[甜椰椰] 出入

同朋友遊車河，去咗沙田河畔嗰邊食甜品。

益力多綿綿冰，同個餐牌嘅圖好似有少少出入，綿綿冰食落益力多味唔太出，上面嘅topping就係類似台式飲品嗰種煙煙韌韌嘅啫喱，糖漿就係黑糖味，分開食都OK，但夾埋一齊嘅配搭就有少少怪（啲topping唔係我揀，係佢本身set好咗嫁）。

楊枝甘露綿綿冰，又係同餐牌嘅圖有啲唔同，個圖係得金柚同芒果嘅，不過實物就有埋爆珠，口感係就係幾得意，不過唔係個個都鍾意新奇嘢。

[土耳其轉轉燒肉] 只係適宜食kebab

同朋友去咗佐敦間土耳其轉轉燒肉食晏，其實之前嚟食過覺得唔差，見咁耐冇嚟，去開附近就嚟食吓。

上次只係食kebab，今次就食吓其他嘢。

 都係第一次飲到杯底有嘢嘅Mango Lassi，係啲類似台式飲品、一粒粒好似啫喱嘅嘢，唔難飲但有少少怪。

 Lacha Paratha，個餅拎嚟嗰陣已經係室溫唔熱，同埋好燶，個籃仔仲幾污糟。

 Chicken Masala，表面有一層厚厚嘅油，雞件又少又燶，味道只係普通咖哩咁，完全唔似晌出面食開嘅Masala。

Kofta Beef Roll，即係烤牛肉卡巴卷，雖然捲得唔夠實，不過就比其他嘢食正常得多。

明明記得上次食過OK，點解今次反而覺得麻麻？真係唔想咁易俾喊面，不過真係太多嘢都唔合格，可能呢度只係適宜食kebab掛。

[蘇記] 如果無比較的話

我鍾意食嘅嘢都幾多元化，西餐中餐、貴嘢地踎，都冇咩特別偏好，總之唔難食就得。每次出去都係因應地區而決定食啲咩，例如去深水埗就主要食啲地踎嘢、大坑就飲咖啡，當然有時都會轉吓口味同習慣嘅。

呢日同朋友去深水埗影相，咁就去咗附近嘅蘇記食早餐先。

呢度係全開放式嘅舊式茶檔，雖然有簷篷遮一遮，但都係好天曬落雨淋。呢種食店通常只會晌舊區先有，環境一定會比室內嘅茶餐廳無咁好同熱，不過都算係香港嘅本地特色之一嚟。

因為見豬扒係佢哋嘅招牌貨，咁我哋就分別叫咗豬扒麵、豬扒豬膶麵。我唔食豬膶所以唔知咩味，豬扒就切咗件，食起上嚟都幾方便，肉質都幾鬆化，調味恰好，冇俾鬆肉粉醃過頭嘅感覺，同埋成碗都係骨位、冇咩肉食，似係湊湊埋埋咁、唔似來自同一塊豬扒。其實我影咗成碟骨嘅食後相，我諗都冇人想睇食物殘渣相掛？！不過連骨位嘅豬扒都有好處，通常會入味啲，同埋比只有肉嘅位香啲。

麵就係平常茶餐廳嗰種大光麵，浸耐咗都冇話會太腍身，嗰日仲見到食店啲人灑水晌啲未煮嘅麵餅度，應該係想啲麵快熟啲，節省煮嘅時間，咁香港人分秒必爭，都可以理解嘅。

然後我哋叫咗油占多，係厚身麵包嚟，搽咗果占同牛油再烘到脆脆哋。另外仲有熱奶茶、凍奶茶，唔知係唔係我嘅口味比較奇怪，呢排飲嘅奶茶都好似冇咩茶味咁，不過都幾順喉幾滑嘅。

呢度係冇套餐，全部嘢食都係散叫，以深水埗物價嚟講夾夾埋埋都唔係好平。食物係正常以上嘅水準，招牌豬扒方面，如果冇比較嘅話我哋會覺得呢間幾好，但係因為我哋食過尖沙咀某間又係地踎茶檔嘅（唔講名喇），有比較之下好似佢哋比呢間好食啲。

[Buddy’s Kitchen] 午餐

晌Buddy’s Kitchen食晏，叫咗兩份午餐，分別揀咗甘筍橙湯同雜菜沙律，甘筍橙湯飲落真係幾香橙味，甜甜哋都幾討好。


英式早餐，有煎蛋、薯餅、牛仔腸、煙肉同焗茄汁豆，賣相都幾靚。


原來煙肉下面仲有炒雜菌同法包多士，雖然油份略多，不過都OK。


朋友嘅醬汁燒豬仔髀，佢揀咗配薯菜，同我一樣都係有炒雜菌，佢話個豬仔髀冇燒得太乾身，食落仲有肉汁。

個餐仲包咗飲品，我哋分別叫咗熱檸茶同凍咖啡，不過冇影相。

[Lucy Coffee n Food] 從火炭搬到荃灣

 其實Lucy Coffee n Food晌火炭時已經好想去，不過因為某啲原因，去到人哋搬咗都去唔成。

 講真，其實火炭店嘅環境比荃灣店大同多啲自然光，我係鍾意火炭店多啲。

 不過好彩去嗰日唔係多人嘅時段，同埋佢本身啲位都唔會排得太迫、係有少少距離嗰種，整體環境唔錯。

好想食佢啲甜品，最後都勒住自己，只係買咗杯Latte，個拉花都幾幼細，飲落奶滑而帶微微甘香。

唔，成間舖嘅座位都有自己嘅特色，但唔係坐得人好舒服，自問體重都算輕，不過我坐嗰張櫈好似搖搖欲墜，就快掉落地下咁，好冇安全感呀。

[Pheromone Dessert] 好睇但係…

個環境好明顯係走少女（熟女）路線。

 餐牌好似本雜誌咁。

綠茶慕絲棉花堡，最吸引嘅地方就係嗰舊粉紅色棉花糖。杯入面就係雪糕、綠茶慕絲、紅豆蓉、爆谷同燕麥，綠茶慕絲同紅豆蓉正常，爆谷同燕麥好腍，唔太討好，感覺上呢個係好睇但味道麻麻嘅甜品。

[程班長台灣美食] 嚟得快去得快

同朋友去咗程班長食晚餐，其實已經嚟過一次，今次係第二次喇。

 我哋叫咗兩杯冬瓜茶，甜度OK，冬瓜仲有清熱作用添。

紅燒半筋半肉麵，即係有牛筋同牛肉，另外仲有蔥同酸菜等等。飲咗淡湯，濃郁得嚟亦討好，而且飲完唔會有口渴感。麵條係闊身嗰種，都算掛湯，食起嚟幾彈牙。
今次仲叫咗啲小食，不過唔詳細講喇，我自己就覺得台式滷味大腸比較OK。

同上次比牛肉麵水準都冇咩點變，不過啲位真係好迫，大家都係嚟得快去得快，同埋唔係咁啱一班人嚟食。

[石屋咖啡冰室] 價位唔貴all day breakfast

見到有雜誌介紹石屋家園入面嘅石屋咖啡冰室，價位唔貴，於是就同家人一齊去行吓食吓嘢。

 個環境好好呀，不過附近其實有墳場。

 入面係仿懷舊裝修，都幾特別。

我同家人分別叫咗三份all day breakfast，再加三杯咖啡。分別係Regular Coffee、Hazelnut Latte同Caramel Latte，後面兩款跟餐要加十蚊。我飲Hazelnut Latte，榛子味唔係好出，同埋超超超超超甜，不過兔仔同貓仔拉花又真係幾得意。

水煮蛋配三文魚及英式鬆餅、水煮蛋配煙肉及英式鬆餅，以四十幾五十蚊就食到eggs benedict，真係好抵。切開都幾流心，同埋冇腥味，可能有人覺得「吓呢個都係評語？」，不過我曾經晌其他地方食過個eggs benedict係有腥味，所以呢點對我嚟講都幾緊要。伴碟嘅雜菜沙律有車厘茄、青瓜、粟米粒、生菜等等，整體嚟講都幾健康。唯一要彈煙肉嗰份，啲煙肉煎得好乾同有啲硬。

另外仲叫咗份deluxe breakfast，包括：煎蛋、煙肉、雞肉腸、煙三文魚、焗豆同多士。呢份唔係我食，所以講唔到咩味，不過就咁睇就好似冇eggs benedict咁開心，呢款仲要係咁多款all day breakfast之中最貴嘅。

整體嚟講真係好抵食，睇得出唔hea，但今次啲煙肉真係煎得好乾，如果我哋只係食水煮蛋配煙肉及英式鬆餅嘅話，應該會扣好多分。

[靚靚 不一樣的車仔麵] 失望車仔麵

同朋友去尖沙咀行街行到攰，只係想求其醫肚，就去咗食車仔麵。


可能呢度晌馬會附近，手畫點餐紙嘅設計好似六合彩票咁，都幾得意。


叫三餸麵嘅話會免費奉送指定飲品，朋友要咗山楂洛神花，都幾蠻大杯，不過佢話飲落有啲似利賓納。我就叫咗熱奶茶，以為可以加錢換購，原來都係正價，茶味同奶味一般。


冇幾耐侍應就拎咗啲食物嚟，某啲車仔餸晌無特別要求之下都係分開上。

我叫咗沙嗲湯底配油麵、蘿白、沙茶豬皮同麻辣咖哩魚蛋，朋友就係酸麻辣湯配油麵、沙茶豬皮、九轉大腸、牛腩、咖哩魷魚同腐乳通菜。

我碗湯底只有微暖溫度，其他食物亦然，蘿白煮得透同無渣、沙茶豬皮亦正常，不過麻辣咖哩魚蛋嘅醬汁唔辣，反而甜甜哋，同麻辣完全扯唔上關係。

朋友啲車仔餸同樣只係微溫，慶幸大致唔難食，不過咖哩魷魚最差，魷魚醃到本身味道盡失，味同嚼蠟。

唔係第一次食呢間，記得上次雖然唔算出眾，但未至於差，呢次之後對佢哋都幾失望。