[華園餃子館] 某啲菜式可以

晌呢頭買少少嘢，咁就去咗附近間華園餃子館食晚餐。時間尚早，坐低時只有我同朋友，之後就愈來愈多人。佢哋牆上貼滿菜式嘅照片，似係另類牆紙咁。


麻辣豬肚絲，爽口辣味適中，底下仲有啲青瓜絲。拍青瓜就用咗蒜蓉等調味，爭咗啲酸味，味道較為單調。


麻辣拌涼麵，佢哋晌涼麵灑上蒜蓉同蔥，配料比想像中單薄，麵條煮得彈牙，不過我明明揀咗中辣，食落卻一啲都唔辣，反而甜豉油嘅甜味更突出，綜合嚟講感覺一般。


十三么淨水餃，呢個係佢哋嘅馳名之物。一碟十四隻，可以一次過食晒佢哋十三款水餃，其中一款就隨機重複。款式為津白鮮肉、韭菜鮮肉、白菜馬蹄鮮肉、金玉滿堂鮮肉、香芹鮮肉、番茄鮮肉、西洋菜鮮肉、番薯苗鮮肉、南瓜鮮肉、茴香鮮肉、韭黃鮮蝦鮮肉、京蔥羊肉同青素水餃。


原本想逐一影相，咬開後發現其中幾款餡料嘅外觀分別唔大，所以隨意咁影吓就算。佢哋嘅餃子皮算薄，蔬菜同肉類比例大概係一半半，當中以津白鮮肉肉汁最豐富、白菜馬蹄鮮肉較清新、南瓜鮮肉甜甜哋、香芹鮮肉較爽口、韭菜鮮肉味濃、青素水餃內有木耳粟米胡蘿蔔等。而韭黃鮮蝦鮮肉蝦味唔突出、西洋菜鮮肉過於苦澀，其他嘅就印象唔深。

感覺上某啲菜式味道算可以，某啲就一般般。