[Yadllie Plate] 全部都係雞

近日有唔少韓國過江龍炸雞店進駐香港，其中一員係晌當地有超過五十間分店嘅Yadllie Plate。


餐廳位於兆萬中心，lift門一打開就係佢哋嘅接待處。


當晚我哋坐嘅卡位設有電鐘，想叫嘢食或有乜需要時，只要按一按就有侍應嚟，所以一定唔會出現舉手好耐無人理嘅情況。最特別嘅係仲備有USB插頭，可隨時為手提電話充電（首先你要有充電線），對現今都市人嚟講確係頗細心嘅設備。


除有唔同口味嘅手工炸雞外，仲有唔少近日大熱嘅韓國菜如部隊鍋、芝士排骨等等，所有菜式均附上參考圖，選擇起來就更方便。


侍應拎咗碟前菜嚟，分別係酸蘿蔔、沙律同紫菜絲。酸蘿蔔食落甜甜酸酸，有啲似中式嘅醃子薑。沙律入面有切粒蘋果、胡蘿蔔、青瓜、馬鈴薯等等，都幾開胃。


之後就試咗啲小食，韓式雞蛋卷，將煎蛋包著蟹籽同芝士，上面仲淋咗番茄醬，旁邊亦附有黃芥末醬蘸點嚟食。咀嚼時可以食到蟹籽嘅卜卜脆口感，惟芝士味唔太突出，蛋煎得唔太滑溜。


脆炸雞腎，用咗特大木製沙律碗盛載，底下仲墊咗大量可食用嘅米條，賣相就好似鳥巢咁，初初係有啲被嚇倒，因為參考圖用鳥瞰角度影，我仲以為會用普通扁身嘅碟呢。點餐時侍應會詢問要辣或唔辣，我哋對自己嘅食辣程度幾有信心，於是就決定試試辣嘅。辣版採用韓國青陽辣椒，估唔到頗有辣勁，雞腎則非常爽口，兩者表面炸漿唔太厚，且炸得乾身無多餘油份，都幾惹味。但辣版嘅辣度非同小可，如平日唔食辣或只食到BB辣嘅人士，建議揀唔辣嘅版本為妙。


來到手工炸雞，依餐牌所講，雞件係用蔬菜等廿多種材料醃製四十八小時以上，再撲上薄薄嘅乾粉，並以雙重壓力油炸技術去炸，更能鎖住肉汁之餘，外層嘅乾粉亦比炸漿吸少啲油，相對起來就健康一啲啲。

原想試比較特別嘅乳酪窩夫炸雞或棉花糖作料炸雞，但同行朋友唔太接受到明明係甜食嘅嘢同炸雞走埋一齊，只好試較為基本嘅口味。

半半炸雞，揀咗蔥絲炸雞同大邱辣醬炸雞，仲有薯條同車厘茄伴碟。睇落雞件體積略細，蔥絲炸雞外層沾有帶甜香嘅醬汁，外皮微脆，肉嫩香口。大邱辣醬炸雞就有一至五級辣度，分別係膽小、入門、滋味、地獄同後悔級，我哋呢次就較保守，試咗屬第三嘅滋味級，同樣係先食到帶甜嘅味道，隨後先慢慢透出辣味，且於口腔內維持一段時間，都幾刺激味蕾。

呢次唔覺意咁配搭咗親子系列，連食三個雞類菜式呢。