[美味餃子店] 湯餃相對健康

同朋友去咗食美味餃子店，湯餃揀咗雲耳椰菜肉餃拼白菜肉餃，大小算歸一，形狀就有啲唔均勻，應該係放湯煮嗰陣煮到變咗少少形，係非常隨意嘅手作感。

餃皮厚薄適中軟熟，蔬菜比例較多，我都幾鍾意呢種菜比肉多嘅餃子，佢嘅調味唔濃但夠味，肉餡鬆化而冇較難咀嚼嘅肥膏，白菜清新討好，雲耳椰菜脆身同較濕潤多汁。湯底係野葛菜煲生魚豬骨湯，都飲到少少魚香，飲完亦冇口渴感，感覺唔錯。

凍豆漿，聲稱係佢哋自家製作，甜度唔高，豆香唔重，純粹為解暑。

同朋友分別食過煎餃同湯餃，感覺上煎餃比較美味，但就較熱氣，湯餃就可同時飲湯同相對較健康。