[禮賓傅] 週末午餐

嚟過禮賓傅一次覺得唔錯，呢次再嚟先知原來佢哋出咗個週末午餐。



同一般嘅中菜有啲分別，呢度嘅菜式係位上，有啲西餐嘅感覺。先嚟嘅係兩款涼拌小食，麻辣花膠雲耳秋葵口感爽脆，辣度輕微。象拔蚌仔配粉皮，粉皮入面有切片象拔蚌仔、青瓜同肉碎等等，幾鮮味。



然後就係兩款湯品，桂花魚老雞燉鹹酸菜，湯色清澈，同埋加咗啲唐芹，味道清香。



龍蝦湯，味道酸酸哋，同埋仲有龍蝦肉，估唔到可以晌中菜館飲到呢款比較西式嘅湯品。



沙汁明蝦球，蝦球炸得外脆內彈牙，醬汁酸甜。欖角蒸斑骨配炒蘿蔔糕，斑骨肉少但惹味，蘿蔔糕切成一口大小，食起嚟幾香口。



南瓜燴安格斯牛腩，牛腩軟腍有牛味，南瓜又夠香甜。桂花鮑魚炒素翅，廚師將蛋黃炒成桂花咁，入面就仲有芽菜同素魚翅。



禮賓傅炒飯，用鮑魚角、龍蝦肉等等炒成，同埋用咗黑松露同青蔥提味，米飯炒得粒粒分明又夠乾身。



甜品一碟有兩款，蛋白杏仁茶，味道討好又養顏。天山雪蓮燉雪耳，雪耳軟中帶爽，甜味啱啱好又順喉。

呢次試嘅菜式之中，我哋就比較鍾意沙汁明蝦球同南瓜燴安格斯牛腩。

[酒鍋] 穩陣午餐

上次試過銅鑼灣酒鍋嘅點心覺得唔錯，呢次就試試尖沙咀店嘅午餐。



裝修都係新派路線，窗邊就透咗唔少天然光。



佢哋以火鍋馳名，不過午市就係飯、麵、壽司、刺身為主，同埋免收加一。



揀午餐嘅話可以加配草本茶，分別係竹庶茅根同紫貝天葵，前者甘甜討好，後者酸香清熱，同埋用咗燈泡造型嘅杯，玩味十足。



當日嘅沙律係青瓜絲、蟹柳同蟹籽，咬起嚟幾爽脆。



原隻灌湯小籠包用細細個嘅蒸籠裝住，賣相可愛。不過就無蒸籠紙，小籠包個包底有少少癡住，雖然有啲可惜，但佢外皮煙韌，總算唔錯。



牛肉籠仔飯嘅表面灑咗蔥花，蒸飯之上仲鋪滿牛肉、木耳、魚仔乾、秀珍菇等等，牛肉係比較有嚼勁嘅肥牛片，其他配料都幾惹味。要留意餐牌寫佢係微辣，實際辣度都唔弱，平時唔太食辣嘅人就要注意一下。



海鮮籠仔飯同樣灑咗蔥花，不過就用蒜蓉調味，打開蒸籠蓋時香氣極之誘人。



入面有大量青口、珊瑚蚌、帶子、蝦、墨魚仔、秀珍菇等等，各款海鮮口感彈牙。米飯蒸得粒粒分明，有咬口但又唔會太硬，同埋吸滿海鮮精華，相對而言表現就出色好多。



最後就係豬骨湯，湯色奶白，個味都幾濃。

午餐嘅選擇驚喜度唔大，但味道係唔錯嘅。對佢哋嘅火鍋非常非常非常有興趣，有機會都想試試。

[西餐大排檔] 只求實事

之前晌唔同嘅媒體聽過西餐大排檔，其中一篇報導仲話主廚希望食客能夠晌度輕鬆咁食到高質西餐。



呢晚嚟到，裝修係幾親民。



大紅色餐巾，有啲中西合璧嘅感覺。



店員話一人套餐係近期推出，我見某啲菜式散叫餐牌係無嘅，就叫嚟試試。



牛腩羅宋湯，除咗牛腩之外，湯入面仲有甘筍、椰菜、西芹、洋蔥等等，味道濃郁開胃。



黑松露蘑菇湯，蘑菇切得細碎又有咬口。蒜蓉多士就烘得外脆內軟，蒜蓉牛油夠香，用嚟蘸湯食都唔錯。



鮮龍蝦半隻配燒牛肉眼，用平底鑊載住，賣相吸引。牛肉眼燒得外層微焦，內層色澤粉嫩，食起嚟柔軟，筋位有油香。龍蝦雖然只有半隻，不過個size唔細，肉厚彈牙，同埋用咗黑椒等等調味。廚師仲特登將龍蝦鉗扑開，外殼睇落完整，但就可以輕易拎啲龍蝦肉出嚟。



香燒原條是日鮮魚，外皮香噴噴，魚肉綿滑。用原條嘅姿態出場，晌西餐嚟講真係好少見，貫徹咗餐廳嘅fusion作風。



伴碟蔬菜亦唔馬虎，薯蓉食起嚟香滑，法邊豆口感爽脆，燒番茄就唔乾身。用嚟點肉食嘅香草汁酸酸甜甜兼有少少辛口感，味道有少少泰式醬汁嘅影子，既可提味又可解膩，我幾鍾意。



最後，我哋簡簡單單咁用檸檬茶做總結。

呢度嘅食物唔賣花巧、只求實事，如果硬要雞蛋裡挑骨頭嘅話，就係平底鑊邊比一般嘅碟高身，直接用刀叉切食物嘅話比較唔方便，要自己將食物轉移去普通碟上面切呢！

[Superdon] 熙來攘往之中

門面簡樸到好似玻璃小屋，想像唔到佢就係晌SOGO後面，硬係覺得呢類小店只會出現晌大坑入面咁。

入口側邊係水吧兼食物製作區，同埋有排高身吧檯，另外仲有幾張雙人檯。

餐牌封面有啲似日本雜誌，都幾簡約。



我試咗一碗海鮮丼，轉定食嘅話就包沙律同麵豉湯。



沙律有羅馬生菜、車厘茄同豆腐，同埋用咗日式芝麻醬調味。



麵豉湯味道唔過重，仲有唔少昆布、腐皮同大蔥。



海鮮丼嘅牡丹蝦大隻厚肉脆嫩，大吞拿魚腩雖然唔算入口即化，但都幾有油香同魚鮮味，北海道馬糞海膽每瓣都非常完整，食起嚟軟綿甘甜。



碗入面仲有味噌蒜、漬蘿蔔、牛蒡、酸薑、紫蘇葉同紫菜絲，米飯軟糯又有啲咬口，仲有少少醋味，芥末就幾香同埋唔攻鼻，加埋一齊食感覺唔錯。

[鉄人旨花] 魚躍在花見

想試呢間鉄人旨花好耐，lift門一打開就見到用咗好多花做佈置。



呢晚我哋食omakase，於是就坐晌壽司檯度。



除咗omakase，佢哋仲有鐵板燒架。



先嚟嘅係前菜，賣相唔錯。



刺身係原隻龍蝦，師傅即席生劏起肉。雖然已經被切成刺身，但細心一睇龍蝦對眼同啲腳係仲郁嘅，生猛之餘又有少少殘忍。



鐵板單品係和牛薄燒，肉質軟嫩，配埋香草醬就仲惹味。



一邊食一邊欣賞師傅用心炮製刺身同壽司，都幾賞心悅目。



帆立貝壽司，頂層嘅柚子醬幾清新。



深海池魚壽司，食起上嚟有魚香。



金目鯛壽司，表面經輕輕火炙過，幾爽滑。



拖羅壽司，入口咬幾咬就即化。



海膽壽司，味濃甘甜。



花穴子壽司，外層嘅燒鰻魚有焦香同鬆化。



烤物係喜知次，魚肉細嫩，仲可以唧少少檸檬汁提味。



龍蝦清湯係用啱啱刺身嘅龍蝦頭同龍蝦腳煮成，飲起嚟都幾清同舒服。



呢晚嘅甜品係春櫻杏仁豆腐，上面嘅係櫻花蓉同櫻花漬，杏仁豆腐滑溜，味道幾得意。