲角落放咗俄羅斯同烏克蘭有關嘅擺設，例如係呢堆可愛嘅俄羅斯套娃。


另一邊牆身有一排窗口，熱情嘅餐廳老闆表示窗外係烏克蘭首都基輔市嘅風景照，佢話牆身本來係廚房嘅窗，因為感覺唔太美觀，就諗到呢個方法去修飾，非常有心思。


餐廳入面放咗幾個大型酒櫃，用嚟擺放餐酒。


餐牌分別印有中文、英文同俄文，可謂照顧到各方人士需要。


揀好嘢食，我哋就靜靜地等候。


我哋叫咗支Sparkling Water，原本以為會係平日晌西餐廳經常飲綠色樽嗰款，點知侍應拎咗呢支透明樽身、嚟自智利嘅Andes Mountain Water，上網搵資料，原來呢款天然水係取自安地斯山山頂冰河層經六十年融化而流至山腳嘅湖水。


什錦冷肉拼盤，都無留意餐牌上有無寫係咩類型嘅冷肉，我估分別係腩肉、煙鴨胸、煙燻腸同煙燻肉（個名可能同實際有分別），腩肉口感較實在、煙鴨胸調味啱啱好、煙燻腸鹹香、煙燻肉蒜味濃郁，係一款偏向重口味嘅前菜，當中以煙鴨胸嘅味道較溫和，若果配Vodka等烈酒嚟食就比較適合。


正宗烏克蘭羅宋湯，味道同配料都有別於坊間加入番茄、馬鈴薯、西芹、洋蔥等等雜菜酸中帶微辣嘅羅宋湯。餐廳用咗切絲紅菜頭同切件牛肋等等煮成，上檯前晌湯面加上酸忌廉同香草，飲落滿口香甜，餐廳老闆話呢個先係正宗烏克蘭羅宋湯。


烏克蘭三文魚湯，入面有切粒三文魚肉同雜菜，鮮味頗濃。


招牌芝士焗牛脷盅，面層放咗塊酥皮，賣相有如一碗湯咁。


餐廳老闆幫我哋將酥皮放晌碟上，之後用較剪剪成幾件，等我哋可以用佢蘸入面啲配料嚟食。


未食已聞到一陣陣濃香嘅芝士味，汁入面仲有蘑菇同洋蔥，同埋可以拉到芝士絲。牛脷切成數件，質感軟腍，再加上厚身脆口嘅酥皮，都真係幾惹味。


烏克蘭烤牛扒，拎到出嚟時香氣撲鼻。


牛扒表面有黑椒碎，肉質鬆化而帶烤香，蘸上黃芥末醬同燒汁，調味唔錯，伴碟嘅烤番茄、紅椒同茄子可以平衡膩感。


離開時我哋發現入口側邊有個獨立房間，八卦之下原來係VIP房嚟。


如果同行朋友眾多嘅話，預約呢間都唔錯，傾得雀躍都唔怕騷擾到其他人。