[面譜京川料理] 唔及以前

今日同朋友去食面譜京川料理，之前嚟過覺得唔錯。

 花雕王醉雞，雞肉入味，不過得幾件，一人夾一件都冇咗。

 炒鴨松子仁配叉子燒餅，去食川菜都會多數點呢款，係自己塞啲肉碎落叉子燒餅入面嚟食，少少辣，加上有啲松子仁增強咬口，都唔錯。

 話梅子薑豬手煲，酸酸甜甜都幾開胃嘅，不過份量又係少咗啲。

水煮豆腐，墊晌底嘅芽菜同薯粉都幾多，連埋豆腐都係索湯嘅食物，個汁都好夠辣，以今餐嚟講算係最得我哋歡心。

整體嚟講好似比之前嚟差咗，同埋多咗好多外國人，似乎已經變咗做遊客生意嘅餐廳。（因為嗰日燈光好暗，啲相顏色有少少怪）

[Pizza Bird] 不復當年勇

屋企人叫咗Pizza Bird外賣，佢哋前身係Pizza and Chicken，近年先改名做Pizza Bird。落單後約個半小時先送到，不過當日係繁忙日子，都可以理解。

芝味B餐，海洋風情大批一個、香草烤雞螺絲粉一客、炸雞三件、汽水三罐。

海洋風情大批餡料係魷魚、蝦、蜆仔、蟹柳、洋蔥、青椒、菠蘿、芝士同千島醬，種類雖多，份量就幾少，零星咁分散晌薄餅表面，千島醬食味偏甜，唔同坊間甜中帶酸嘅味道。

香草烤雞螺絲粉，記得早年仲係叫Pizza and Chicken嗰陣食到嘅醬汁係滿滿香草味，可惜呢次食味稍淡，就似一般茶餐廳頹式白汁，螺絲粉亦較腍身。

炸雞方面，色澤頗深，似乎炸得過火咗，表層炸漿亦唔薄，食落肉質乾身，比仍係Pizza and Chicken初期失色好多，但就比K字頭炸雞店算係好啲啲，至少食得出調過味同仲係熱辣辣嘅。

另外跟餐可以揀汽水、餐湯或蒜蓉包，落單嗰陣話要汽水，一般餐廳都會俾百事可樂（或可口可樂），但當日佢哋隨機俾咗7up同Mirinda青蘋果味，所以落單時真係要講明想要咩口味嘅汽水，以免出現唔啱飲嘅情況。

Pizza and Chicken時期係我心目中頭幾位薄餅店之一，惟呢次嘅表現真係有少少不復當年勇，都幾失望（不過又未至於喊面）。

[蘭亭閣] 景觀似酒店餐廳

朋友入咗院，同另一位朋友去探佢，之後就去咗醫院入面間蘭亭閣食晏。呢度嘅環境幾好，高樓底加園林景，完全唔似晌醫院入面，反而似酒店。

我哋兩個都係食半自助餐，忌廉南瓜湯同餐包，個餐包烘熱咗，都OK。

煎羊仔柳配芥末籽汁薯菜，羊仔柳有啲韌，羶味有但討好。旁邊仲有法邊豆、車厘茄之類，薯蓉仲撈咗黑松露，配角好似比件羊仔柳仲好味。

朋友嘅意式雞扒，係用蕃茄同芝士調味，同埋都有薯蓉伴碟，不過對比起嚟就冇我嗰份咁豐富。其他甜品生果就自取，選擇唔多，不過呢度又唔係酒店餐廳，都算係咁。

估唔到仲有木桶豆腐花，主要係好玩，唔算好滑。

[Downtown Hot Dog] 費城芝士牛肉狗

同朋友去荃灣睇戲，趁仲有少少時間食少少嘢先，揀咗Downtown Hot Dog。

呢度有幾款特定款式，另外都可以自己配搭唔同嘅熱狗包同熱狗腸。俾錢後等咗幾分鐘，熱辣辣熱狗就整好。

 費城芝士牛肉狗，即係芝麻熱狗包配牛肉、洋蔥、磨菇、芝士，跟住就用黑椒汁調味，啲餡都算豐富。個麵包好似話係間嘢自己整，都算鬆軟，牛肉同其他嘢夾埋一齊就幾甜而帶少少黑椒嘅辛辣，不過因為芝士都幾多，再加上啖啖肉，食吓食吓都幾漏。


另外加錢要埋汽水及薯條，薯條係粗身有少少似triple O嗰種，加上嗰日係啱啱炸起，所以都唔會難食。

[Holy Chef] 車行堆之中

晌車行堆中嘅Holy Chef，入到嚟卻係另一回事。

Banana Chocolate Milkshake，上面有啲棉花糖晌度，都幾靚呀，下面就係加入咗香蕉嘅朱古力奶，飲落唔太甜，只係香蕉味唔太出。

南瓜湯，用杯仔上三四啖就飲晒，都幾可愛，個湯飲落smooth濃郁。

黑松露雜菌意粉，除咗雜菌同黑松露之外，仲有好多芝士碎，個意粉亦都幾彈牙，唔錯。

感覺上呢間啲嘢食都幾合心，只係個價位偏高少少。