[茶木] 台式晚餐

雖然茶木開咗幾年，亦都久仰其名，卻從未食過。


裝修主要係白色同木嘅嘢，入面有個用水管等等整嘅裝飾，望落好似棵樹咁。


餐牌封面係台灣地圖，入面編排有少少雜誌感。


日月潭紅玉紅茶黑糖奶蓋，有陣時都會去某某台式飲品店買珍珠奶茶，不過奶蓋反而係第一次試。由杯邊睇到佢分咗三層，分別係白色嘅奶蓋、啡色嘅日月潭紅玉紅茶、深啡色嘅黑糖，仲用咗乾玫瑰花同綠茶味嘅糖點綴。飲咗啖奶蓋，佢其實係質感綿密幼滑嘅奶泡。再飲多啖日月潭紅玉紅茶，有啲回甘，攪勻飲就有黑糖甜香，第一印象良好。


然後仲試咗其他嘢食，酥炸豬排肉燥飯，黏糯有嚼勁嘅珍珠米配上加咗冬菇粒嘅肉燥，旁邊有鹵蛋、醃鹹菜同青瓜，都幾惹味。酥炸豬排炸漿厚薄適中，外皮脆肉鬆化，惟骨位較多，食得較為唔方便。


佢哋嘅匙羹同叉嘅造型好似人哋啲泥鏟同泥耙，都幾得意。


鮮芒果義式冰淇淋奶酪，芒果雪糕下面係忌廉，旁邊仲有鮮芒果、藍莓同朱古力威化條，義式奶酪上就有芒果醬，酸度稍重，不過都可以攞嚟消滯嘅。

感覺上唔算非常特色，都係比較常見嘅台式食品，但幾啱自己胃口。

[燒魂一] 火氣大

呢晚去咗尖沙咀燒魂一食日式燒肉刺身放題，當日未計加一$268一位。


晌出面等咗陣先入得，佢哋有唔同顏色嘅點餐紙，細分咗幾個類別：牛、豚肉、海鮮、地雞、蔬菜、刺身、壽司卷物、火灸壽司、食事、潮燒、唐揚、一品、沙律等等，第一輪就每款畫少少嚟試試。

所有食物都係任點任食，不過罐裝汽水就限每人一罐。


每人有份秘製三色醬汁，我哋覺得中間嗰隻酸酸辣辣咁比較惹味。


先嚟嘅係刺身，我哋畫咗大甜蝦、吞拿魚、三文魚、劍魚腩同玉子燒，大甜蝦頗鮮甜、三文魚夠肥美，但吞拿魚同劍魚腩較多筋。


食完刺身就食日式燒肉，我哋畫咗牛類：黑毛霜降和牛、汁燒安格斯一口牛、黑椒一口牛肋肉、青檸蒜味牛舌、薄切牛舌、蔥蒜醬油牛肋肉、厚切牛舌、熊本一口和牛、牛裡肌。


可能因為開初我哋掛住傾偈，無好好睇住同留意啲燒烤時間，令到其中某啲一口系列比較韌。隨後燒嘅牛舌就幾爽口，質素唔錯。


中途就食啲蔬菜平衡下，畫咗雞髀菇、翠肉瓜、紅洋蔥、日本南瓜。佢哋將雞髀菇切開，再晌中間搽牛油，好邪惡但幾好味。


海鮮類以日本宮城蠔最驚喜，連殼（較平嗰面向下）燒大約三分鐘。


燒好先將蠔殼打開，蠔肉飽滿，食落味鮮滑溜，以放題嚟講質素唔錯。


最後食埋有機甜菠蘿。

當日心情麻麻，我自己食得唔多嘢。以放題嚟講食物係唔錯，只係偶爾嚟漏一兩款或比原本畫嘅數目少，不過就比某啲放題食肆嚟得足。佢哋冷氣仲好強勁，通風系統唔差，食完日式燒肉後身上都無乜討厭嘅油煙味。

[McCafe] 終於飲到梳乎蛋

上次飲唔到，呢次終於飲到梳乎蛋造型嘅Crème brûlée Latte（焦糖布丁鮮奶咖啡），雖然有啲移位，變咗輕微水滴型，不過同樣可愛。飲落奶泡比一般鮮奶咖啡濃厚綿密，鮮奶味唔係好出，俾焦糖味蓋過咗。

另外買咗件芝士蛋糕，口感都幾順滑，有淡淡嘅芝士酸香。

[Espuma] 熱溶嘅下午

去咗尖沙咀嘅H8，試吓呢間幾出名嘅Espuma，裝修都幾有特色，入面仲有彩色壁畫。


餐牌啲圖影得好靚。


招牌水果茶，餐牌寫係用台灣原片茶葉沖，入面仲有唔同嘅切粒生果，例如紅蘋果、青蘋果、橙之類，唔係好甜，都幾清新。


泡沫咖啡，以為會有拉花，原來呢款只係灑啲朱古力粉做點綴，有少少失望呢，不過咖啡都幾香滑，總算唔錯。


精選沙律，即係雜菜、鮮吞拿魚、煙三文魚、烚蛋配油醋汁，賣相幾靚。鮮吞拿魚表面沾咗香口嘅黑白芝麻，煙三文魚微鹹，雜菜口感爽脆，配上烚蛋同酸酸哋嘅油醋汁，健康飽肚。


焦糖單骨雞翼，焦糖嘅黏度強如麥芽糖，均勻咁沾晌單骨雞翼表面，較易食之餘亦香脆惹味。呢款要趁熱食，放到凍咗嘅話啲焦糖會凝固。


Afternoon Tea Set，用透明架上，係一個大大嘅e字。


一口吞拿魚配青瓜，輕辣嘅青芥末配青瓜，幾清新。
黑松露蟹肉酥盒，外層酥皮脆，惟黑松露同蟹肉味道稍淡。
炸魚配奇異果，帶酸嘅奇異果同醬汁中和咗炸魚嘅膩感。
白汁藍青口，鮮鹹彈牙。
水牛芝士桃肉串、水牛芝士草莓串，水牛芝士份量唔多，底層麵包多士有啲腍，草莓嗰份唔係咁啱我哋食。


咖啡朱古力鬆餅配奶油忌廉及果醬，鬆餅質感鬆化，滿口都係咖啡香，唔錯呀。
鮮橙果凍，味道唔假，酸甜消滯。
蘆薈椰子奶凍，蘆薈爽口，椰汁味濃郁討好。
草莓栗子撻、藍莓凍餅、焦糖香蕉朱古力餅，味道係較淡到較濃，三者之間我自己就覺得焦糖香蕉朱古力餅比較啱心水。

基本上食物都唔錯，惟當日係晏晝嚟，陽光比較猛烈，加上食客幾多，冷氣略為唔夠，坐咗好耐仍覺得好熱，流晒汗咁。

[PizzaExpress] 同唔係點食肉嘅人一齊食嘅話

同行有唔係點食肉嘅人，所以今次叫嘅嘢都幾齋。

好鍾意佢哋嘅麵包球，同番茄醬、牛油、青醬一齊食，又香又脆。


南瓜蓉醬，個南瓜蓉混入咗橄欖油同蒜蓉，以為辣辣哋，食落又幾清，有啲松子仁晌度都幾有咬口。

磨菇芝士醬，係用磨菇同大啡菇再加芝士汁整成，食落好香菇菌味，芝士味就一般唔太出。

輕盈沙律，入面有南瓜、牛油果、紅菜頭、扁豆、青豆、松子仁、菠菜同低脂芝士，再用黑醋調味，個配搭都真係幾健康，同埋唔算細份。

羅勒番茄薄餅，上面係羅勒、水牛芝士、車厘茄、青醬、番茄醬，雖然一塊肉都無，不過食落酸酸哋都唔錯，個餅亦都幾脆。

呢晚好似食素咁，久唔久唔食肉都幾好，不過我哋幾個都食得飽，如果係男仔嘅話應該只可以攝牙罅。

[McCafe] 有少少若有所失

 近排麥當勞同梳乎蛋crossover呀。

雞肉火腿碎蛋芝味多士，烘過嘅麥方包夾住碎蛋沙律、雞肉火腿（即係用雞肉做嘅火腿）同車打芝士，芝士焗到半溶，份量都唔算少，成件嘅味道有啲鹹不過都算討好，仲幾飽肚。


原本叫咗梳乎蛋拉花嘅Crème brûlée Latte（焦糖布丁鮮奶咖啡），落單嗰陣都無留意，到整好先發現收銀落錯咗Earl Grey Latte（伯爵茶鮮奶咖啡），見已經整好，自己又唔係話厭惡伯爵茶就算，飲落幾香同偏甜，叫做OK。

不過唔係我想要嘅梳乎蛋，硬係有少少若有所失，唯有下次叫嘢食嗰陣睇清楚收銀螢幕同第一時間核對收據啦。

[屋子咖啡] 清新但無驚喜

好耐無去屋子咖啡喇！


好似每隔一段時間都會換新menu，呢次係用兒時常用單行練習簿做設計藍本，就連封底都印咗九因歌，內頁文字同圖畫就係機械印刷出來。


被黑板上嘅季節限定甜品吸引，於是叫咗花漾鮮果窩夫配櫻花雪糕，賣相同佢哋其他窩夫差唔多，都幾靚嘅。佢哋嘅窩夫唔係平日常見嘅格仔形，而係好似冬甩咁環形嘅。最頂層係忌廉同香草，然後就係鮮桔子肉同香蕉片，內層就有吉士醬，碟上仲有焦糖醬，可以蘸埋嚟食。



佢哋啲忌廉唔膩，桔子肉甜多汁，吉士醬甜度唔高。窩夫就外脆內鬆軟，富彈性同帶微微蛋香。

伴碟嘅櫻花雪糕入面有少少（疑似）紫蘇葉碎，融化速度頗慢，就算我影咗陣相都無咩點變。原本以為食味會好假好人工化，實際甜度討好、帶陣陣葉子香，底下墊有拿破崙薄脆餅，可以單食或撕少少蘸雪糕食。

季節限定窩夫配搭幾清新，惟驚喜度唔大。

[Gangnam OPPA] 芝士！

去咗旺角彌敦道726號商廈入面嘅Gangnam OPPA，呢度又係一打開lift門就係間餐廳，佈局有啲似尖沙咀H8。


成個環境都充滿手寫韓文標語，廁所牆上隻狗仔好打耳。


聽講呢間嘅佈置係用Running Man做主題，仲有唔少惡搞化妝道具俾人晌場內借嚟影相。


有睇過Running Man都知道每集有唔同任務，餐牌就印住「餐廳裡出現了一羣受到感染的生物…」，仲擺放咗啲假骷髏頭同假斷肢，都幾有趣。


呢塊小木板係當想叫侍應嗰陣，舉起佢就得。


木板背面，雖然唔識韓文，不過依圖畫意思，應該係指想要一杯啤酒吧？


叫咗嘢食之後侍應就拎咗兩碟前菜嚟，分別係酸蘿蔔、泡菜同牛奶粟米。酸蘿蔔同泡菜都比較常見，泡菜辣度普通，亦無苦澀味，食唔到辣嘅都唔係問題。牛奶粟米就係第一次晌韓國餐廳食，味道偏甜感覺唔錯。


每檯都有小型桌上遊戲俾人玩，正好晌等食物嗰陣消磨時間，對呢個插劍木桶遊戲並唔陌生。玩吓玩吓，時間過得特別快。


奶油麵包炸雞，炸雞浸晌奶油浴之中，中間仲有吸汁度強勁、外脆內鬆軟嘅農夫包。奶油汁質感較稀，但仍可均勻地沾晌炸雞表面，都幾重牛油香。炸雞全都無骨，食落比較方便，旁邊嘅車厘茄就可以中和膩感。


三色板，佢有幾款配搭，我哋揀咗大豆芽炒豬肉、辣炒八爪魚、綜合韓國傳統煎餅、蛋卷同紫菜飯。餐牌建議先享用鐵板上嘅食物，隨後將餘下醬汁同紫菜飯炒勻嚟食。呢款蔬菜比例較多，相對起來健康啲啲，但味道就唔夠深刻。


芝士排骨，鐵板上面有八件豬肋排、廚師腸、吞拿魚紫菜飯糰、牛奶粟米，多到爆嘅Emmental Cheese實在令人瘋狂。

芝士晌爐上慢慢加熱溶化，無幾耐oppa仲主動走嚟幫我哋炒呀炒，仲逐一為每條豬肋排蘸上芝士，非常細心。


燒過嘅豬肋排仍然仲有肉汁，食落微甜討好，呢款嘅重點係芝士，份量完全滿足芝士控。

呢次啲嘢食綜合嚟講唔錯，只係用筷子食豬肋排嗰陣比較狼狽，如果有手套之類就會方便啲。