[Bondi] 工廈西餐

想試荔枝角嘅Bondi好耐，呢次終於去食喇，佢其實係同程班長晌同一層。


由餐牌中得知店名Bondi係澳洲其中一個海灘，亦係店主長大嘅地方，所以店內不乏同澳洲有關嘅佈置，其中一面牆更畫咗樹熊圖案。


去樓上餐廳都鍾意坐窗邊，可以邊食邊擔天望地，感覺較自在。不過地面餐廳就視乎情況而定，如街道上人流較多就唔會揀窗邊。


餐牌係佢哋自己印製，睇落都算鮮明。


飲品嗰張嘅排版好似仲幾可愛。


呢日試廚師推介入面嘅意大利飯，可加$28配餐湯或沙律同飲品。

沙律，蔬菜爽脆，當中有較濃味嘅火箭菜，而蟹柳就偏向扎實。


麵包，經烘至微暖，質感鬆軟帶牛油香。


蟹皇意大利飯配軟殻蟹，碟邊用黑醋、辣椒粉同黑芝麻點綴。


侍應事前仲特意提醒，話佢哋嘅廚師會將意大利飯煮到七成熟左右，口感上比較硬，我嘅接受程度較大，就回應無問題。米粒表面輕輕沾有蟹皇汁，質感確係外軟內偏硬，呢種嚼勁對我而言都幾有趣，但對某啲人來講可能會覺得生同咀嚼費時，所以事前記得要同侍應講好自己嘅喜好。

米粒間嘅枝豆甚有咬口，軟殻蟹表面就蘸咗炸漿，食落香脆。


最後我仲揀咗Flat white，係一款奶泡較Latte同Cappuccino薄嘅咖啡，事後晌網上得知呢款咖啡係源自澳洲。


奶泡打得綿密細膩，咖啡味唔濃，過吓咖啡癮都唔錯嘅。

呢度嘅侍應會不時走嚟加水同收碟，而且無論日頭定夜晚都係唔收加一服務費。