[Kiss The Tiramisu] Pick Me Up

韓國過江龍雪糕店登陸香港，首兩間分店唔係位於市區，而係同屬新界區嘅屯門同沙田。有聞佢晌韓國當地人氣強勁，香港店剛開業時仲大排長龍，呢日就同朋友一齊嚟朝聖。


晌服裝店旁邊，門面裝飾令佢更顯眼。當日仲遇啱非繁忙時間，無乜人唔洗排隊。


香港店暫時只賣三款Tiramisu軟雪糕，分別係原味、士多啤梨同香蕉味。


收銀處旁邊展示咗三款口味嘅樣本模型，睇落份量都唔少，同同類型甜品店相比，定價四十幾蚊都算合理。


店員用心製作中，睇住軟雪糕嘅整個誕生過程，都幾興奮。


我哋三個人剛好可以試晒三款口味，所有軟雪糕都係用透明金邊紅酒膠杯盛載，單係外表已經好貴氣。

原味Tiramisu軟雪糕，實物賣相同樣本大同小異。


軟雪糕質感嫩滑，奶味唔重，不過溶化得較快。上面灑上可可粉同即磨朱古力碎，下層係混有咖啡酒嘅餅乾碎同忌廉芝士，店員建議同軟雪糕拌勻嚟食，咁樣就有啲傳統軟身版Tiramisu嘅感覺。味道唔錯，但記住唔好食得太急，否則可能會被可可粉嗆到。


士多啤梨Tiramisu軟雪糕，同樣係上層軟雪糕、底層忌廉芝士，不過就不含咖啡成分同淋上士多啤梨醬點綴，中間嘅士多啤梨醬就混有士多啤梨果粒，酸甜恰好，味道平衡。


香蕉Tiramisu軟雪糕，亦係無咖啡嘅口味，軟雪糕上嘅係香蕉醬，中層夾著頗有咬口嘅香蕉乾碎，然後係忌廉芝士，惟甜度稍高。

三款口味之中，我最欣賞原味Tiramisu軟雪糕，唔好咖啡嘅人士就可按喜好選擇士多啤梨或香蕉味。

事後睇過佢哋嘅網站，得知韓國嗰邊仲有芒果味同抹茶味，希望將來香港分店都會推出呢兩款，甚至更多更多新口味啦。