[The Squirrel Coffee and Kitchen] 顯眼

 呢間晌勝利道附近嘅餐廳都幾顯眼。

松鼠特色蝦沙律，即係大蝦沙律。煎過嘅大蝦幾香，再加埋松子仁、車厘茄、雜菜之類，食起上嚟爽脆又香口，都算唔錯，不過呢個散叫都成八十蚊，有少少貴。

[Tom Bar & Grill] 普普通通

去科學園行吓，去咗呢間Tom Bar & Grill食少少嘢。

芝士條，雖然係用mozzarella cheese，不過侍應拎嚟嗰陣係唔熱嘅，冇拉絲效果，唔多唔少有啲失望。

香茅雞中翼，呢個反而係啱啱炸起非常熱辣辣，冇咩香茅味，但就好香蒜蓉牛油味，食落比芝士條好味。

有海景，下午茶嘢食唔特別，普通嘢但幾貴。唔知係唔係落場時間，侍應好似踢一腳先郁一郁咁，好多嘢要問佢先會俾（例如係餐具同水），又或者預咗嚟呢度啲人都係一次起兩次止掛。

[La Dolce] 碟上同木板上嘅分別

 去咗La Dolce食下午茶。

公司三文治伴薯條跟埋嘢飲，侍應拎嚟嗰陣有少少眼前一亮，估唔到係用木板上，薯條同茄汁仲另外用碗仔裝住。塊麵包係麥包嚟，中間就夾住芝士、火腿、蛋、生菜、番茄同沙律醬，食落爽脆微鹹。

同一樣嘅嘢，碟上同木板上，心態上都真係爭幾遠。

[Knockbox Coffee] 黑布街咖啡店

黑布街都幾多嘢食，今次就去咗咖啡店。

煙三文魚忌廉芝士比高包，包面有好多芝麻，食落比普通麵包扎實。入面係煙三文魚、忌廉芝士、番茄同生菜，鹹鹹哋咁，當中仲有少少檸檬汁嘅酸味。

鮮奶咖啡，順滑得嚟又有咖啡嘅烘焙香，幾易入口。

[雪山茶餐廳] 好大份嘅常餐

同朋友去咗呢間舊舊哋嘅茶餐廳，常餐入面有火腿煎蛋、牛油方包同忌廉湯，火腿煎蛋整得OK，牛油方包軟熟，忌廉湯就比較淡，無咩味。

個餐入面仲有雞扒飯，上面淋咗黑椒汁，啲飯仲要唔少，因為食咗頭先堆嘢有少少飽，再加埋呢個真係好飽，迫於無奈做咗大晒鬼食剩少少。

常餐除咗有以上嘅嘢，仲有埋嘢飲，份量仲要幾大份，真係好抵食，我諗細食嘅話兩個女仔share都得。

[Schwaz] 鹹窩夫甜咖啡

以為呢度係咖啡店，入到去燈光昏昏哋，個環境反而似係西餐廳。

碎蛋煙肉窩夫，呢個係鹹食版嘅窩夫，側邊仲有雜菜沙律。煙肉煎得幾香，碎蛋惹味得嚟唔算好漏，不過個窩夫唔脆同比較腍。

Mint Mocha，唧咗啲cream同薄荷醬晌上面，佢個朱古力味比較出，咖啡味反而唔濃，甜甜哋咁。

食物其實唔算好好食，不過就無乜人，都幾好坐。