[Grand Restaurant & Bar] 色彩豐富

行咗陣新蒲崗嘅Mikiki，去咗近日新開嘅Grand Restaurant & Bar食嘢。

有一排落地玻璃窗，透光度足，感覺唔錯。

其中一面牆上掛咗人造植物裝飾，漂亮雅致。


午餐時間嘅套餐價錢晌六十多至百多元之間，已包括頭盤或餐湯、主菜、甜品同咖啡或茶。以呢種裝修嘅西餐廳來講，都算合理。


另外，仲有本散叫食物同晚餐餐牌。


呢本嘅菜式就附有圖片，對我來講會較有概念。


揀咗幾款食物試試，侍應就拎咗麵包嚟。呢日係墨魚汁芝士包，另配黑醋橄欖油同牛油，麵包經烘暖，質感外脆內軟，芝士味濃郁。不過要趁熱食，因為我撕咗幾啖後放低一陣，再食時溫度已稍涼，口感就顯得較硬身。


近日若見到間嘢有提供Mojito嘅話，就想叫嚟試試。外表平實，薄荷味算突出，但無乜青檸同酒香。如果青檸汁可濃郁少許，以及再加多啲啲鮮薄荷葉嘅話，視覺同味覺上可能會更吸引。


煎帶子番茄啫喱配青碗豆醬，帶子煎得外層焦脆、內層彈牙，青碗豆醬味清新，番茄啫喱酸味天然，係一個無負擔嘅頭盤。


紅菜頭意大利飯，佢嘅鮮粉紅色係來自紅菜頭本身，非常吸晴。意大利飯煮得外濕潤內仍帶點咬口，硬度就比傳統嘅腍，我估係為咗遷就香港人嘅口味。飯內拌入紅菜頭粒、洋蔥粒、雜菌同芝士等，上面就有鹹香嘅羊奶芝士同車厘茄，食味酸甜不膩。

最後仲試埋甜品，燒棉花糖牛奶朱古力配士多啤梨雪葩，用食用花、士多啤梨醬同脆脆朱古力珠點綴，賣相足以令相機食到飽。士多啤梨雪葩碎冰比例較大，冰感非常重。鮮士多啤梨食味甜美，棉花糖燒得外焦香內綿軟。牛奶朱古力質感近似Chocolate Truffles，甜度適中。所有食材拼埋一齊，味道就互相中和。