[Picoso] 與班長為鄰嘅墨西哥菜

上次食程班長嗰陣，見隔離間Picoso一個人都冇，都真係幾大對比。

今次晌冇睇過評語就同朋友去食吓，起初以為店員會係外國人，不過當日全部都係香港人嚟。

菜式選擇唔多，某啲就連埋參考圖，唔洗估估吓，所以今次主要揀有圖嘅。

店內面積唔大，可以話一眼睇晒，所有檯櫈都係高身嗰種，似乎係做外賣為主。佢哋全部食物都係單點冇餐，我同朋友就另外加錢買咗兩罐飲品。

大捲餅（Big Burritos），加錢配咗烤雞肉餡，跟埋一兜仔番茄沙沙（tomato salsa）。感覺上墨西哥捲餅同土耳其卡巴卷大同小異，不過呢個就夾咗豆蓉，仲有洋蔥、番茄、粟米粒、芝士等等，整件都係偏腍身嘅食材，食起嚟冇爽口嘅感覺，但都唔錯嘅。

墨西哥薄餅（Quesadillas），同大捲餅一樣原本都係素食餡，朋友愛食肉，於是又加錢要烤豬肉。我哋都係第一次食呢款嘢，餡料同大捲餅相似，不過就額外跟埋牛油果醬、酸忌廉同番茄沙沙嚟做沾汁，其實佢本身已經有味道，我覺得單食都OK。

香烤豬肋骨，跟埋燒粟米同薯角。粟米燒得都幾燶，好彩豬肋骨幾香口，又冇話燒得太乾身，肉質都幾腍軟，BBQ醬令佢食落稍甜，整體嚟講唔會太膩。佢哋仲俾咗膠手套我哋直接用手食，比用刀叉方便。

我哋冇食過太多墨西哥菜，所以都冇資格講正唔正宗，但以個人味覺嚟講，味道係唔差嘅。只略嫌價錢唔算平，以及座位太高，坐耐咗會覺得有啲唔舒服。同埋佢哋堂食都係用即棄餐具嘅，唔係太環保。

[Uncle Tetsu’s Cheesecake] 便宜水平，室溫較優

來自日本九州、已有廿多年歷史嘅日式芝士蛋糕店Uncle Tetsu’s Cheesecake晌銅鑼灣開業初期，差唔多要排一個鐘隊先買到蛋糕，仲係每人每次限買一個。近月佢哋晌旺角開咗另一間分店，唔知係熱潮冷卻，抑或尚未有知音人知道，當日竟然唔洗排隊，同旁邊堆滿人嘅新開麵包店可謂相映成趣，又可能我遇上人流少嘅時間啦。

聽聞蛋糕晌店內新鮮焗製，亦聽唔少人話買蛋糕嗰陣仲有餘溫。但當日佢哋已經預先將幾個蛋糕放入紙盒同紙袋，估計出爐咗一段時間。話說回來，佢哋嘅紙袋都幾可愛，拎起手晌街行時引來唔少途人目光，盒子設計亦方便保存，仲用咗類似不織布蛋糕紙包裹，防止濕氣沾染蛋糕影響食感。

原味芝士蛋糕，買返去後我直接放晌室溫，綿軟得唔洗咀嚼，入口即溶，呢種質感令我諗起某店嘅半熟芝士蛋糕，不過呢間芝士味比較輕，反而頗富蛋香，我一口氣食四分一以上都唔覺膩。

第二日放咗入雪櫃，質感就變得比之前硬身，食完會有陣牛奶餘香，同一個蛋糕晌室溫或冷藏後食，會有兩個唔同口感。

唔洗六十蚊買到直徑18cm嘅過江龍芝士蛋糕，價錢算係同類型產品中嘅便宜水平。呢次買嘅蛋糕雖然唔係新鮮出爐，但味道同質感仍算唔錯。我覺得室溫嘅味道較優勝，惟偏好芝士味濃人士可能會失望。

[康瑞涼茶] 堂食等太耐

呢晚晌康瑞涼茶食糖水，出面好多人等，晌炎熱嘅晚上企咗成半個鐘先入得。


一坐低即叫嘢食。


凍特色仙草百配，入面有地瓜圓、芋圓、小丸子、仙草、西米、薏米、紅豆、台式珍珠、淡奶同糖水，係豆類同糯米糰嘅配搭。


地瓜圓同芋圓都係佢哋用人手自家製，地瓜圓煙韌微甜，芋圓嘅芋頭味突出。仙草係台灣說法，即係我哋成日食嘅涼粉，因為佢表面非常滑溜，體積切得較大嘅就比較難用匙羹舀起。西米、薏米同紅豆煮得腍軟得來有嚼勁，加咗淡奶同糖水，甜度適中。

食完有涼浸浸嘅感覺，雖然地瓜圓同芋圓唔錯，可惜入座安排有啲混亂，同埋佢哋係即叫即煮，所以出得好緩慢。住晌附近或唔介意晌街上面食嘅話建議外賣，堂食要等咁耐就有啲唔值。

[餃掂] 健康餃子

去旺角行街，原本想食嗰間無開，就同朋友去咗佢食過話唔錯嘅餃掂。門面有啲大陸風，入面裝修新式，睇落幾有規模。牆上面仲貼咗間舖老闆寫嘅營商之道同勵志字句，當中自稱真材實料、路遙知馬力芸芸，有啲就有少少似黎明金句。


叫咗嘢食之後要等一陣，無聊之下從玻璃窗睇到廚房入面嘅姐姐晌度密密以人手包餃子。


檯面放咗樽醃蘿蔔同幾樽調味醬，醃蘿蔔酸香醒胃，我哋都食咗唔少。調味醬之中以加咗豆豉嘅辣椒醬較特別，香而唔死辣。


等咗陣，先嚟嘅係松茸豬肉餃，（無特別要求之下）狀元九鼎湯分開上。


然後就係雙拼餃子（粟米鮮肉餃同雲耳椰菜豬肉餃），呢款係同狀元九鼎湯一齊上嘅。


每粒餃子摺痕均一，包得脹卜卜同扎實。松茸豬肉餃入面嘅肉餡多而帶汁，有輕微菇菌香，仲跟咗一小碟松茸醬。另外嘅粟米鮮肉餃爽口，雲耳椰菜豬肉餃脆口，餃皮唔算厚亦唔太薄，浸晌湯入面一陣都無過腍。整體嚟講三款餃子都無太重鹹度，主要係食材本身天然味。

狀元九鼎湯方面，色澤深並已隔渣，飲落似家常老火湯嘅無添加味道，但又冇浮出一層層厚油，粉葛味好出，非常鮮甜。我哋仲叫咗支黑豆漿，不過唔係自家磨製，而係來貨嚟。

我一向偏見地認為餃子呢類親民中式食物，要晌老牌同無咩裝修嘅食店先好食，所以起初見佢格局新式，仲以為係間食裝修嘅餃子店，但食落又OK。以同類食物而言價錢稍貴，不過佢哋聲稱會將部分收入捐俾慈善機構，雖然唔知係咩機構受惠（最好當然係正式機構），但如果屬實嘅話，做善事當然值得支持。

[Delifrance] 的骰下午茶

有陣時都會去Delifrance食下午茶，今次叫咗迷你牛角酥三重奏，入面夾住煙火腿芝士、火雞同煙三文魚。的的骰骰嘅牛角酥都幾鬆脆，而所謂嘅火雞其實係切肉嗰種，三款餡料都大致正常，跟餐嘅錫蘭奶茶亦頗香滑。

[Wins Goodies] 拿破崙唔錯

同人去開元朗，去咗呢度食個甜品。

海鹽焦糖蘋果餅，賣相好grand，有三層唔同嘅口感，不過食落太甜太漏。

法式拿破崙，呢個係原味嚟，酥皮整得幾扎實，食落鬆化。

法式牛角酥，仲有球haagen dazs雪糕，雖然無拿破崙咁突出，不過都幾脆口。

[il Bel Paese] 食gelato

呢間入面有好多嘢買，我買咗雙球gelato，揀咗開心果同抹茶味，gelato質感一向都係較稠身同唔易溶化，開心果味食起上來果仁味濃同微甜，抹茶味就帶甘澀，味道唔人工化，同埋佢一球份量都唔算少。

[Pepper Lunch] 黑椒牛肉飯

對於好多人嚟講，Pepper Lunch真係個唔錯嘅選擇。

 差唔多次次都係食黑椒牛肉飯，加啲醬汁再自己炒呀炒呀，真係好好玩，味道同牛肉生熟度又可以自己控制，而且因為有個鐵板慶住，食到最尾都係熱嘅。唯一唔好係可能因為佢哋怕癡底，所以落咗好多油晌個鐵板度，怕肥怕膩嘅女仔就要注意一下。

飲汽水係例牌，今次我揀配佢個搖搖沙律，貪佢有多啲菜，感覺健康啲。佢哋都係預先整定再放入雪櫃嗰種，啲菜就冇咩發紅，應該都唔係擺咗好耐，同埋因為啲麵包粒係分開包，就冇咁易吸到啲濕氣而變腍。

[阿純山東餃子] 餃子可取

近期鍾情食餃子，晌網上搵到幾間專食餃子嘅食店，呢日趁要去旺角，就同朋友去太子嘅阿純山東餃子，聽講呢度曾獲2013年米芝蓮推介。

佢係舊式麵店嘅裝修，一邊有卡位，另一邊就係幾張大圓檯。見姐姐默默咁晌一角用人手擀餃子皮同包餃子，我都幾鍾意呢種模式嘅食店，比晌工場生產嘅連鎖店有生氣得多。


檯上仲有唔少調味料如醋、醬油、辣椒醬同蒜蓉，都係佐餃子食嘅。因為呢日天氣太熱，我哋就叫咗兩杯凍豆漿，甜度適中，攞來消暑同解辣都唔錯。


涼拌土豆絲，除咗土豆（馬鈴薯）絲，仲有胡蘿蔔絲，口感爽脆，辣度係剛好惹味嗰種，我哋都覺得唔錯。

涼拌風味茄子，賣相平平，同佢哋嘅參考圖分別幾大，面層淋咗非常多花生醬，仲有胡蘿蔔絲點綴（參考圖係青蔥嚟），基本上係用醋同蒜蓉調味，食落微微酸香，討好但唔突出。


麻辣雞絲冷麵，冷麵上面鋪咗雞絲、青瓜絲、胡蘿蔔絲、芽菜、花生醬同辣醬，花生醬太多，辣度輕，雞絲比較大件，味道可以，但略嫌爽脆度一般。


京蔥羊肉餃。


香芹鮮肉餃，兩款餃子從外觀睇分別唔大。



佢哋嘅手擀北方餃子皮比上海餃子較厚，個子亦偏細，不過肉餡多，飽滿如銀包仔。京蔥羊肉餃，羊羶味濃郁，係我嘅可接受水平。香芹鮮肉餃，香口爽脆。兩款都係比較濃味嘅餃子，肉餡無咩肥膏，嚼來扎實鬆化，肉汁豐富，呢個確係新鮮製作同雪藏嘅分別。

價錢以同類食店嚟講唔係便宜之列，我覺得餃子可取，其他食物都唔算出色。不過呢次兩款餃子嘅蔬菜比例較少，當日見唔少人食西洋菜鮮肉餃，應該都唔錯掛？！

[麥當勞] 美式手撕雞漢堡

（雖然美式手撕雞漢堡供應期已經完咗，但係我都想記低）

麥當勞早前出咗個期間限定美式手撕雞漢堡，嗰日買咗份餐，攞上手係室溫唔算好熱，不過麵包算鬆軟，加入咗特製醬汁嘅手撕雞食起來微辣，配上蛋黃醬雜菜絲同車打芝士片，都幾惹味，只係略嫌炸洋葱圈已經被啲醬汁搞到頗腍、無脆脆口感。

整體嚟講呢款係近年麥當勞新推出漢堡之中，比較好食嘅一款。

[西貢咖啡餅店] 港式早餐

入西貢行下，去咗西貢咖啡餅店食個早餐先。佢哋間舖係麵包店格局，門口對出就有帆布簷篷遮住嘅半露天位。

呢度好似快餐店咁，係要晌收銀處買咗嘢食，等一陣佢哋整好就自己攞返埋位食。

同朋友分別叫咗兩份早餐，我哋都係揀咗餐肉煎蛋出前一丁，餐肉煎得香口，煎蛋係荷包蛋嚟，都幾滑溜，同埋佢哋係用麻油味出前一丁，而唔係公仔麵或大光麵。簡簡單單嘅港式麵食，卻又唔馬虎。

隨餐仲有牛油餐包，問咗收銀員可唔可以加錢轉菠蘿包，佢話唔可以嘅，都無所謂喇。佢哋嘅餐包比其他茶餐廳大好多，半球體脹卜卜咁都幾吸引，我係逐少逐少撕來食，每啖都有幾濃嘅牛油香，麵包質地鬆軟而富彈性，比某啲連鎖式麵包店嘅空心麵包實在得多。

除麵食同餐包，我哋嗰兩份早餐仲包兩杯飲品，分別揀咗熱檸檬茶同熱奶茶。拎到份餐先知係英式奶茶，而唔係我期望嘅港式奶茶，不過始終西貢有唔少外國人聚居，咁都無可厚非。紅茶飲落甘香，配淡奶加少少糖就OK，而且茶壺容量唔細，一壺可以斟到兩杯紅茶，換句話說即係一份早餐包咗兩杯飲品。

食完我哋嘅早餐，見菠蘿包啱啱新鮮出爐，就忍唔住買咗個食吓，麵包主體同牛油餐包大同小異，上層脆皮龜裂得都幾靚，甜度啱啱好，掉皮情況唔太嚴重，表現唔錯。

佢哋啲麵係用成本較高嘅出前一丁，加上一個茶壺斟出來嘅份量就等如人哋兩杯熱飲，早餐定價三十幾蚊都幾划算。

[隨變燒烤麻辣雞煲] 辣度比出面重手

其實知道有呢間嘢好耐好耐好耐，不過因為太多選擇都冇食過，直到近日朋友圈提起過呢間，就趁今晚去食下。

 我哋兩個人叫咗隨變麻辣雞煲（全雞 $208），原本想要中辣，不過個哥哥仔話佢哋啲辣比出面重手同勁好多，建議我哋真係唔夠辣先加，咁就聽佢話改做小辣。呢度個汁比出面稀身，不過都清楚見到有乾辣椒、洋蔥、芫茜、青椒、花椒八角，雞肉食起上嚟幾滑，食一啖個嘴唇就已經辣到麻痺咗。

 另外叫咗啲小食：
麻辣豬耳（$38），又係辣辣哋，都幾爽口。

燒牛舌心（$40）、燒香菇（$20），味道分別唔大，都係用孜然粉調味，兩款嚟講牛舌心會比較好食，冇咁乾身。

我哋仲叫咗啲火鍋料，例如有韭菜餃、雲吞、皇帝菜、金菇、雞脾菇、魚腐、牛筋丸同響鈴等等，除咗響鈴唔脆之外，其他都正常，另外再加咗嘢飲。

個麻辣雞煲愈煮愈辣，食到一半朋友已經食唔到要投降，好彩之前有聽個哥哥仔講只係要小辣咋…