[Cafe Sausalito] 抖抖

晌深水埗行咗陣，就去Cafe Sausalito抖吓，呢度個樓底好高，都幾舒服，同埋好唔深水埗嘅感覺。

Blueberry Cheese Cake，忌廉芝士同藍莓醬酸酸甜甜，餅底雖然厚不過唔會一岩一忽，食落都算滑。

Latte，個拉花雖然唔係好仔細，不過飲到尾都無散開，佢個奶味重得嚟又有少少咖啡嘅烘焙香。

坐吓抖吓，都唔錯嘅。

[第一城冰站] 過口癮雞蛋仔

去到附近口痕痕，晌第一城冰站買咗份雙拼雞蛋仔，我揀咗香芋拼芝士，前者係貪佢嘅顏色，可惜當日從外觀嚟睇紫色唔突出，反而撕落嚟之後先見到入面係深紫色。雞蛋仔食起來蛋香稍遜，慶幸外脆內有彈性，但就感受唔到香芋味。



芝士口味唔算非常非常濃郁，除頭幾啖較明顯外，再食落去就好似同原味雞蛋仔差唔多。

呢排食過唔同食店嘅雞蛋仔，綜合而言呢間唔算出眾。不過以花臣類雞蛋仔嚟講，一份唔洗廿蚊，都算係想過口癮時嘅選擇之一。

[古朴年代咖啡．酒館] 裝修係賣點

之前已經去過古朴年代咖啡．酒館，朋友就未去過，咁就同咗佢哋去食。

 古朴總匯A，有班尼迪克蛋、法蘭克福腸、紐倫堡腸、德國牛仔腸、煙火腿、焗豆同薯蓉。我記得之前係薯餅嚟，不過今次係薯蓉，我都係鍾意薯餅多啲，唯一慶幸個班尼迪克蛋都幾流心，冇咩太大改變。其他配料都正常，不過拎到嚟時已經唔係好熱。

 英倫雪糕窩夫配鮮果，唔明點解明明係甜品都會有沙律跟埋，可能因為呢份係午餐啦。雪糕就揀咗曲奇味，個窩夫食落都幾乾身同幾硬，感覺一般般。

我哋另外叫咗幾杯飲品，薄荷沙冰、oreo沙冰同芒果沙冰。我哋係一人一杯，oreo沙冰入面有啲oreo餅碎，不過因為都幾大杯，最後我哋都飲淨咗少少。

裝修係賣點，午餐計埋嘢飲嘅話都唔平。