[風車] 性價比?

呢次就去咗風車食下午茶。


近期呢區開咗唔少餐廳，其中幾間嘅類型晌原區算少見，而呢間就係以西餐廳式酒吧作賣點。


呢邊係唐樓為主，所以街舖樓底都好高。入面係普遍西餐廳嘅裝修，中間有盞水晶吊燈，某啲燈光呈酒吧風格嘅藍色同紫色。面街嘅落地玻璃窗以花紋玻璃紙遮蓋，日頭時可從中透入自然光，唔似得一般密封式酒吧神秘，卻又有啲隱約嘅感覺。


下午茶嘅餐飲我揀咗凍水果茶，茶味算濃，當中有淡淡嘅果香，不過就未能分辨出係乜嘢生果。


水牛城雞翼配辣番茄醬，有別於其他餐廳嘅水牛城雞翼，呢度係表面無沾醬嘅版本。雞翼表面蘸咗調味粉等等再炸，炸得香而唔算過份油膩，外皮脆口肉嫩滑富汁，而且本身已有調味，單食都已經夠鹹。辣番茄醬入面有番茄、洋蔥同香草，味道酸酸哋，當中夾雜辣度，唔知係我太食得辣定其他原因，呢個辣度對我嚟講輕微得似有還無，但用佢配雞翼都算惹味嘅。

呢份下午茶加一之後要四十幾蚊，其實餐廳嘅午餐只須四十幾蚊起（未計加一），已包餐湯或沙律、主菜、餐飲，相對起來性價比好似較下午茶餐高。另外，餐廳冷氣非常非常非常強勁，前往嘅話建議多帶外套披肩作保暖之用。