[S2 Kitchen] 石板街大膽日本菜

S2 Kitchen晌中環石板街旁邊、綠色鐵皮檔之後，位置都算方便，但又好易被忽略。


店入面唔花巧，格局有啲似居酒屋。


牆上掛咗唔少油畫，陳設簡單不過又唔俗氣。


仲有LED螢光黑板，列出餐廳嘅推介菜式。


檯上嘅碗好似雪糕杯咁，幾得意。


未知係咪因為餐廳環境比較昏暗，所以餐牌用咗閃閃嘅質料做封面。


雖然餐廳定位係日本菜，不過賣嘅大多數係大膽創新嘅fusion菜式。除咗首頁有關十層海膽杯嘅介紹外，內面都係直截了當咁只係顯示食物名同價錢。


十層海膽杯，海膽杯一向係佢哋嘅招牌菜，口碑亦唔錯，聽講之前係七層，呢日試嘅係十層嘅進化版。

香檳杯入面順序放咗唔同嘅食材，再用燒白飯魚脆片點綴。唔洗加任何醬油之類調味，先食咗最頂層嘅黑魚籽、北海道紫海膽同沖繩海葡萄，紫海膽質感creamy，黑魚籽同海葡萄就爽脆味輕，無喧賓奪主，然後就將匙羹插到最底，將下層嘅藍鰭吞拿拖羅蓉、三文魚籽、白蝦、松葉蟹肉、鮮海帶碎盡量一齊舀起嚟食，食材當中仲分別夾住兩層北海道紫海膽，咀嚼時鮮香兼有多重口感，食完甚至覺得唔夠喉，好想再嚟多杯呢！


精選三點什錦刺身，當日係金目鯛、帆立貝同牡丹蝦，同埋用咗海葡萄伴碟。餐廳嘅芥末係磨出來嗰種，微辣唔嗆。


味道方面，金目鯛厚切無筋有咬口，帆立貝爽口，牡丹蝦大隻肉厚鮮甜脆身。


芝士魚餅，扁身呈正方形嘅魚餅燒得外焦內軟綿，食落鹹香煙韌，中間夾住嘅芝士幾流心。


清酒鮑魚雞翼，係將雞翼起骨，再釀入原隻鮑魚後燒成嘅。


雞翼燒得香口唔乾身，鮑魚彈牙唔韌，有雞油香兼仲食到清酒嘅味道。


S2特色海膽火焰卷，侍應即席晌我哋面前倒入酒精，再用火槍燃起火焰。


燒時火光熊熊，仲傳嚟陣陣酒香，火焰大約維持咗一分鐘左右，比平時嘅火焰雪山耐看，視覺效果滿分。


火焰嘅熱力令反卷變得微暖，芝士同沙律醬呈半溶，同頂層嘅海膽、帆立貝、蟹籽更溶合，中間就包住玉子同蟹柳，食嗰陣有陣陣火炙焦香。


楊枝甘露沙律，分別有蟹籽、柚肉、芒果粒、蘋果絲同西米，同埋淋咗楊枝甘露汁調味，整體味道酸酸甜甜，蘋果絲又夠爽脆，當係甜品都唔錯，成碟都係生果都幾啱女仔食。

雖然fusion，但我哋呢次試嘅食物配搭上都無突兀嘅感覺，味道都唔錯。

[BEL CIBO Restaurant] 甜蜜晚餐

呢晚嘅目嘅地係BEL CIBO Restaurant，lift門一打開就係餐廳嘅半開放式入口，黑板上仲寫咗當晚嘅優惠同廚師推介。


餐廳入面掛咗唔少油畫。

天花板就有數盞水晶吊燈。


主餐牌圖文並荗，都幾清晰。


有好多都想食，最後只係試咗幾款。


Cookies Banana Milk Shake，沙冰用鮮香蕉同Oreo打成，再用唔同大小嘅原片Oreo點綴，甜味濃郁。


煙三文魚凱撒沙律，煙三文魚捲成兩朵玫瑰花咁，食起嚟帶微微鹹香。羅馬生菜配車厘茄、巴馬臣芝士碎同煙肉乾，口感爽脆，當中嘅沙律醬份量充足，可以均勻咁沾晌蔬菜表面。


龍蝦薄餅上面有原隻波士頓龍蝦晌度，賣相非常吸引。


餡料入面嘅龍蝦肉都係嚟自呢隻波士頓龍蝦嘅蝦身，當中仲有三色椒、洋蔥同雜菌等等，整塊薄餅都佈滿芝士，批邊質感脆，猶如比較厚身嘅餅乾咁，醬汁就酸酸甜甜。至於龍蝦身就係裝飾性質，龍蝦鉗就可以拆肉嚟食。


炭燒日本活性水飼豬鞍，聽侍應講餐廳採用嘅豬鞍係取自等級比黑毛豬高嘅日本活性水飼豬，仲用流質飼料同礦泉水飼養，上網睇佢仲係標榜無菌嘅。由於肉質優，所以餐廳只係燒到七八成熟左右，食起嚟外微焦，內爽腍有肉汁，唔蘸燒汁都夠美味。伴碟嘅蔬菜有新薯、法邊豆同車厘茄，整體味道輕巧無乜負擔。


最後仲試埋比利時朱古力火鍋。

朱古力漿嘅稀稠度適中，甜而帶微微甘澀，可以輕易沾晌食物表面。配料中嘅士多啤梨雕成花朵形狀，真係幾靚。另外嘅哈密瓜、蜜瓜同棉花糖都係甜甜嘅，同朱古力一齊食都幾夾。

[The Joomak] 新派韓國菜

不時聽人講呢間The Joomak，佢係間朝鮮酒幕，即韓式居酒屋，賣嘅都係比較新派嘅韓國菜。


裝修係近年流行嘅工業風，主要係木同水泥為主。


農曆新年將至，店入面亦不乏相關嘅佈置。


用燈泡砌成店名做牆上裝飾，都幾吸引。


其中一組吊燈仲係由多個大燈泡組合而成，既富玩味又有型格。


最入係一列大玻璃窗，璀璨嘅維港夜景盡入眼簾，聽講節慶日子時仲可以欣賞到煙花匯演。


呢晚嚟係為咗試試餐廳近月推出嘅韓式火鍋。


無幾耐侍應就將啲食物拎到嚟，氣體爐同各式火鍋料等等堆滿咗兩張雙人檯。


韓蔘法國春雞湯底，我曾經晌其他地方食過人蔘雞湯，但從來無諗過可以用嚟當做火鍋湯底。人蔘有補氣血作用，趁天氣轉冷時食就啱啱好。


湯底用雞隻、人蔘、紅棗、杞子等等熬煮，先飲咗一啖，湯頭有微微嘅人蔘香，紅棗同杞子等等令佢更鮮甜，同埋無苦澀味，頗為討好。


法國春雞嘅雞殻入面釀咗紅棗、栗子同糯米等等，雞皮薄而無肥膩感，同埋吸收咗雞湯嘅味道。


聽講餐廳晌韓國引入咗頂級1++韓牛，原本我哋想叫韓牛拼盤，可惜當日食客太多所以賣晒，咁就試龍蝦豐盛拼盤啦！


雖然餐牌寫呢個拼盤只係俾兩個人享用，但係份量都幾豐富。


拼盤入面嘅龍蝦對鉗幾大隻，蝦膏都算甘甜。


大蜆食起嚟鹹鮮，亦無任何沙粒。


特級美國肥牛、美國黑豚豬腩片，兩者都係薄切，肥牛鬆化、豬腩片有少許羶香。


泡菜墨魚滑、泡菜鯪魚滑，打成起膠嘅魚滑入面加咗泡菜，講真晌外觀上睇分別唔大，不過煮好之後細心咀嚼嘅話就會發現墨魚滑比鯪魚滑較爽彈，而鯪魚滑就比起佢較有魚香。


五蔬豬肉腸，調味唔濃又有咬口。

然後係兩款近年流行兼好高營養價值嘅蔬菜，冰菜表面佈滿含有液體嘅大型泡狀細胞，令佢睇上嚟好似水珠咁，好得意，食落脆嫩可口。鋪晌龍蝦底下嘅羽衣甘藍屬十字花科蔬菜，同西蘭花、椰菜等等屬同類，葉嘅邊緣呈波浪形、葉柄細長，我覺得口感有啲似西洋菜。

栗米、翠玉瓜、紫薯、南瓜，全部都係甜味為主嘅蔬果。


低脂豆結，即係平時食嘅腐皮，下面仲有大量切條大白菜，又再增加膳食纖維嘅攝取量喇！


我哋另外試咗啲散叫嘅配料同飲品，魷魚仔肉質鮮味，表現唔會比龍蝦遜色。


土耳其蘋果茶用蘋果乾同蘋果肉沖泡，飲落係淡淡酸味。


韓薑菠蘿雪沙嘅沙冰打得幼細，菠蘿味比預期輕，薑味較為突出。

食物質素唔錯，飲品味道見仁見智。拼盤入面有多款蔬菜，相對起嚟就健康一啲。湯底方面滋補之餘，我食完都無口乾或喉嚨痛等等熱氣症狀，感覺唔錯。