[Green Door Coffee] 健康飽肚午餐

呢次試咗維園附近新開嘅銅鑼灣Green Door Coffee，雖然唔係晌大街，不過呢邊人流唔少，加上附近有巴士站，比想像中方便同繁榮。

走入咖啡店後，同熙來攘往嘅街道相比，確係有種讓人平靜下來嘅感覺。


堅多咖啡。


呢度除咗有三文治、窩夫、蛋糕之類外。


仲有正式嘅午餐如意粉、薄餅同沙律，以咖啡店嚟講選擇上都算多樣化，仲會定時轉換菜式。


是日午餐餐湯係粟米忌廉湯，味道OK。


香雞科布沙律配亞洲特色沙律醬，科布沙律（Cobb Salad）晌出面比較少見，於是就試試。上網search到呢款沙律源自美國某家餐廳，主要用唔同嘅切粒蔬菜製作而成。材料分別有雞肉、萵筍、黃椒、紅椒、車厘茄、紅洋蔥同雜菜，賣相五彩繽紛，單睇已夠吸引。切粒蔬菜大小相若，咬落清新爽脆，雞肉用咗香草調味，當中嘅亞洲特色沙律醬食落有啲麻油香，不過只係我個人感覺，無求證係咪真係加咗麻油或類似嘅調味料，味道係討好嘅，而且份量唔少，對女仔嚟講當做午餐都唔錯。


Flat White，面層奶泡打得綿密細緻，拉花漂亮之餘，放咗一陣都無乜消散變形。飲落有淡淡嘅牛奶甜香，之後就慢慢滲出微甘嘅咖啡味。


雞批，店員會預先將佢擺入焗爐烘暖。


批身都幾大，外皮腍中帶脆，內有雞絲、甘筍粒、蘑菇片、洋蔥絲等等，仲有適量嘅白汁，食落唔會太膩。


最後仲試埋甘筍蛋糕，蛋糕入面有甘筍同合桃碎，聞落有堅果香，夾住嘅忌廉芝士都幾甜，口感較平日嘅海綿蛋糕扎實。

呢次嘅選擇都偏向健康，味道以一間專門飲咖啡嘅餐廳嚟講唔錯。咖啡方面，拉花幾靚，另外原來佢晌尖沙咀都有分店架。

[越後屋] 可愛輕甜白熊刨冰

終於趕得切晌啱啱入秋，未完全轉涼前食越後屋。


佢哋曾經晌PMQ開設Pop-Up店，今年年頭先晌大坑開業。舖面面積唔大，店員嘅工作間已佔大半，同埋只有幾個吧檯位。


呢度係專賣日式刨冰，另有啲限定嘅特別款式，同埋幾款甜品同簡單飲品提供，可以揀堂食或外賣。


嚟之前已經決定要試白熊刨冰，造型非常可愛，用咗鮮藍莓做眼，呍呢嗱雪糕做鼻，耳仔就係鮮橙，再用士多啤梨做面珠同頭飾，另外仲有啲鮮菠蘿。牛奶味刨冰打得平均細碎，最底層係士多啤梨醬（另可揀芒果醬）。食落甜味唔高，加上生果係酸味為主嘅，除咗有外表，味道亦唔錯。留意返，當日雖然已有涼意，但刨冰嘅溶化速度都幾快，所以事前店員有禮地叮囑要快啲食，如果唔係影相影耐咗嘅話白熊個鼻就可能會塌落嚟。

後尾先知，原來呢間甜品店係由藝人楊秀惠同佢朋友合資架。

[Go Inside Kitchen] 牛西冷豬鞍架煎得唔錯

嚟到位於觀塘嘅時運工業大廈，係一棟頗有歷史嘅工廈。試試五樓呢間Go Inside Kitchen，行出lift就見到呢幅人造草坡牆。


入面啲檯櫈係木為主，既簡約又清新。


避開咗午餐時間，當日就只有兩三檯食客。


餐廳仲有戶外座，走出去睇睇，係舊區樓景，仲不時見到經過嘅地鐵列車，由於附近樓宇唔高，加上有一段距離，景觀都算開揚。


聽講餐廳有聘請聽障或弱聽人士，所以餐牌內附有簡單嘅手語圖表，制服上亦會有所識別，不過當日似乎唔晌度。


餐廳有八款午餐，價錢大約六十至百多元不等（未計加一），包餐湯、主菜同餐飲。另有個二百多元嘅二人餐，除餐湯、主菜同餐飲外，仲有埋甜品，好似比較抵食，可惜當日嘅選擇唔太合心，咁叫返午餐啦。


每檯都有一樽水，可以自己斟。


蒜蓉法包，蒜蓉醬搽得唔多唔少，烘脆後更惹味。


甘筍湯，質感滑溜，飲落清甜。


我哋仲加錢試埋田園沙律同喜馬拉雅山岩鹽溫泉蛋，田園沙律，黑醋汁酸香，都幾開胃。


喜馬拉雅山岩鹽溫泉蛋，無唔討好嘅腥味，可蘸蒜蓉法包嚟食。


新鮮空運澳洲西冷伴紅酒汁，餐牌指西冷扒足有八安士重。


平時食牛扒大多數揀五成熟，朋友呢次就大膽地揀咗四成熟（Medium Rare），的確令我有啲意外，我問佢唔怕太生咩？朋友淡然回應煎好上檯前有段小小嘅閒置時間，扒內餘溫會將肉再煮熟啲啲，加上我影相又會再花啲時間，所以聽落又好似有啲道理。切開後嘅生熟度對我嚟講可接受，西冷扒牛味突出，鬆化易嚼，紅酒汁唔濃，但夠味。


西班牙黑毛豬鞍架伴蜜糖蘋果汁，每日限量八份。


黑毛豬鞍架外層煎得焦香內仍有肉汁，肉厚爽嫩唔癡牙。蜜糖蘋果汁微甜，蘋果味唔明顯，不過配豬鞍架一齊食就可以減輕膩感。伴碟嘅配菜有茄子、翠肉瓜、甘筍仔、椰菜等等，炒得甜香有蒜味，薯格亦頗脆口。


女仔就係鍾意食甜嘢，聽講餐廳晌下午三點左右有個$68一位（未計加一）嘅甜品下午茶，可於限時內任食十多款甜品，另包一杯餐飲，不過我哋已經食得有啲飽，無力迎戰。最後只係散叫咗麵包布甸同法式焦糖燉蛋，兩個都係的的骰骰。麵包布甸，麵包吸滿吉士蛋漿，同埋混入咗提子乾，溫度暖暖哋，甜度唔高。法式焦糖燉蛋，焦糖薄身唔苦澀。


餐飲方面加錢改配Cappuccino同Latte，拉花唔算出色，但因餐廳唔係專門飲咖啡嘅咖啡店，所以都可接受。

餐廳嘅食物味道鹹味唔重，對女仔嚟講感覺較健康，扒亦煎得唔錯，處理得宜。不盡完美嘅係，當日啲碟嘅邊緣有啲撞花咗。

[大井町日式放題] 有賣相有味道

呢間日式放題係晌集合唔少食肆嘅大鴻輝中心，上網見其他人分享出嚟嘅相，睇落好似唔錯，就決定嚟試試。


星期日至四晚市$238，星期五、六及公眾假期$258一位（未計加一），任食兩小時。


新開無幾耐，裝修陳設都非常新，呢晚同朋友坐晌靠窗嘅卡位，比一般嘅雙人檯較有私人空間，啲檯櫈亦無擺放得太過擠迫。


坐底之後，首要係爭取時間剔食物。


order紙以類別區分，包括有前菜、燒物、炸物、一品料理、蒸焗、卷物、壽司軍艦同刺身。食物雖然係常見款式，但總算我想食嘅都有，而且都係大多數食客鍾意嘅嘢。嚟之前見網上唔少人話海膽係任食嘅，不過order紙上無呢個選擇，詢問侍應後得知原來近期已換成牡丹蝦。


店內仲設有自助區，先係前菜沙律，分別有粟米粒、車厘茄、羅馬生菜、雜菜同鮮雜果，另有胡麻汁同和風汁調味。


自助飲品就有罐裝、盒裝同樽裝之分，除咗常見嘅可樂、七喜外，仲有道地系列如烏龍茶同柑桔檸檬等，就連韓國Lotte嘅忌廉溝鮮奶都有提供，略為點算之下當晚就有十數款唔同口味嘅飲品，較配額發放飲品嘅放題餐廳落重本。


另有自助斟嘅雜果賓治、蘋果汁、橙汁同竹蔗茅根等…


連餐後甜品都有，分別係水果類嘅西瓜、菠蘿、哈密瓜同各式凍餅奶凍等。


我拎咗熱情果汁，挺消滯，朋友就飲烏龍茶。


然後就拎咗罐忌廉溝鮮奶，第一次飲士多啤梨味，又唔錯啊！！！


無幾耐，我哋第一輪嘅嘢食陸續送來。

刺身我哋試咗鱆紅魚薄切拌柚子酢、牡丹蝦、三文魚、吞拿魚、帶子同玉子，賣相頗吸引。


鱆紅魚薄切拌柚子酢，切得透薄嘅鱆紅魚，配上凝固成啫喱狀嘅柚子酢，味道酸酸哋，食味唔錯。牡丹蝦，蝦身大而肉厚，頗彈牙。其他刺身如三文魚幾肥美、帶子就爽口、吞拿魚無難以咀嚼嘅筋位，但玉子較硬身同冰感稍重。


我哋原本怕壽司太大，於是只剔三款小試，發現實物都幾的骰，即係話下輪可以放膽剔多幾件。燒和牛壽司，牛肉燒得頗香口。蔥花吞拿魚腩海膽壽司，一口兩件都唔膩。魚子醬拌赤蝦壽司，赤蝦味道稍淡，魚子味唔濃，不過壽司飯就幾香甜。


軟殼蟹手卷、海膽手卷，由於食物差唔多係一併上，所以放咗陣先食，紫菜爭咗啲脆度。


天婦羅就試咗虎蝦、一口番薯、南瓜、冬菇、日本青椒仔，炸皮薄薄脆口兼熱辣辣，當中以一口番薯最為香甜美味，日本青椒仔就有微微辣勁。


芝麻雞翼，炸得外脆內富肉汁，幾惹味。


再來第二輪，呢次刺身就試咗北寄貝、赤貝，我哋都覺得赤貝比北寄貝鮮味爽口，另外就encore咗第一輪食過覺得較突出嘅鱆紅魚薄切拌柚子酢、牡丹蝦同帶子。


柚子醬拌油甘魚腩壽司，酸香嘅柚子醬有中和作用。火炙左口邊壽司，入口即溶。火炙三文魚腩壽司，帶焦香。花之戀壽司，我幾鍾意滿滿沙律醬嘅感覺。


和牛卷，鋪上鮮芒果同牛油果片，食落清新唔膩。青瓜鰻魚反卷，鰻魚肉鬆化。芝士辣味三文魚卷，三文魚嘅味道被芝士蓋過咗。


芥辣八爪魚軍艦，辣度夠但唔嗆。龍蝦沙律軍艦、明太子沙律軍艦，食味中規中矩。


然後仲試埋燒物、一品料理、蒸焗類食物：鹽燒海蝦，蝦身屬中小型，唔太彈牙。鹽燒鯖魚，燒得香口，加入檸檬汁後更美味。燒羊架，主要以鹽同黑椒調味，既厚身又唔乾身，羊羶味可接受。燒菠蘿，甜香多汁。


日式海老湯，湯頭清澈，蝦味卻非常濃郁，飲完都無太重嘅口渴感。清酒煮蜆，湯有酒香，蜆肉彈牙，其中幾隻有啲沙，但尚可接受。


帶子北海燒，醬汁內混入洋蔥粒等等，有芝士香。


味噌焗蠔，焗後嘅蠔肉偏細，味噌非死鹹，反而係滿口甜味。


紅酒燴牛舌，外表唔出眾，不過牛舌燴得軟腍，食味討好。


鐵板牛柳粒，肉質鬆化唔韌，但某幾粒較淡、某幾粒就較鹹。


貪得意之下試咗迷你男爵薯餅，事後從網上得知原來男爵係馬鈴薯嘅其中一個品種，混入日式咖哩調味，都幾有趣。


一向對日式放題所提供嘅甜品期望唔大，當晚就只晌自助區拎咗其中兩款，綠色奶凍，我估計係青蘋果之類嘅口味，質感較紮實，味道唔太突出。


雪糕係知名嘅Dreyer’s同Movenpick，每人限揀一份。平時我大多數會食Movenpick，不過因為未試過Dreyer’s嘅迷你雪糕批，所以就揀咗佢，當晚係日本宇治抹茶黑糖同呂宋芒果味。

食過唔少日式放題，總結嚟講佢哋嘅刺身同壽司質素唔錯，以鱆紅魚薄切拌柚子酢、牡丹蝦、帶子較出眾。嘢食嚟嘅速度算快，食物亦算嚟得足，當晚亦無漏單情況，只係第二輪刺身（牡丹蝦同鱆紅魚）數量倒轉咗，但問題唔大。另外侍應都幾勤快，會不時走嚟收碟同換碟。