[弘] 可以食嘅玫瑰

弘嘅二段丼口碑一直唔錯，想試好耐，呢日終於成行。



門面好和風嘅感覺，環境光猛。



佢哋係間專賣日式丼物嘅食店，揭一揭餐牌，無諗到選擇原來都幾多。



店員先拎咗味噌湯同一碟調味料嚟，入面有酸薑、漬蘿蔔、山葵等等。



極丼，上面鋪咗藍鰭吞拿魚大腩、帆立貝、海膽、油甘魚同赤蝦，刺身份量豐富，甚至將飯都遮住晒。海膽、帆立貝同赤蝦鮮甜、油甘魚爽口、藍鰭吞拿魚大腩入口有油香，另外仲有厚燒玉子、青瓜片同雜菜等等。米飯方面醋味啱啱好，又唔會太酸，質感就比較軟身，不過單食都覺得唔錯。



薔薇二段丼，呢個係供應至六月左右嘅期間限定款式，分咗上下兩層，既精緻又吸引。



上層用刺身捲到好似幾朵玫瑰花咁，中間淺紅色嘅吞拿魚有魚香，旁邊就係白身魚，仲用咗三文魚子同蔥花等等點綴，加上火炙過，食起嚟有焦香。



下層飯面分別鋪咗蟹肉、海膽魷魚同蟹膏，可以各自撈飯食，又或者按個人喜好混合咁食。蟹肉加咗芝麻同紫菜絲等，味道溫和。海膽魷魚有咬口，蟹膏就同薑蓉蔥花相伴，鹹鮮甘香。整體嚟講味道濃郁討好，中間酸香嘅漬八爪魚就可以消滯。

薔薇二段丼兩層都有米飯，原本怕太多會食剩，好彩實際份量適中。加上賣相靚，睇得又食得，應該幾討人歡心吧？

但係留意返，所有丼物都係即叫即整，薔薇二段丼仲要啲時間去造型，變相等候時間就比其他丼物長啲啲，當日我哋食完嗰份極丼之後先整好，如果想食嘅話就要有啲心理準備。

[寿司源] 廚師發辦

近年元朗成為專食廚師發辦嘅高質日本料理店集中地，呢日就去試試三間之中比較新嘅寿司源。

店舖晌人流比較少嘅地方，環境清幽。

入面只有大約十多個吧檯位，空間感十足。



另一邊就係一排酒櫃，擺放多種日本酒。



晌市區食廚師發辦最少要千幾一位，而呢度嘅午市時段就只係三百同五百，前者主要食壽司，後者就除咗壽司之外，仲有刺身、燒物、煮物等等，魚類款式會因應時令季節而轉換。



呢次試咗五百嗰款，店員先送上前菜同茶碗蒸，茶碗蒸嘅蛋蒸得滑溜，當中仲有其他配料如冬菇、帆立貝、鳴門卷等等。



師傅詢問過有無特別唔鍾意食嘅食材之後，就會晌食客面前炮製刺身同手握壽司，佢逐一將唔同嘅食材拼埋一齊，原本空空如也嘅碟變得豐富起嚟，當中有漬蘿蔔、木魚味噌蒜同山葵淮山，木魚味噌蒜味道香甜，山葵淮山黏滑，同埋有微微嘅辛口感。



鯛魚刺身，切得透薄均勻。



師傅話可以蘸特製嘅醬汁一齊食，入面有蘿蔔蓉同蔥花，食落酸甜。



油甘魚刺身，分別係下腩同上腩，外觀上睇色澤略有不同，口感方面一件嘅質感較爽、另一件就更有油香。



池魚刺身，加咗蔥花、薑蓉同山葵，可以夾埋小小嘅紫菜片一齊食，味微辣偏重。



帆立貝磯邊燒，帆立貝厚而肥大，表面搽咗醬油，燒得外香內彈牙，用紫菜夾住食，當中仲加咗少少山葵，非常惹味。



生甘海老壽司，蝦肉明亮，上面仲有火炙過嘅蝦膏。入口無想像中濃郁，反而幾鮮甜，壽司飯就軟糯煙韌。



北寄貝壽司，平時常見嘅紅色北寄貝係已經煮熟嘅模樣，而呢件就係呈褐紫色嘅活北寄貝，食落好爽口。



深海池魚壽司，幾有咬口。



鯖魚壽司，師傅表示魚味開始愈來愈濃，所以就轉用赤醋飯，仲巧妙咁加咗蔥蓉，既香口又可以提味。



喜之次壽司，表面經火炙過，入口時魚油四溢，頂層嘅蘿蔔蓉就可以減一減膩感。



松葉蟹壽司，師傅話上面晶瑩剔透嘅係蟹醋啫喱，撕成絲狀嘅松葉蟹肉入口鬆化，鮮甜而有啲微酸。



太刀魚雪見煮，魚皮燒得香脆，魚肉之下係爽彈蝦膠，撈埋蘿蔔蓉正好有中和作用。



大吞拿魚腩壽司，入口即化，令我感到好滿足。



三文魚子壽司，師傅特意灑上現磨柚子皮，鹹香中帶幾分清新。



馬糞海膽壽司，個人覺得海膽係繼榴槤之外另一種極端食物，鍾意嘅人好鍾意，唔鍾意嘅人好唔鍾意，無中間點。當日嘅海膽呈橙黃色，同紫菜一齊放入口中，質感creamy，鮮味重之餘aftertaste持久，味道討好。



大蔥油甘魚手卷，紫菜非常脆口，魚肉香口感爽，細細地份量啱啱好。



味噌湯，作為一碗餐後湯品都唔錯。



柚子雪葩，酸酸甜甜咁幾消滯。

[Darci by Aldou] 海鮮拼盤

呢晚去咗Darci by Aldou，入面環境唔錯，樓底又夠高。



牆上嘅花藝佈置好靚，女仔應該會鍾意。



我哋試咗佢哋嘅海鮮拼盤，分別有時令生蠔、松葉蟹腳、翡翠螺、南美熟蝦同半殼青口。



各款海鮮插晌碎冰山之上，賣相都幾吸引。


生蠔爽口海水味明顯、松葉蟹腳鹹鮮、南美熟蝦係中型大小、翡翠螺同半殼青口彈牙，同埋可以加醬汁或唧啲鮮檸檬汁嚟提味。



另外叫咗兩款飲品試試，Pineapple & Coconut飲落菠蘿甜香味較突出，當中帶微微椰香，味道討好。



Mixed Berry Yogurt就灑咗啲士多啤梨薄片點綴，入面仲有大量雜莓碎，乳酸味濃郁。兩款飲品都有鮮忌廉同薄荷葉做裝飾，質感綿密輕盈，都唔錯。

[Explorer Fusion Restaurant] 疑問開始…

以前馬鐵石門站附近就只有工商業大廈，直至早年某酒店開業，最近仲有大型商場落成，令呢區起咗微妙嘅變化。食肆相繼進駐，呢間Explorer Fusion Restaurant就係其中之一。



門面同入面裝修似係西餐廳，搖滾嘅背景音樂猶如置身酒吧之中。



半開放式廚房嗰邊仲掛咗日本料理嘅刺身名，難怪餐廳以Fusion Restaurant自居。



檯上面放咗西式嘅調味料，但啲碟係日式風格。



餐牌分咗西餐同日餐，花多眼亂，最後只係試咗其中幾樣。



凱撒沙律配63度溫泉蛋，有機羅馬生菜、63度溫泉蛋、巴馬臣芝士、煙肉碎同烘麵包粒分開上，都幾有趣。



然後將所有食材一齊放入碟上，之後加埋特製醬汁再將佢拌勻，過程好玩，三文魚子令整體更加爽脆。



特級刺身，隻碟巨型到幾乎佔據咗成張檯，陣容非常鼎盛。



當中有七款刺身，油甘魚，口感爽滑。



三文魚，甘香肥美。



赤貝，質感爽，鮮味較重。



八爪魚，都幾彈牙。



牡丹蝦，肉厚脆身。



吞拿魚大腩，入口即化，魚油突出，另外仲有啲三文魚子晌度。



活帶子鮮甜，加拿大海膽係完整嘅一大瓣，味道極為濃郁。



水牛城棒棒雞、焗芝士肉醬薯角，雖然係小食但份量唔少，兩個都想食又怕太多，廚師好好人咁整咗呢個合併版。


水牛城棒棒雞，雞槌預先起肉反轉成槌仔咁，食嗰陣就比較方便，外層炸皮薄而香脆，肉質都幾嫩滑。單食已經夠入味，亦都可以點酸酸辣辣嘅水牛城醬汁，又或者係比較特別嘅明太子醬，食法新穎。焗芝士肉醬薯角，芝士焗得焦脆，肉醬入面有番茄蓉同甘筍粒等等，微酸惹味。



和牛漢堡，由白芝麻麵包、煎蛋、煙肉、芝士片同和牛漢堡扒組合而成，size比想像中大得多，有少少失預算。


先將旁邊嘅黑松露醬放晌煎蛋上，之後按喜好加伴碟嘅蔬菜入去，再蓋上麵包大力一壓，蛋黃汁即時流出。

和牛漢堡扒極之厚身，打得唔鬆散唔死實，食起嚟仲有肉汁，黑松露醬、煙肉同芝士令佢嘅味道更香濃。白芝麻麵包烘得略為脆身，同埋搽咗牛油，食起嚟軟熟有彈性，碟上面嘅烤露筍、番茄、炒洋蔥、雜菜就可以減輕膩感。

成個漢堡嘅份量唔少，對女仔嚟講就算切開一半，拎上手都仍然食得有啲狼狽。



我哋食完漢堡之後已經好飽，不過女仔對甜品總係唔能夠抗拒，就算幾飽都可以騰出空位。當晚嘅是日甜品係綠茶紅豆蛋糕，size細細，跟埋橙肉同士多啤梨片，微甜唔漏。

嚟之前見呢度係西餐廳加日本料理，難免會令人心生疑問，事後發現食物除咗有外表亦仲有內涵，確實喜出望外。當晚侍應同廚師都好有禮隨和，真係個幾好嘅經歷，希望佢哋能夠繼續保持水準吧！