[Achacha Food & Beverage Boutique] 從元朗嚟嘅阿茶茶

元朗嘅阿茶茶館近月晌MegaBox開咗分店，並改名為Achacha Food & Beverage Boutique，位置晌五樓中庭嘅左邊，剛好晌大型聖誕裝置後面，呢晚就嚟試試。


餐廳係半開放式嘅，以半身欄杆分隔，不過就有啲小飾物遮擋，總算唔會俾外面一眼睇晒。


以木板做餐牌嘅封面，非常有質感，內頁嘅設計就好似英文報紙咁。


100%真鮮果茶，呢日嘅鮮果係紅莓，飲到嘅係天然酸香，無人工化嘅味道，幾開胃消滯。


煙三文魚醬配麵包條。


煙三文魚醬上面灑咗啲刁草，醬內混有爽口嘅洋蔥粒同少少比較大粒嘅煙三文魚肉，鮮香軟滑，唔似平時啲罐頭貨咁，用麵包條蘸嚟食都唔錯。


美國Prime 365日穀飼牛膈肌扒，網上指呢個部位又名牛肝連肌。


我揀咗五成熟，肉質爽嫩有焦香。


伴碟嘅燒菠蘿幾多汁，紫薯蓉入面就有一絲絲纖維，另外仲有露筍、三色椒同雜菜等等，微微甜味可中和肉類嘅膩感。


司陶特黑啤酒法式焦糖燉蛋，顏色比平時嘅焦糖燉蛋偏啡黃，輕輕將表面嘅焦糖敲碎先食，燉蛋口感滑溜，當中仲有黑啤嘅醇香同麥香。

[Urban Coffee Roaster] 坐下在碧仙桃路那個咖啡店

尖沙咀K11連鎖式咖啡店對面嘅碧仙桃路，街名係由英語發音而嚟，字面意思都幾有詩意。


呢晚我哋嚟到街上嘅Urban Coffee Roaster，入面燈光柔和。


加上人流唔多，嚟食下飯、傾下偈都唔錯。


啲位上面嘅咕o臣圖案好得意。


佢哋用啲好舊嘅書本做餐牌，玩味十足。


晚上都係散叫為主，由西湯、沙律、前菜、主菜到甜品，每款類別皆有數款至十數款不等供選擇，以咖啡店嚟講可算全面。


呢次我哋從中揀咗幾款食物試試。


紐西蘭青口，中型大小嘅青口爽脆鮮味，切成方丁粒嘅西班牙辣肉腸有咬口，洋蔥粒同時蘿令忌廉汁更香甜惹味，如果能夠提供麵包嚟蘸汁就好喇。


黑松露野菌意大利飯，飯身係迎合港人口味較濕潤軟身嗰種，混有菇菌粒同芝士增加口感，黑松露味唔算突出，但味道唔錯。


烤M4和牛腹肉，擺盤精美。


切開數片上碟，外層帶焦香，肉質軟滑易嚼，睇落好生，食落就無血淋淋嘅感覺，主要用鹽調味，同埋有輕甜嘅燒汁，加埋大蔥、火箭菜、意大利青瓜同新薯一齊食，成件事幾夾。


咖啡煮啤梨，有別於其他餐廳嘅紅酒煮啤梨，呢度係用咗咖啡入饌嘅。


啡黑色嘅啤梨放晌脆口嘅朱古力金寶同開心果仁碎之中，再加小小蔬菜點綴，好似泥土同植物咁，旁邊仲有奶泡，賣相非常吸引。烹調後嘅啤梨仍然爽口，最內層釀咗呍呢嗱雪糕，開初以為會係一份味道濃郁嘅甜品，實際甘甜唔膩。


佢哋係間咖啡店，朋友對餐牌上嘅Espresso Tonic好有興趣，呢款口味嘅咖啡晌外邊非常少見，孤陋寡聞嘅我哋仲係第一次聽，於是就叫嚟試試。咖啡師沖調時已傳來陣陣咖啡豆香，飲落係帶果酸味嘅有氣版咖啡，幾得意。


我怕太夜瞓唔著，於是試咗無咖啡成分嘅Sweet Potato Latte，張相影得唔好，實際係淡紫色嘅。奶泡打得綿密豐盈，拉花久久未散，紫薯味出，微甜討好。

食物烹調同擺盤用心，調味剛好唔會太濃太甜，以咖啡店嚟講確實喜出望外。不過位處馬路旁邊兼無門口嘅關係，某啲大型車輛駛過時會比較嘈，對我嚟講就尚可接受。

[Comic Park & Cafe] 大小朋友雙贏

位於MegaBox內嘅拉麵店原來已結業，數個月前開咗呢間Comic Park & Cafe。


呢度係動漫主題餐廳，由入口走入嚟係販賣店，售賣各式動漫精品。


之後就係遊戲區，有唔少收費式嘅大型遊戲機如籃球機、夾糖機等等，另外仲有擲彩虹等玩意，猶如置身XX樂園之中。


場內亦設有遊戲角落，係俾年紀較細嘅小朋友玩。


行過精品區同遊戲區後，就係餐飲區。


場內裝修亦同動漫有關。


型格嘅傢俬同可愛嘅牆壁集於一身，幾有特色。


當中我最鍾意嘅係充氣馬仔RODY。


其中兩張係平板電腦遊戲檯，好high tech。


以為呢度只有小食同飲品，原來仲有提供唔同款式嘅西餐菜式。


佢哋係自助嘅，須先到收銀處購票。


然後就會獲發一個飛碟咁嘅傳呼機，當嘢食準備好後就會震動同閃燈提醒去攞。


我哋試咗兩份晚餐，意式辣肉腸薄餅，以為係迷你size，實際比想像中大。


面層嘅辣肉腸鹹香，另外仲有車厘茄、青紅椒等等，芝士非常非常非常多，同埋可拉出強勁嘅芝士絲。批底薄得來又有啲麵包質感，如果兩個女仔同行嘅話食一份都夠飽喇。


芝士焗釀波士頓龍蝦配龍蝦汁燴意粉，半隻龍蝦上鋪滿芝士，未食已覺香噴噴。意粉煮得軟身，表面沾著味道濃郁嘅龍蝦汁，同埋混有蘑菇、煙肉同菊苣等等以增加口感。


晚餐跟埋餐湯，當晚係粟米湯，湯質濃稠，入面有唔少粟米粒，味道就較主菜清淡。


隨餐仲有汽水，亦可加錢配其他飲品。朋友嘅美式香濃咖啡都幾大杯，我就試咗野莓洛神花茶，聞落有少少似藥水味，飲落就酸酸哋，都算討好。

入嚟嗰陣要行過精品區同遊戲區先到餐飲區，講真係有啲令人卻步。然而呢次我哋揀嘅嘢食味道唔錯，份量亦夠飽有餘，總算挽回唔少第一印象分。

當晚仲有好多家長同啲小朋友嚟，小朋友可以晌度盡情玩，家長可以趁機安心用餐，感覺係間大人小朋友雙贏嘅親子餐廳。

[慕茶] 茶味雪糕

嚟到位於觀塘工廈入面嘅慕茶。


入去之後係小小嘅玄關，擺放咗雪糕車等等，裝飾好淑女風。


佢哋都係用木為主嘅傢俬。


個感覺都幾簡約柔和。


啲燈飾仲幾別緻。


佢哋有自助茶水，不過我叫咗飲品，所以就無斟嚟飲喇。


食物方面有提供主菜，不過我對佢哋嘅甜品興趣更大，加上餐廳係以茶味雪糕馳名，所以呢次只係試甜食同飲品。


玫瑰花奶茶，聞落玫瑰味強烈，飲落同牛奶幾夾，又唔會甜到漏。不過我睇咗網上唔少人嘅相，佢哋啲熱飲杯入面都有隱藏動物公仔，可惜我呢杯係無嘅。


有見心太軟要等半個鐘，所以就叫咗茶味雪糕試試先，雪糕碎冰幼滑。普洱茶雪糕呈啡色，味濃郁甘香。玄米白茶雪糕食落有米香同顆粒，相對起嚟較普洱茶口味淡。


慕茶紫薯心太軟配雪糕，以為會係好靚好明顯嘅紫色，實際顏色暗沉偏啡。


好在心太軟中間嘅流心澎湃，外皮微脆內鬆軟，偶爾仲食到天然嘅紫薯味，當中夾雜蛋香。雪糕方面我就揀咗蜜糖茉莉花茶雪糕，色澤暗黃，茉莉花香突出，同樣微甜而清新。