[Choux Creme] 一陣風

久唔久行過Choux Creme都會買件泡芙食吓，因為泡芙食落好似一陣風咁，又唔飽肚又唔怕肥，最啱口痕嗰陣買嚟食。

 買咗芒果乳酪，呢款係我成日食嘅口味。

個原味泡芙都算脆口，中間嘅乳酪忌廉酸中帶微甜，不過鮮芒果肉就太生，好似酸咗啲，唔知點解呢排去邊買親芒果類嘅甜品都係唔熟嘅。

[大阪王將] 抖吓

晌荃灣附近行街，去咗吉之島入面嘅大阪王將食嘢抖吓。

朋友個咖哩吉列豚扒香滑天津飯定食，原本都唔知咩係天津飯，上網search到原來係指蟹肉炒蛋燴飯，係日式中華料理嘅一種，朋友話味道都OK。

 朋友嘅定食仲包埋元祖餃子同豆腐味噌湯，餃子係即叫即煎，食落都幾多汁。

我嘅九州雞扒拉麵，湯底係醬油味，碗仔細細份量唔多，以我嚟講已經夠飽，但係就冇餃子咁好味。

[帝都糕餅店] 甜

晌帝都酒店間糕餅店買咗幾件餅返去同屋企人食。

個盒都幾靚，不過因為太大，返到屋企啲餅已經東倒西歪，好彩都唔算太嚴重，只係整花咗少少。

鮮雜果泡芙，上面係士多啤梨，中間就夾住吉士醬，食落一陣風，兩三啖就搞掂。


美式芝士蛋糕，食落有少少漏。

抹茶慕絲蛋糕，抹茶味都幾出，不過上面嘅糖漿食落太甜，有少少怪怪哋。


黑加倫慕絲蛋糕，呢個嘅味道就比較酸，對我哋嚟講都OK，但就唔太鍾意佢夾雜住朱古力蛋糕。

啲餅賣相係幾靚，不過每款硬係有爭少少嘅感覺。

[瑞記咖啡] 澳門前夕早餐

好早到上環，於是去咗港澳碼頭附近嘅市政大廈食早餐。

同唔少市政大廈大同小異，下幾層係街市，頂層係熟食中心。我事前已經諗咗要食瑞記咖啡，呢度嘅手寫水牌上面銀碼係用坊間幾近絕跡嘅中式數字（花碼）表示，咁樣反而成為咗特色。

奶茶係用玻璃樽裝住，可算係呢度名物之一。因為直接原樽冷藏，所以就唔會好似普通凍奶茶咁被冰塊沖淡本身味道。呢度嘅奶茶奶味較茶味出，甜度對我嚟講適中，雖然唔算驚為天人，不過飲落順滑，都幾OK。

朋友嘅鮮牛肉煎蛋麵，反蛋煎得唔錯，鮮牛肉份量唔少，再配上大光麵，係基本港式風格。

蛋牛包，係呢度另一馳名物，烘脆芝麻熱狗包入面夾住加咗鹹牛肉同蔥花嘅炒蛋，未食已經聞到陣陣香味，惟當日炒得有啲啲燶，鹹牛肉亦唔似人哋啲相咁多到瀉，慶幸乾身得來唔鞋口，蔥花仲令整體更加濃郁，食落討好。

呢度係冇套餐嘅，不過散點嘢食同嘢飲之後個價錢同出面茶餐廳早餐定價差唔多，都算合理。另外食味合格，但又唔算特別出色，順便嚟嘅係OK，如果特登嚟嘅可能會出現期望落差都唔定。

[金坊] 啱胃口

同朋友去咗金坊食泰國嘢。

炸皮蛋球，佢外面包住麵包糠，入面再有層蝦膠，之後先係皮蛋，因為嗰晚係即叫即炸，食落香口。

泰式豬手，呢度同泰國一樣都係起骨咁上，佢嘅豬皮同豬肉鹵得入味同好腍，另外仲有酸菜同鹵水蛋做伴碟。雖然無晌泰國食到嘅咁好味，不過都OK。

燒豬頸肉，上面淋咗酸酸哋嘅醬汁，食落都幾爽脆，下面仲有短身嘅泰國芽菜墊底。

咖哩炒魷魚鬚，魷魚鬚彈牙，咖哩嘅椰汁味唔濃但幾辣，我哋仲用嚟撈飯食。

馬拉盞炒椰菜苗，個椰菜苗同西式細細粒一個個嗰種有啲分別，不過用馬拉盞嚟炒又的確幾香嘅。

冬陰公海鮮湯，湯料有芫茜、南薑、香茅、魷魚、蝦、青口、魚肉、番茄等等，辣度唔強，但飲落酸酸哋又有一陣海鮮香，都算OK。

感覺上呢度唔算特別出色，不過算啱胃口。

[牛一] 趕急

夜晚同家人一齊去咗牛一食日式火鍋放題，嗰日好多人等，我哋攞咗飛等咗成個鐘先入得。

 我哋揀咗清湯底，牛肉同豚肉係order嘅，我哋揀咗極上美國牛肉，肥膏位對我哋嚟講適中，就咁放入火鍋淥一淥就食得，肉質唔韌，都OK。

 豚肉就冇分級，都係切得幾薄吓，不過都算食到肉味，唔係好似某啲日式火鍋放題好似張紙咁。我哋分別order咗幾次牛肉同豚肉，質素都冇話相差太遠。

 其他火鍋料就係自助嘅，有幾款大路嘅綠葉菜、雜菌同肉丸類，仲有盒裝同罐裝飲品任攞。

最後仲斟咗牛奶雪糕嚟食，以日式火鍋放題嚟講都算係咁，係等得比較耐，同埋限時得個幾鐘，食得比較趕同急。

[添記] 中場休息

晌旺角行街行到攰同口渴，於是就晌呢度買咗杯甘筍雪梨作中場休息，我覺得雪梨嘅味道較甘筍突出啲，整體甜度唔高，似乎無加太多糖份之類，飲落清清哋，用嚟消吓暑都唔錯嘅。

[金曼谷泰國餐廳] 大圍泰菜

食過好幾次金曼谷，整體嚟講質素都幾好，唔會大上大落得好緊要。今次我哋兩個就叫咗：

燒豬頸肉，肉質爽口，可以點佢哋隻酸酸甜甜嘅醬汁一齊食。

豬肉生菜包，肉碎唔會炒得太乾太濕，食起嚟辣辣哋都唔錯，不過啲生菜就細塊咗啲，比較難包。

冬陰公，每次食泰國菜都會叫，呢度仲會連埋個爐仔，一邊慶住一邊飲，飲到最尾個湯都仲係熱嘅。

墨魚桶飯，差唔多食晒啲嘢先嚟，墨魚燒到好香，入面就釀咗啲炒飯，都幾惹味。

最後就有份甜品跟埋，係椰汁糕嚟。

[Bro & Sis Yogurt Café] 除乳酪之外

嚟到馬鞍山，去咗Bro & Sis Yogurt Café食brunch。

 frozen yogurt，係夏季限定嘅西瓜味，topping就揀咗綠茶mochi，西瓜味好清新，不過因為frozen yogurt本身有酸味，同偏甜嘅西瓜加埋一齊似乎有啲啲怪。

 卡邦尼意粉，中間放咗粒溫泉蛋晌度，食之前將佢同意粉、煙肉、芝士粉撈埋一齊。雞蛋無腥味，意粉煮得彈牙，不過芝士味唔太濃。

All Day Breakfast，簡簡單單嘅炒蛋、焗豆、香腸同煙肉，都係正常味道，反而想講嗰塊厚多士，面層搽咗蒜蓉香草牛油，我覺得係成碟最突出同好味嘅。

[甜蜜蜜新生咖啡店] 鄧麗君主題餐廳

要出尖沙咀整少少嘢，咁就晌尖東站附近間甜蜜蜜新生咖啡店食吓嘢先。

其實都嚟過幾次，今次叫咗個有公司三文治同咖啡嘅下午茶餐，個三文治入面有蛋、番茄、青瓜、生菜、煙肉，麥方麵包就烘底嘅，有啲偏硬，但餡料就幾多幾豐富嘅。

當時食客唔多，靜靜哋坐吓抖吓都OK。呢度仲不停咁播住鄧麗君嘅歌，仲有好多有關佢嘅精品擺設，佢嘅歌迷應該都會幾鍾意呢度。