[半島咖啡屋] 隱於旺區咖啡店

都係朋友帶過我嚟先識呢間半島咖啡屋，以為呢度無咩宣傳，加上位置隱蔽，識嚟嘅人應該唔多，不過到埗後都有五、六成滿。

佢哋好似冇晌附近街上整易拉架，上嚟啲指示又有啲一樓一感覺，加上店名又好似有少少流流哋，如果我係平常路過嘅話，應該唔會刻意上來。

事後聽聞呢度老闆兼主廚曾任職半島酒店，唔怪得店名叫半島。

無咩裝修而偏向舊式，主要係卡位形式嘅高身梳化椅，唔算非常特別，不過每檯都有一定嘅私人空間，算係坐得舒服。

上次坐窗邊卡位，呢次再同朋友嚟就坐另一邊較入嘅位置，雖然都係帶啲昏暗，但對比起佢哋其他位嚟講，呢邊光線會比較充足，同埋啲檯櫈亦好似比較整潔。

只係飲過嘢，今次就食晚餐，定價動輒百幾蚊，不過扒類食品一般來貨都較昂貴，咁都可以理解。開初以為個餐會包餐湯之類，原來只係有主菜，飲品要另外加錢。


士多啤梨藍莓刨冰，佢哋聲稱係用鮮藍莓同鮮士多啤梨打成，唔係香精貨色，碎冰打得幼細，入面混有打碎咗嘅藍莓皮同士多啤梨核，聞落莓味出，飲落無添加太多甜味，唔錯。


薄荷朱古力，難以想像朋友會揀呢款，下層係凍朱古力，上層就係忌廉同薄荷糖漿，另以一支朱古力威化棒點綴，甜度頗重，朋友話普普通通。


澳洲羊架配黑椒汁，羊架係用鹽等等略為調味，煎到表面焦脆，食落肉腍鬆化，無被鬆肉粉醃過頭嘅感覺，亦無太重羶味（我係嗰種食羊但怕太羶嘅人，都幾矛盾）。黑椒汁就偏甜帶少許辛辣，另伴有雜菜沙律同薯條，當日薯條唔脆，仲有啲過鹹添！


紐西蘭肉眼扒配黑椒汁，朋友叫咗五成熟，肉厚但煎得唔乾身，嚼來筋位少，唔會咬極唔爛。

羊架同肉眼扒同樣唔錯，不過我自己就鍾意羊架多啲，連朋友都話比較香口惹味。雖然位處旺區，但食完都唔洗趕住埋單，可以坐多陣都無人白眼。惟佢哋通風系統一般，唔知點解當日場內充斥住一陣香煙味。

[Delifrance] 下午茶珍寶腸熱狗

下午茶餐嘅珍寶腸熱狗，份量比想像中大，賣相同參考圖無太大出入。麵包經烘脆，但質感較乾身，中間有珍寶腸、雜菜、番茄片，同埋微酸沙律醬同微辣黃芥末，食落都OK，無咩太膩嘅感覺。餐飲方面都係揀咗熱錫蘭奶茶。

[Subway] 廿幾蚊餐

久唔久會食Subway，佢哋有啲廿幾蚊餐就有六吋包同罐裝嘢飲，平得嚟又幾多蔬菜。

我揀咗火腿套餐，麵包就係意式香草芝士包，蔬菜就揀咗蕃茄、墨西哥辣椒、生菜同酸瓜，佢哋仲有紅洋蔥、青瓜、黑橄欖同青椒，可以要求加晒，但又係好似太多款個味會好雜，所以我通常只係會揀幾款，而個醬我就要咗紅酒醋。

好鍾意一啖菜一啖肉嘅感覺，唔寡又好似比較健康。紅酒醋酸酸哋，令個包食落冇咁漏，不過因為佢太流質，食嗰陣會滴汁，都食得幾麻煩，下次都係要啲比較稠身嘅醬汁會好少少。

[元気寿司] LIFE IS LIKE SUSHI

諗唔到食咩之下就去咗附近間元気食壽司。

呢晚我食咗：

三文魚壽司，厚度同鮮度平平。
三文魚腩，肥美爽口，比三文魚好食。
帆立貝壽司，都幾厚身同鮮甜。
左口魚壽司，口感脆，同埋比較多魚油。
八爪魚壽司，算彈牙，但味道唔出眾。
海膽壽司，無腥味亦無鮮味，普普通通。
腐皮壽司，純粹係個人喜好。
青瓜小卷，就係為咗要食啲蔬菜。

「LIFE IS LIKE SUSHI」

[McDonald's] 抹茶新地筒

食完彩虹雞蛋仔，又趁join家人前去咗麥記食「新」推出嘅抹茶系列，聽聞之前已經出過，不過我冇食過。

買咗支抹茶新地筒，唔…

我只可以講，餐廳貼出嚟嘅海報真係僅供參考，一切以實物為準。接到佢嘅時候我真係忍唔住（細細聲）講咗句「咁肉酸嘅」，不過唔想浪費食物、份量又唔算好少，先冇要求換過支。

講返個味道，我覺得奶味偏重，只係食到少少抹茶味，鍾意濃郁甘澀嘅抹茶愛好者可能會幾失望。

[Modos] 積及橙朱古力雞蛋仔

晌旺角行街嗰陣去咗Modos買小小嘢食，有啲想食羅宋湯雞蛋仔，不過又好似太創新，怕會怪怪咁，最後買咗積及橙朱古力雞蛋仔。


當日大概有三、四個人晌度等緊，因為呢間個舖位只係收銀同廚房，加上所有嘢都係即叫即製，所以啲人就要企晌行人路同馬路邊等，不過呢條內街唔算繁忙，都唔會成日俾人撞到嘅。


等咗數分鐘，我嘅積及橙朱古力雞蛋仔就到手，外表呈微微橙色，且輕易睇見粒粒朱古力嘅蹤影。


聽聞佢嘅靈感來自積及（Club）出品嘅橙餅，雞蛋仔外脆內軟，雖然係香精嗰種橙香，但濃郁得來算討好，每粒雞蛋仔入面都佈滿半溶粒粒朱古力。初頭以為只係gimmick嘢，估唔到食落都OK。

[Lab Made] 變幻原是永恆

其實我係晌荃灣間分店食，不過上嚟見到執咗，所以就晌尖沙咀呢度寫，真係變幻原是永恆。

嗰日試咗香烤白芝麻配紅豆（而家已經轉咗另一輪口味喇），最頂層係原味蛋卷，然後就係微甜嘅紅豆蓉，而分子雪糕入面就有啲打碎咗嘅芝麻顆粒，不過芝麻味被奶味蓋過，而且入面仲有啲比較大粒嘅冰碎。

食過咁多次，暫時覺得呢款唔係咁啱我口味。

[Tequila Jack’s] 開揚

同朋友去咗Tequila Jack’s飲嘢，呢度係間食墨西哥菜嘅酒吧，佢個環境都幾開揚，好怕去啲密封式好似不見天咁嘅酒吧。

Mexi Fries Melted Cheddar Cheese and Jalapeno，晌炸薯條上面放咗墨西哥辣椒、番茄同車打芝士，再入焗爐焗到啲芝士半溶，食落辣辣哋酸酸哋咁都幾惹味。不過因為有濕料，所以都唔會期望薯條仲係脆身。

Deep-Fried Chicken Bites with Chipotle Mayo，即係炸雞塊，食落同某某連鎖式快餐店嘅麥X雞差唔多，不過呢度係即炸嘅，但就無頭先份薯條咁好食。

 
Mango Frozen Margaritas，即係有酒精嘅沙冰，芒果味飲落有少少人工，麻麻哋。

 Mojito，係用冧酒、梳打水、青檸同薄荷葉調出嚟，呢度用咗好多好多好多薄荷葉，仲打到碎晒令佢更出味，薄荷味非常非常非常突出，完全掩蓋咗酒精味，對於一啲唔係好識飲酒嘅人嚟講都唔錯。

[包餃店] 發脹魚蛋

有啲口痕痕，就去咗附近小食店買咗魚蛋，一碗有六粒。我揀咗要辣嘅（即係咖哩），其中一粒嘅顏色特別深同比其餘幾粒腍好多，似乎煮得比較耐。食落冇咩魚味，完全係一口麵粉嘅發脹魚蛋，不過價錢又唔貴，都唔計較咁多，而且食完都唔冇「時常令我口渴吧」。

[鮑記大食部] 晌街邊立食

 呢期晌IG好紅嘅小食都唔少，其中最有興趣嘅係荃灣鮑記大食部。嗰日舖入面嘅都係紋身大漢叔叔，見我晌度望吓望吓佢哋貼出嚟嘅餐牌，會主動問我想要咩，比想像中nice。

我嚟之前已經諗好咗要比較特別嘅火山爆發溶岩牛堡，等咗一陣就拎得。多到漏出嚟嘅粉紅色芝士係用紅菜頭整，仲非常稠身，個感覺有少少似香口膠，我原本想好似人哋咁整拉絲，不過啲粉紅色芝士本身好黏，但又黏唔住個包面，當我拎起少少個麵包時，啲芝士好快就抵受唔住掉返落嚟，我心諗到底其他人係點整嘅呢？！？！

講返個包，入面啲肥牛都幾多，食起嚟幾juicy，夾雜住微微辣酸嘅泡菜，仲有番茄片同紅椰菜絲一齊食唔算漏。

食物OK，唯一唔好係因為開放式嘅關係，本身整食物個廚房已經佔咗間舖所有空間，所以就要晌街邊立食。當日都幾熱，一邊食一邊抹汗，好彩食食吓見附近有個公園仔，就轉咗去嗰邊坐低食喇。

[聖安娜餅屋] 媽媽節親戚篇

今次成班親戚晌酒樓慶祝媽媽節，又係去咗酒樓附近間聖安娜買蛋糕，因為呢次人比較多，所以買咗兩個。

 鮮果彩虹，呢個我冇食到呀。

芒果狂熱，上面鋪滿芒果肉，中間就係海綿蛋糕同芒果肉忌廉夾心，以為應該會同上次個mango 400差唔多，點知一食，即刻瞇埋眼，啲芒果真心極酸，有啲似食緊日本嗰隻超酸味覺糖。

其實今次想比喊面，不過因為上次食另一款都係芒果為主嘅蛋糕表現係唔差嘅，先至俾OK，真係估唔到啲水準會一時一樣。

[聖安娜餅屋] 媽媽節芒果蛋糕

媽媽節將至，我哋幾個就夾錢同媽媽食餐飯兼買咗個蛋糕慶祝。

 口味係媽媽至愛嘅芒果，呢款叫mango 400，睇佢哋啲傳單講係用咗400g嘅菲律賓呂宋芒果肉整。

外面鋪咗芒果片，咁我哋又冇用個磅磅吓係唔係有400g，不過都算多同埋鋪得幾平均，同埋呢個芒果夠熟，食落幾甜唔酸。至於中間就分別係芒果西米慕絲、海綿蛋糕同朱古力脆脆，有唔同嘅口感之餘又唔膩，差唔多二百蚊個都算係咁。

[曲奇四重奏] 蝴蝶酥

買過幾次曲奇四重奏嘅出品，我自己就比較鍾意佢哋嘅蝴蝶酥多過曲奇，打開個鐵盒就已經聞到一陣陣香氣，食起來脆身鬆化，甜甜哋兼有陣陣牛油味。有陣時口痕起上嚟真係食到停唔到口，不過有整過蝴蝶酥嘅話都知道其實本身要用嘅油份同糖份都唔少，所以就算好食都要節制一下。

[Choux Creme] 黑醋蘋果朱古力泡芙

 出街行過，今次見到呢個黑醋蘋果朱古力泡芙，呢款應該係新出，咁就買咗件嚟食吓。

朱古力泡芙食落有啲甘澀，同埋比較腍身。中間夾住朱古力同原味忌廉，但係唔係好食到黑醋味，蘋果粒就酸酸甜甜，夾埋一齊食都OK冇咁漏。

[Sodam Chicken] 炸雞較好

同朋友試咗上年年尾先開業嘅韓國過江龍炸雞專門店Sodam Chicken，店內裝修係近年流行嘅工業風，單睇可能會誤會係西餐廳。當日場內電視不時播放k-pop MV，當中最吸引係早幾月熱播熱追嘅太陽的後裔OST。



窗口位都幾舒服，當日係下午，所以唔係太多人。佢哋主要係食韓式炸雞同焗雞，所以菜式選擇唔多，但都有提供少部份韓國菜式。

我哋叫咗三杯飲品，定價晌五十多至接近八十蚊，都幾貴，不過實際份量比想中大杯，都算OK。

提子特飲，味道有啲似利賓納，個人覺得最得意係支Appolo五色冰，可以就咁食，又可以輕輕攪拌等佢慢慢溶化，同特飲一齊飲。


菊花蜜特飲，杯邊朵大菊花非常搶眼，佢其實係有氣版菊花蜜。


檸檬燒酒，我叫呢款都係為咗個倒轉大燈泡，另一原因係想試吓韓國大熱水果口味燒酒。我一向唔太識飲酒，呢杯飲落甜甜哋，仲有少少似某某牌子嘅檸檬汽水，既易入口又討好。


牛肉部隊鍋，我對部隊鍋興趣唔大，部隊鍋其實係韓國戰爭時物資短缺，軍人用剩餘食品創作出來嘅火鍋，所以材料都唔會太複雜豐富，但同行朋友想試就叫咗。配料有生牛肉、餃子、魚糕、午餐肉、炸紫菜卷、金菇、泡菜、茄汁焗豆同大蔥，底下就係辛辣麵。

呢個部隊鍋原本係清湯底，係靠鍋上堆韓國辣醬調味，食落唔係平日辛辣麵嗰種辣粉味，我覺得都幾香，辣度唔算濃烈，連身邊唔太食得辣嘅朋友都輕鬆應付到。

其他配料如生牛肉、魚糕、午餐肉，只要唔煮太耐就唔會難食。餃子入面包著豬肉、蔬菜同韓式粉絲，炸紫菜卷煮咗冇幾耐就散開，辛辣麵因為開始時已有啲腍，到其他食材煮好後先食就腍上加腍。

一如以往，部隊鍋湯頭會愈煮愈濃，但因份量唔少，我哋都無再飲啲湯喇。



雖然韓式焗雞晌坊間比較少見，不過今次只係試韓式炸雞。

蜜糖芥末香蔥炸雞，雞件堆疊如小山。我之前食過尖沙咀某間頗馳名嘅韓式炸雞店，少不免會將佢同呢間作比較，我覺得呢間大蔥較少，有啲唔夠喉。


不過雞件就新鮮炸起，熱到燙手，表面炸漿平均唔厚，炸皮脆肉嫩多汁，淋晌炸雞上嘅蜜糖芥末汁幾多，甜香中帶微微辛口。我覺得芥末比例適中，太多反而會嗆鼻，而家就比較平衡。



雙重芝士炸雞，屬於芝士控嘅我對呢個都幾期待，芝士粉算多，唔係只有三幾粒嗰種，但車打同巴馬臣芝士味道唔太突出。而且我習慣食炸雞一定要蘸醬，惟呢款係冇任何濕潤醬料，感覺有啲dry（齋）。如果佢用可以拉絲嗰種芝士，吸引度應該會大增。

撇下某些不明朗因素，呢間嘅炸雞本身做得唔錯，比某某K字頭連鎖店好食得多（當然價錢亦有差距）。