[Griller Spot] EMAX變outlet

行咗陣outlet，之後就去附近嘅Griller Spot食晏。


入面有啲型格扒房嘅感覺，而且設有露天座。我坐咗晌窗邊，透入咗啲自然光，加上唔係工作日嘅關係，餐廳人流唔多，都幾舒服。


叫咗份墨西哥奄列，伴碟有馬鈴薯沙律、番茄沙律、牛油果片同酸忌廉，都幾豐富。


初初以為係蛋皮包住食材嗰種奄列，實際上係用墨西哥薄餅捲起炒蛋，入面嘅蛋炒得算嫩滑而帶輕輕甜味。可以同埋酸忌廉一齊食，又或者配牛油果片同兩款沙律。番茄沙律入面有紅洋蔥粒，馬鈴薯沙律就係炒過嘅連皮馬鈴薯同洋蔥，香口得來油份尚可接受。呢個lunch嘅蔬菜比例幾多，酸忌廉等亦令佢變得惹味少少，算係比食紅肉白肉來得健康。

[Portobello] 隱世村屋西餐

呢日同人踩車去大圍，無論去邊一區前都會睇下有乜餐廳啱食，見到呢間係新開嘅，咁就去食吓。

餐廳位於顯田村其中一座村屋，該處並唔係大圍市中心地段，所以都可以叫做隱世。村屋側面牆上畫咗啲手繪，都幾顯眼。


餐廳嘅正面，同時可以見到佢哋嘅露天座。


入口經過細心佈置，以同區嚟講可謂非常少見。


午餐嘅選擇就得四款，同埋只有主菜，配餐湯、沙律、餐飲等都要額外加錢。


入到去就見到半開放式水吧同廚房，然後就係幾張雙人檯，不過上一層都仲有位。


甘筍湯，質感非常非常非常濃稠，好似全部都係甘筍蓉咁，飲到嘅係天然香甜味。


裙子牛扒配蔬菜沙律，都係第一次聽裙子牛扒（skirt steak）呢樣嘢，自己上網睇先知原來呢個部位係晌牛胸骨上薄而長身嘅側膜橫肌，網上資料話全隻牛只得兩公斤左右。

裙子牛扒嘅油脂分佈較密，食落嫩滑易嚼，牛肉味濃郁兼齒頰留香。伴碟嘅沙律就有櫻桃蘿蔔、菠菜、紅菜頭等蔬菜，可以中和肉類帶來嘅膩感。


牛冧肉配薯條，同樣揀咗五成熟同配餐廳自家調配嘅蘑菇汁。牛冧肉肉厚鬆化，仲有少少焦香。醬汁入面加咗原粒黑椒等等，惹味得來又無搶走肉味。薯條厚切同較扁平，不過炸得唔夠乾身唔夠脆。

熱檸檬茶，採用高身嘅透明杯，從側面睇都幾靚。


Latte，有拉花真係意想不到，而且一啲都唔馬虎。面層奶泡打得綿密，奶味幾濃郁。

[Backyard] 溫室用餐

荃灣愉景新城旁邊嘅中染大廈，翻新後改頭換面咁，感覺比從前高檔。當中有唔少新進駐嘅餐廳，我哋去試咗地下嘅Backyard。


位處熙來攘往嘅馬路旁邊，餐廳裝修卻令人有種置身晌溫室嘅感覺，檯上仲鋪咗磁磚，令成個環境顯得唔單調。


烤雜菜沙律，烤意大利黃瓜青瓜配上火箭菜、車厘茄、生菜、黑醋汁等等，口感爽脆清新。


是日餐湯係粟米湯，同其他地方嘅有少少唔同，每口都飲到打碎咗嘅粟米粒，都唔錯。


德國鮮肉腸蘑菇薄餅，搓成橢圓形，餡料有德國鮮肉腸、蘑菇同番茄，配上芝士、羅勒同番茄醬，餅底仲係我偏好嗰種脆如餅乾嘅質感。


烤美國安格斯牛肉眼扒配燒汁，生熟度揀咗五成。餐牌指呢塊安格斯牛肉眼扒足有八安士重，咀嚼起嚟軟腍鬆化，頗有油香同烤香，底下仲有椰菜花、薯粒同彩椒。


我哋叫咗咖啡，既提神又可以消滯，餐廳提供嘅係外型有啲似小石嘅白方糖同啡方糖。


試埋呢個上網睇話只限荃灣分店先供應嘅紅菜頭田園三文治配薯條。


三文治嘅桃紅色好吸引，麵包厚身，顏色主要係來自紅菜頭汁，稍稍烘到微焦，食落鬆軟而富彈性。中間分別夾咗烤芝士、煙火腿、番茄片、生菜絲等等，同埋搽咗沙律醬。薯條就灑咗辣粉、香蔥同煙肉碎，蘸芝士醬嚟食都幾惹味。味道OK，但份量非同小可，一個人嘅話單叫呢個都夠。

[焱丸水產] 回味甲羅燒

位於尖沙咀嘅馳名浜燒店焱丸水產成日爆滿，人氣極旺。佢哋近日晌銅鑼灣開業，就趁知道嘅人暫時唔多未有人潮之前去試試。


入面係濃濃嘅日本風裝修。


令人有種身處當地嘅錯覺。


當中最特別嘅係呢個高台榻榻米，我等港人唔習慣雙膝跪地坐，餐廳就特登晌坐位下方開咗個大窿，令食客可以放對腳晌入面，咁就可以輕鬆咁坐，遠睇又有恍似跪坐嘅效果。


叫咗杯巨峰啤酒同朋友share，甜香得似係果汁咁，味道討好，幾啱女仔飲。


三文魚牛油果酢漬，切粒三文魚刺身、牛油果、豆苗、櫻桃蘿蔔、車厘茄、昆布同雜菜等，拌勻後食醬汁既酸香又有黑胡椒味，都幾開胃。


關脇三點盛刺身，伴碟好靚。油甘魚厚切鮮味、帆立貝極為香甜、三文魚肥美，芥末蓉有少少辛口但唔嗆鼻。


嚟呢度當然要試埋浜燒，檯上面有唔同嘅調味料如日本醬油、鹽、七味粉等等。

之前上網睇佢哋嘅活海產係由日本直送，但我哋唔係太識點燒，好彩店員會不時走嚟協助，食材先無被我哋浪費。


鮑魚殼燒，鮑魚晌碟上翻來翻去，好似想逃走咁。


連殼放晌氣體爐上受熱，開初嗰陣不斷轉動，生猛度滿分，不過都幾殘忍。


燒至尾段，店員幫忙將肉同殼分開，肉質剛好有嚼勁。


焱丸蟹噌甲羅燒、南瓜蟹肉甲羅燒，蟹殼入面放滿蟹肉、蟹籽、蟹膏、鵪鶉蛋同香蔥，另一款就加多咗南瓜蓉。燒嘅方法係連殼放晌爐上，再將啲食材撈成糊狀，途中要不時攪拌以防黏底。


焱丸蟹噌甲羅燒，燒嘅過程中已傳來陣陣誘人甲殻焦香。用匙羹舀嚟食，濃郁嘅鹹鮮晌口腔游走，極極極甘香美味，確有種令人一食就想番尋味嘅魔力，膽固醇呢三個字已暫時拋諸腦後。南瓜蟹肉甲羅燒，味道分別唔大，只係質感較黏同軟滑，相對起來心理上好似少啲罪惡感。

[盈福28] 飛甩老土 呃like點心

之前見到盈福28晌銅鑼灣開業時已經好想去試，最近佢哋晌馬鞍山開分店，對於新界人嚟講就方便啲啲。


門口仲放咗幾個祝賀新張嘅花籃。


佢哋係以新派中菜做主打，裝修都好摩登，比平時啲中菜館多添幾分活力。


雖然走新派路線，但同好多中菜館一樣都幾要俾茶位。佢哋提供嘅係玄米茶，入口甘香。


從店舖用色到餐具，都係同一個色調。


翻開餐牌，最最最吸引我嘅應該係呢啲可愛造型嘅點心系列。


除咗點心，仲有其他小菜同甜品等等，款式同樣係比較新派風格。


先試幾款精緻嘅涼拌小菜，包菜鴨卷，用椰菜包住切條鴨肉、雞髀菇、甘筍同青瓜，再淋上酸香嘅醬汁，味道有啲似平時同燒鴨一齊食嗰種酸梅醬，加埋紫椰菜絲，口感爽口而清新。


雷椒茄子，用咗辣椒、青辣椒、蒜頭等等調味，味道香辣可口。


丘比皮蛋豆腐，顧名思義特製醬汁係用丘比出品嘅沙律汁調配，食起嚟帶點芝麻香。每片豆腐切得薄而平均，盡顯廚師刀功，入口滑溜，配上皮蛋粒、香蔥等等，幾惹味。


然後就試呢隻玉桂香鴿，size比沙田馳名老店偏少，不過每隻只賣三十幾元左右，價錢算比較平。啱啱拎到嚟時已飄來陣陣香氣，乳鴿皮炸得脆口，肉嫩唔過肥，肉汁多而鹹香，表現唔遜於馳名店。


當然唔少得我最期待嘅點心，好唔容易先晌眾多款式中揀咗三款最想試嘅。花菇松露，將包子外皮塑造成花菇模樣，都幾維妙維肖。咀嚼起來鬆軟唔癡牙，餡料係花菇粒，當中仲有黑松露，味濃討好。


紫薯喵星人，賣相非常可愛，唔忍心將佢食落肚呢！掙扎咗陣先捨得咬一啖，內層嘅紫薯蓉甜味啱啱好。


奶黃蜜語，表面印上叻叻豬同講呢D等等港式潮語，不過係隨機發放嘅，當日我哋呢籠係三款唔同造型嘅emoji。中間極為流心，好有奶香同蛋黃香。


附上三款點心嘅橫切面，以餡料嚟講奶黃嗰款雖然比較常見，但就最適合拎嚟影相呃like。