[What The Pho] 有少少泰國風味嘅越南菜

本身都幾鍾意越南菜，呢間What The Pho開咗都幾耐，但完全未食過，呢日趁去開呢頭就食吓。


裝修都幾新式，座位就晌商場走廊左右兩邊，無咩遮擋，途人就咁路過已經可以望晒成間舖。


打開餐牌，發現除越南菜外，呢度仲有唔少偏向泰國風味嘅菜式。咁越南同泰國地理位置相近，都叫做可以理解。


呢度用Pho命名，就決定試試佢哋嘅Pho（湯河粉）、Bun（凍檬粉）同前菜之類。


鮮蝦柚子沙律，蝦肉切半，以原整計實際大約係三幾隻。柚子肉香甜唔澀，醬汁辣味唔強，酸酸哋都幾開胃消滯。


香芒軟殼蟹米紙卷，半透明米紙皮煙煙韌韌，中間包住軟殻蟹、鮮芒果、胡蘿蔔絲、蘿蔔絲、青瓜絲、生菜絲同檬粉，惟軟殼蟹嘅脆度較失色。


越南四式凍檬粉，四式係指燒豬耳扎肉、燒肉串、燒豬頸肉同香辣豬手，另有番茄、青蔥、炸乾蔥，底層就係切絲嘅胡蘿蔔、蘿蔔、青瓜同生菜。先食上層嘅肉類，燒豬耳扎肉厚身爽口、燒肉串外層微脆、燒豬頸肉有香茅味、香辣豬手表面醬汁好似泰式辣醬，都幾軟腍。之後先食下層嘅檬粉，將所有配料撈勻，再加啲魚露，晌呢段溫度仍有少少高嘅天氣下食都唔錯嘅。


WTP火車頭湯河粉，呢度嘅河粉較幼細，以為份量巨型，原來同其他款式嘅湯河粉大小相若。入面有牛肉、牛腩、牛筋、牛柏葉同牛丸，牛筋炆煮得幾腍，牛腩同牛肉算鬆化，牛柏葉同牛丸就爽彈。湯頭方面，以洋蔥、芫茜、九層塔、芽菜同青檸提味，味道較清。


椰汁紅豆冰、芒果沙冰，沙冰打得細碎，味道幾甜。


越式千層糕，出嚟時微微哋暖，質感幾軟熟，仲加咗甜甜哋嘅椰汁，不過糕中間嘅千層就唔太明顯。

[Espuma] 灣仔高樓晚餐

去咗灣仔嘅Espuma，入口旁有個飾櫃，然後就係用半身玻璃窗相隔嘅半開放式廚房。


裝修同尖沙咀店相若，都係以木為主。


另外仲有幾個卡位。


之前去過銅鑼灣廿五樓鬧市景餐廳，呢日都係廿五樓，不過地點就換咗做灣仔區。


呢晚試咗餐廳嘅二人晚餐，$588（未計加一）包頭盤、餐湯、主菜、甜品同餐飲。


西班牙黑毛豬火腿配西班牙番茄醬及多士，多士烘到脆口，就咁食已有味道，或者可以加少少西班牙番茄醬一齊食，入面嘅番茄切得幾大粒而有咬口，當中仲加入咗香草等調味。碟上嘅番茄片煮到暖身，西班牙黑毛豬火腿乾身，鹹香度剛好，中間夾著蔬菜以中和膩感，另有豆苗、櫻桃蘿蔔同雜菜做點綴。


精選沙律，分別係煙三文魚、鮮吞拿魚、烚蛋、車厘茄、菠菜、紅生菜、豆苗、櫻桃蘿蔔等等，鮮吞拿魚表面沾有黑白芝麻，外層微微烤過，煙三文魚微鹹，配上其他蔬菜同酸酸嘅油醋汁，爽脆開胃。


雜菌湯，入面有幾多打碎咗嘅雜菌，每口都係菇菌香。干邑龍蝦湯，質感濃稠，湯內仲有蝦肉，碟邊嘅蒜蓉多士可以就咁食或用嚟蘸湯。另外佢哋用咗茶杯代替湯碗，飲到尾聲嗰陣將佢打斜就更方便。


黑松露醬炒鮮雜菌寬條麵，表面灑上巴馬臣芝士片，寬條麵質感較軟，當中嘅雞髀菇、鴻喜菇、冬菇同洋蔥粒有咬口，黑松露醬剛好提味，不過食落就有少少漏。


海鮮香辣橄欖蒜片意大利麵，海鮮包括墨魚、中蝦、青口等，當中以墨魚最爽滑，另外仲有紅椒增加口感。意大利麵方面煮得彈牙，雖然加入原條辣椒，但又唔會太嗆，微辣中帶羅勒香同蒜香。味道上有別於之前食過嘅西班牙菜，感覺較重口味，且有少少泰式影子，不過就幾討好，我哋仲覺得比黑松露醬嗰款惹味。


甜品就揀咗奧利奧曲奇意大利芝士餅，用咗黑白朱古力牌粉飾，再用oreo餅碎相間，蛋糕質感滑溜有奶香，只係芝士味唔太突出。另外，伴碟嘅士多啤梨、奇異果同龍珠果酸酸哋，可以中和膩感。


最後飲埋杯熱檸茶。


由黃昏食到入夜，又係另一個感覺。

[Green Waffle Diner] 薯粒鑊仔與窩夫

穿過嘉咸街街市，無幾耐就嚟到Green Waffle Diner，聽聞佢開咗好耐，不過今次係第一次嚟。


入面其中一面牆上用咗人造綠色植物點綴，多咗幾分舒適感。聽講佢哋晌平日午市經常爆滿，所以預先訂檯會較walk-in穩陣。但當日我晌下午茶時段嚟，食客就唔係好多。


呢個時段仲有較相宜嘅下午茶餐，餐牌大約兩星期左右轉換一次。


原來呢度除咗窩夫，薯粒鑊仔都好出名。我就決定散收一份薯粒鑊仔，再加窩夫下午茶餐，咁就啱啱好試晒佢哋。


Herbed Veggie Skillet，鑊仔上嚟時仲好熱，令食物食到尾仍然係暖嘅。雜菜有翠玉瓜、車厘茄、靈芝菇、青椒、洋蔥等，先將中間嘅水波蛋刺穿，等蛋黃汁漏出再撈勻先食。薯粒炸得外脆內嫩，當中夾雜咗車打芝士碎，加埋一齊口感豐富。份量方面，由於薯粒比較飽肚，對女仔嚟講都幾足夠，惟因為防黏底嘅關係，油份相對會比較多。


薯粒鑊仔係用鹽同黑椒等調味，我覺得就咁食已經夠味，最後只係加咗少少茄汁同辣椒汁提味咋。


Oreo Waffle with Vanilla Ice-cream，雪糕除呍呢嗱味外，仲有士多啤梨同朱古力味揀。Oreo Waffle係晌原味窩夫漿入面加啲Oreo餅碎，外焦脆內鬆軟有彈性，且帶微微蛋香，當中嘅餅碎幾有咬口。再用Oreo、呍呢嗱雪糕等做伴碟，仲灑咗朱古力漿同糖霜裝飾，甜度對我嚟講啱啱好唔太漏。


Americano coffee，帶果酸味，甘香易入口，我覺得唔加糖唔加淡奶都OK。

[Goobne Chicken] 居高臨下食烤雞

嚟到時代廣場附近新落成數月嘅V Point，呢度有唔少食肆，其中一員就係前年先落戶香港，分店已遍佈港九新界，來自韓國嘅韓式烤雞店Goobne Chicken。


lift門一打開就係接待處，附近貼咗代言人EXO嘅人形海報，非常吸睛。


座位分佈無擠迫感，其中一邊嘅設計有如玻璃屋，都幾時尚。


呢晚我哋坐晌呢邊。


可以居高臨下咁欣賞廿五樓嘅鬧市景。


五光十色嘅景致，真係好靚。


就連餐牌都好有型格。


呢度單係韓式烤雞已有十多款口味，另有十多款韓式料理，飲品都唔少。


呢晚決定食得健康啲，只係試韓式烤雞同沙律。


Mojito，呢個係無酒精版本，淡淡嘅薄荷葉同青檸味，可能因為冇酒精，所以同之前晌第二度飲嘅有少少唔同。


Shark Blood Rita，呢個都係無酒精版本。


杯上嘅鯊魚模型以插水式姿態出場，賣相吸引。藍色嘅沙冰打得幼細，飲落酸酸甜甜，開胃又消滯。


Tuna Salad，一大盤咁都幾有氣勢，如果全部女仔嘅話應該可以俾三至四人食。入面有吞拿魚鬆、烚蛋、粟米粒、車厘茄、黑橄欖、青瓜、羅馬生菜、紫生菜等，另灑上芝士粉調味，仲可以加埋特製沙律醬一齊食，清新得來又可中和烤雞嘅熱氣感。


Fruity Soy Garlic Chicken，餐牌寫雞件係不經油炸，全部用烤嘅方式烹調，比一般嘅炸雞較健康。雞件大小適中，拎上手仲熱辣辣嘅，外皮烤到微微焦脆，肉質嫩滑多汁，蘋果檸檬醬汁量多香甜，食落仲有啲蒜香同辣辣哋咁，啲味對我哋嚟講啱啱好。


另附上酸蘿蔔一小碟，可減膩感。

呢度優勝之處係位於銅鑼灣嘅廿五樓，景致開揚（留意，另一邊係望對面樓嘅樓景）。惟當晚坐晌用落地玻璃窗隔開嘅位置，感覺比較困聲，食客多嘅話可能會較嘈吵。

[東記] 大埔豬扒

呢日去到大埔墟街市熟食中心，就係為咗食東記嘅炸豬扒。

買咗份炸豬扒雞翼雙拼，比預期中大份，甚至連外帶盒蓋都閂唔埋，略為點算之下炸雞翼有六隻，炸豬扒就估計有兩塊。



豬扒同雞翼炸皮薄，脆身而無滲出多餘油份。豬扒肉質鬆化，調味得宜唔死鹹。雞翼多汁而有蒜香，兩者之中我就更欣賞雞翼多一啲。

由於份量太多嘅關係，我同朋友都食唔晒，就決定拎返去同人分享，事後證實就算擺到凍晒啲味道都無話變得太差，甚至仍留有少許脆脆嘅口感。

[Bene Italian] 少貴寧靜

午餐時間嘅沙田都係人人人，於是就去咗無人等嘅Bene Italian。

 
入面都無乜人，可能因為午餐定價接近一百至百多元，有少少貴，不過勝在人少唔迫又清幽。

 
同朋友叫咗午餐，有得揀配餐湯或者沙律，我哋一份揀凱撒沙律配香脆煙肉，入面有羅馬生菜、煙肉碎、烘麵包粒同巴馬臣芝士粉，羅馬生菜無變質發紅，食落爽脆，而且份量唔少。

 
另一份就揀咗雜菜沙律，有車厘茄、青瓜、火箭菜同雜菜，佢係用油醋調味，都幾酸香開胃。

 
鮮蟹肉番紅花意大利飯配枝豆及巴馬臣芝士，意大利飯入面嘅醬汁較豐富濕潤，米粒煮得比較腍身，對朋友嚟講較易咀嚼，胃部負擔亦較少。蟹肉唔多，但味道算鮮甜惹味，當中嘅枝豆可增強口感。


水牛芝士櫻桃番茄薄餅，配料係自選嘅，薄餅餅底薄脆帶韌性，口感比連鎖式薄餅店麵包般嘅質感更佳，上面鋪滿水牛芝士等等，且可拉出芝士絲，配埋櫻桃番茄同番茄醬一齊食，香而唔膩。

 午餐嚟講真係唔平，但就較同商場嘅餐廳寧靜，食完無人趕，仲可以留晌度接近個半鐘有多添。