[御膳] 二人前私房菜

嚟到位於觀塘區工廈中嘅御膳，入到去個環境都幾光猛企理。

可能有唔少人覺得去食私房菜都一定要好大班人去，但係呢度除咗大圓檯之外，其實都有啲細細哋嘅小圓檯。訂檯嗰陣只要同佢哋講好人數同飲食喜好，佢哋就會安排菜單，同埋會晌事前用whatsapp確認，所以好似我哋咁得兩個人嚟都冇問題。佢哋都有啲散叫菜式，不過我哋想每款少少哋咁試多幾樣，所以訂檯時就揀咗試套餐。



豆腐大蜆湯，湯色奶白，飲起上嚟有芫茜清香。



我個碗入面有三隻蜆肉，豆腐亦滑溜溜嘅。



麻辣手撕雞，加咗啲青瓜絲晌手撕雞入面，再撈埋麻辣醬，惹味得來又唔會太辣。



金絲翡翠鳳尾蝦，蝦肉厚身，仲有節瓜同花菇，味道夠又唔會過份濃郁。



蒜蓉粉絲蒸蟶子皇，蟶子皇彈牙，蒜蓉等配料令佢更加甘香，底下嘅粉絲就吸滿蒸煮時釋出嘅精華。



大肉蟹，單係烹調方法已經有花雕蛋白雞油蒸、薑蔥炒、避風塘炒、四川香辣炒、胡椒炒五款，我哋想食比較原本嘅風味，於是試咗花雕蛋白雞油蒸。



蟹肉蒸得啱啱好，食起上嚟鮮甜，蛋白嫩滑有微微花雕香。



花雕蛋白蒸龍躉球，烹調方法同大肉蟹一樣，龍躉球肉質軟綿，魚皮滑嘟嘟。我哋都覺得花雕同海鮮幾夾，唔會喧賓奪主之餘又可以提鮮。



蒜片牛柳粒，牛柳鬆化有油香，蒜片脆口。


蟹油銀芽炒麵，炒麵入面有大量銀芽、韭黃、蔥、紫洋蔥、白芝麻等等，口感爽脆。



呢日嘅甜品係椰汁紅豆糕，椰汁糕同紅豆蓉原來係分體嘅，講真係有少少煞風景，不過椰汁同紅豆兩者嘅味道突出，又唔會過份甜膩，同埋用咗鮮藍莓、士多啤梨、芒果等等伴碟，總算加返啲分。

[一糖] 從天水圍來到日本

一糖位於空曠地方嘅平房小屋之中，個環境令我諗起日本嘅沖繩。



一場嚟到就試咗幾樣嘢，先嚟嘅係紫黃特飲，杯底放咗柚子蜜，然後就倒啲梳打水，再倒埋蝶豆花茶，梳打水即刻被染成紫藍色。



之後再按個人喜好加入適量嘅檸檬汁，睇住佢哋起咗化學作用，慢慢咁分咗紫藍、紫紅同橙黃三層漸變色，我哋都覺得幾靚。



鮮芒果腸粉，碗入面放滿濃稠嘅芒果汁，同埋用咗士多啤梨點綴。



下面就放咗幾條芒果腸粉，白色嘅腸粉皮估計係用椰漿同蒟蒻粉之類整嘅，咬落有啲煙韌又有啲爽口，中間捲住厚切嘅鮮芒果肉清甜唔酸。睇落平凡，但係味道就唔錯。



梳乎厘紫薯，上層係用蛋白打發嘅焗梳乎厘，食之前可以淋跟埋嘅朱古力醬，口感軟綿綿咁。



梳乎厘之下係大量嚟自日本沖繩嘅紫薯肉，有少少紫藍色咁，食落軟身粉嫩，甜味唔重，感覺都幾輕盈。

由鐵路站行多幾步就到，位置比想像中方便，就算唔揸車都可以輕鬆到達。

[616牛肉火鍋專門店] 食咗成隻牛

想試呢間616牛肉火鍋專門店好耐，佢哋係間專食牛肉嘅火鍋店，提供嘅都係坊間少見嘅刁鑽部位。



佢係用平板電腦落單，用嘅係真iPad，非常揼本。



才疏學淺，好多牛肉部位嘅名都係第一次見，好彩iPad入面有埋詳細嘅介紹。



我哋試咗$338嘅牛板套餐，包牛板、蔬菜籃、烏冬、汽水、牛骨清湯底同醬料費。



我哋仲加咗$30轉做牛雜湯底，湯呈啡色，面層仲有唔少唐芹同大蔥。開著電爐等湯底煮滾，再飲一啖湯，味道濃甜而有啲花椒八角嘅香料香。



用匙羹攪一攪，湯入面仲有唔少牛腸、牛肺同牛肚，單係食湯底嘅牛雜已經花咗一啲時間。



然後就係我最期待嘅牛板，用咗牛形木板載住唔同刁鑽部位嘅牛肉，好得意呀。



啲牛肉睇落令身，都幾吸引。



單張上面列咗啲刁鑽部位嘅名，仲寫埋烚佢哋嘅建議時間，大部份放入鍋度烚幾秒就得，有啲耐少少嘅都只係二十秒至三分鐘左右。



醬料係自己去自助吧拎嘅，分別有鮮甘桔、秘製牛肉汁、潮州辣椒油、沙茶醬、豉油、陳醋、指天椒、炸蒜、蒜蓉、芫茜同蔥花。



我哋想簡單啲，只係拎咗鮮甘桔同秘製牛肉汁，醬汁本身有蒜香，唧埋鮮甘桔汁之後就酸酸甜甜，用佢嚟蘸牛肉食可以提味同解膩。



跟住逐一食牛板入面嘅牛肉，牛朴肉係牛頸上面郁動得最多嘅一塊肉，油脂分佈平均甘香，感覺唔錯。

匙肉係晌牛朴肉下面嘅肩胛肉，質感軟嫩。

裹腱肉係包住牛腿肌腱嘅肉，油份比較少同鬆軟。

胸口膀，幾片白色嘅牛肉，其實係牛前胸嘅一塊脂肪，只有體型比較肥大嘅牛先有，雖然睇起嚟肥膩，但分別烚十幾秒同三分鐘後食，都幾爽脆同有韌度，口感有啲似長身版嘅珊瑚蚌，幾得意。

三花腱係牛前腿肌腱肉，鮮香味濃。

牛漏酥係晌牛嘅臀部同腹部之間，幾有咬口。

挽手腩，即係連接爽腩同坑腩嘅部位，每隻牛只係得兩至三斤，係罕有部位之一，食落有嚼勁同油香。

腿肉係牛嘅臀腿肉，切得薄身，入口嫩滑。

熟板筋，一粒粒淺啡色有少少透透哋嘅嘢，質感黏口，幾有骨膠原。

食完外圍嘅牛肉之後，就食牛板中間嘅部份，牛心爽口討好、黑柏葉無經過漂白又脆身、牛骨髓軟滑但比較滯、牛丸味重彈牙、熟牛腩厚切鬆化。

呢度單叫刁鑽部位牛肉嘅話均一價$48一碟，我哋見都幾平，就追加咗碟封門柳試試，佢係控制橫隔膜嘅肌肉，每隻牛只係得兩塊，既罕有兼係限量供應，食落牛味濃郁吸引。



套餐嘅蔬菜籃有旺菜、生菜、油麥菜、本菇等，食完肉類再食下蔬菜可以平衡一下。



最後煮咗烏冬，煙煙韌韌，同埋吸收咗湯底嘅牛肉精華，味道好正。

[騷] 不一樣酒吧

呢間騷嘅裝修同陳設同一般嘅酒吧有啲分別，反而更加似樓上咖啡店，對於唔係成日去酒吧嘅人嚟講感覺會自在一啲。



最入仲有個小舞台，係俾唔同嘅本地獨立音樂人舉行Live Music表演用嘅。



呢晚試咗幾樣嘢，事前晌網上睇咗其他人嘅相，對柚子蝶豆花茶非常有興趣，見其他人啲冰塊入面有柚子碎，睇落又靚又吸引，但係我嗰杯啲冰塊就無。



雖然係咁，蝶豆花茶用咗三角錐型玻璃量杯載住，確係玩味十足。



倒咗蝶豆花茶入去之後，再加埋檸檬汁，睇住兩樣嘢產生天然嘅化學作用，由紫藍色慢慢變成紫紅色，既好玩又可以重拾求學時期上實驗堂嘅感覺。

花茶加咗薄荷葉同檸檬汁，飲落清新，柚子味就稍輕，整體嚟講幾順喉舒服。



香煎帶子伴芒果沙沙，帶子燒得表面焦脆，肉質彈牙，上面嘅芒果沙沙香甜解膩。



Mini Burgers，漢堡扒係用豬肉手打而成，再配埋芝士、番茄、生菜等等。當中嘅醬汁酸酸甜甜，加埋一齊幾惹味。



size細細，大約兩三啖就食完，對女仔嚟講幾方便。



當晚仲有悅耳嘅Live Music表演，演唱咗唔少耳熟能詳嘅歌曲，例如係盧巧音嘅喜歡戀愛同張國榮嘅有心人等等，增添咗唔少氣氛。

[豚道樂] 豚拉麵

晌荃灣大河道幾出名嘅豚道樂，雖然開咗一段日子，但係呢次係我第一次嚟試。



佢入面有幾張高身吧檯，另外仲有一張比較大嘅長方形木檯。



同一般嘅日式拉麵唔太一樣，呢度係走工業風路線，天花板仲掛咗好多個好似風扇咁嘅燈飾，都幾得意。



同埋擺咗好多個日本達摩，每個嘅造型都有少少唔同。



佢哋有幾款湯底揀，仲有平日、週末同季節限定款式，另有特上同經濟之分，前者嘅配料會比後者多。



先叫咗兩支飲品，招財貓汽水個樽上面嘅圖案幾可愛，味道就有啲似波子汽水，甜味唔算太重。山梨桃梳打就即係有氣桃味汽水，都唔錯。



灸燒芝士豚肉，豚肉上面鋪滿燒到半溶嘅芝士，下層就有塊紫菜，食落香口。



日式餃子，餃子底煎得香脆，餃子皮就煙煙韌韌，中間肉餡多汁。不過就等得比較耐少少，我哋差唔多食完拉麵先拎到嚟。



特上日本芥末拉麵，分別有豬肩肉、豬腩肉、溏心蛋半隻、紫菜、芽菜、木耳、蔥花等等，配料幾豐富。



第一次食呢種加咗日本芥末嘅豬骨湯底，湯呈淡青色，賣相都算討好。先飲一啖湯，感覺黏黏地，同埋有少少辛口，有趣得嚟又唔太過火，入面仲有芝士碎，撈埋一齊食幾惹味。麵條方面就揀咗曲麵，質感都幾煙韌彈牙。



豬肩肉薄切爽口，食落唔錯。



豬腩肉比較厚切，口感都幾鬆化有油香。



週末限定嘅特上海老湯拉麵，同樣都有豬肩肉、豬腩肉、溏心蛋半隻、紫菜、芽菜、蔥花，無木耳，但就有大量嘅櫻花蝦。



直麵麵身幾幼，軟硬度啱啱好，湯底嘅蝦殼味亦幾香。