[Ocio] 梳化位較窄

餐廳位於人流唔多嘅街道末端，湖水藍嘅門面令佢顯得突出。


門外放咗個小熊木雕像。

半自動門上嘅圖案，唔知係咪店主嚟？！？！


入口旁邊嘅角落。


不乏用小熊為題嘅擺設。


呢度樓底幾高，無乜侷促感。


裝修係而家流行嘅工業風，好處係陳舊咗、污糟咗都唔會太突兀。


座位分佈晌店嘅左右兩旁，全都係一邊梳化卡位、另一邊就係木椅嘅配搭，可能為咗慳位啦，啲梳化卡位比平常窄接近一半，坐晌上面嘅話腰背都必須保持九十度角姿勢，感覺唔太舒服。

抬頭望，近天花位置有塊長形黑板，上面畫咗可愛嘅公仔。


翻一翻單點餐牌，色彩斑斕嘅插畫同排版，就似晌度睇緊小朋友嘅故事書咁。


佢哋仲會不時推出限定新品，例如係呢款近期大熱嘅比卡超造型甜品。


下午茶餐牌係水彩風手繪設計，都幾靚。


我揀咗睇落比較特別嘅紐約芝士窩夫，用唧花忌廉同威化雛菊點綴，賣相討好。


窩夫質感軟腍，唔脆口唔涸喉，食落芝士味唔濃，甚至似係原味，主要用上面分佈得頗隨性而微鹹嘅忌廉芝士調味。旁邊附有稠身稍甜嘅糖漿，杏仁雪糕底下墊有瑪莉餅碎嚟固定，並灑上杏仁脆片，食味有淡淡奶香，偏向冰感。


下午茶餐仲包括飲品一杯，簡單地配咗即磨咖啡，同甜嘢一齊都算唔錯。

嘢食唔算出色，亦唔算差。不過以甜品、咖啡作招徠嘅餐廳，晌呢個舊區嚟講都算係賣點嘅。感覺上下午茶嘅性價比會較高，只係梳化卡位唔太舒適。