[El Cerdo] CP值都幾高

荃灣廣場對面有間El Cerdo，門面睇落唔平，不過細心睇過餐牌後價錢其實唔太貴，呢晚就去試試。


其中一面牆上係一幅用反光物料砌成嘅巨型畫作，細心咁睇原來係隻黑毛豬圖案。


連餐墊紙都印咗黑毛豬圖案，同埋列出唔同部位嘅西班牙文，似乎黑毛豬係佢哋嘅招牌菜之一。


試咗Mojito，餐牌寫採用冧酒、鮮青檸汁、薄荷葉、糖同蘇打水調出嚟，酒味唔濃，對女仔或少飲酒嘅人嚟講比較易入口，薄荷葉同鮮青檸嘅配搭又夠清新。


然後係份量的骰嘅tapas，先嚟嘅係炸黑毛豬火腿球。


吉列皮炸得金黃香脆唔油膩，內層就係5J級黑毛豬火腿碎同軟白汁，口感creamy，似晌度食緊極之軟身嘅忌廉薯蓉咁，又有啲似中式嘅炸鮮奶，味道唔錯。


脆皮豬腩肉配蜂蜜蛋黃醬，豬腩肉嘅豬皮、脂肪同豬肉層次分明，豬皮脆卜卜，豬肉鬆化唔癡牙。蜂蜜蛋黃醬就加咗蒜蓉，酸酸甜甜咁可以減去膩感。


最後仲試埋傳統洋蔥薯仔西班牙奄列，用咗洋蔥、馬鈴薯同雞蛋等煎成厚身嘅圓形。


煎得外層焦脆，切片馬鈴薯同洋蔥絲軟腍，最內層仍然濕潤唔乾身。

感覺上食物質素幾好，以同類型餐廳嚟講定價唔貴，如果晌九龍或港島區應該要多三分一至雙倍價錢，CP值都幾高。

[米線陣] 帽子火鍋晚餐

聽講米線陣近月出咗帽子火鍋，趁開始轉涼就同人嚟試試。


以米線專門店嚟講，呢度嘅裝修都幾田園風。


自選米線嘅配料好似幾啱胃口，不過呢次我哋係為帽子火鍋而嚟，另外仲叫咗石鍋燒一齊試試。

帽子火鍋共有四款選擇，分別係泰式農村、麻辣、鮮茄同香菜濃湯，其中最前者係配雞肉等等，後三者就係肥牛同蟹籽肉丸等等。


有見同行人唔食辣，於是就試咗鮮茄帽子火鍋，侍應晌氣體爐上放上特製小鍋，外型猶如一頂倒轉嘅草帽咁，最外圍用嚟擺一人份量嘅火鍋料，例如係菜肉餃、扎肉、牛丸、魚蛋、油條、豆卜、番茄、蘿蔔、冬菇、芫茜同紅椒片，中間就放咗湯底。


肥牛同蟹籽肉丸就係另上嘅。


鮮茄湯入面本身已經有冬菇、京蔥同芫茜，先飲一啖湯底，微酸鹹香。然後就加火鍋料煮嚟食，肥牛切得夠薄，輕輕涮一涮即可，肉質就剛好鬆化唔韌。


蟹籽肉丸，絞肉入面撈咗啲蟹籽同馬蹄等等，軟綿中帶幾分咬口。其他嘅火鍋料味道正常，扎肉、牛丸同魚蛋彈牙，一口大小嘅菜肉餃易熟同埋食得方便，蘿蔔無渣，豆卜同油條吸滿湯汁後都幾美味。


食完所有食材後，就可以加埋個米線去煮。


然後就係DIY黑椒肥牛石鍋燒，同樣係放晌氣體爐上自煮嘅，石鍋入面有肥牛、芽菜、蒜蓉、洋蔥、京蔥、辣椒、芫茜、黑椒汁同黑椒粒。


另外跟堆三碟配料。


等石鍋入面嘅蒜蓉煮香後，就可以加五香肉丁同粟米去炒，之後就加車打同水牛芝士碎，撈勻後熄火即可，以防燶底。


烏冬質感煙韌，沾滿黑椒汁同黑椒粒就仲惹味，整鍋嘅味道微辣濃郁，感覺都算唔錯嘅。


兩個鍋都跟埋飲品，圓肉紅棗蜜入面有幾多原粒圓肉同紅棗片，飲起嚟滋潤。


肉桂蘋果蜜嘅肉桂足有半支，比一般用肉桂粉沖調嘅有誠意，蘋果粒令成杯嘢更香甜。

帽子火鍋嘅鍋邊除用嚟擺放火鍋料、減省一啲檯面嘅空間同貪過癮新鮮之外，好似無其他用途。不過換句話說，以一人份量嚟講配料幾豐富，加上跟埋特飲或冷熱飲品，以七十幾元嚟講都算抵食。

[禮賓傅] 內外兼備

同屋企人嚟咗中環安蘭街18號嘅禮賓傅。


lift門一打開，就見到中式佈置嘅玄關。


入面嘅裝修貴氣又新潮，水晶吊燈令個環境更錦上添花。


另一邊牆身就用咗香港嘅懷舊照片做裝飾。


餐牌第一頁係餐廳嘅簡介，指出大廚鍾建良先生曾經晌禮賓府工作，餐廳名為禮賓傅除取其諧音，亦有「細意款待」同「廚師」之意。


而家就算係我等平凡人，都能夠晌呢度試試大廚精心炮製嘅菜式。

羊城鴿鬆，用咗櫻桃蘿蔔、菊花同辣粉襯托。鴿鬆即係切粒鴿肉，仲加咗花菇、馬蹄等等炒香而成，用生菜包住，再淋少少甜醬一齊食，口感爽脆惹味。


百花釀蟹鉗，碟上灑咗啲花蕊，賣相滿分。吉列外皮炸得酥脆，咬開後打成起膠嘅部份好彈牙，中間仲清楚見到幾完整嘅蟹肉，蘸少少紅醋嘅話好似減咗啲油炸帶嚟嘅熱氣感。


蟲草花冬瓜燉水鴨湯，呢款係當日嘅師傅精選燉湯。燉湯色澤濃郁，同埋比一般嘅老火湯仲能夠保留食材原味。燉盅造型好似樹幹咁，入面除咗蟲草花同冬瓜，仲有花菇提味，水鴨就幾羶香討好，湯味鮮甜，同埋有滋補潤肺嘅功效。


香煎石斑配雙色蒸蛋白，器皿係半圓玻璃樽，再加幾朵食用花點綴，起初我仲以為係甜品嚟。黑松露醬令香煎石斑更顯馥郁，蒸蛋白分咗兩層，上層嘅紅色嚟自紅菜頭汁，下層就係原味蛋白，食落有蛋香，滑溜唔嚡。


蝦醬芥蘭煲，原個砂鍋咁出場，熱辣辣、嘶嘶沙沙咁，拎緊嚟時已經香氣撲鼻，芥蘭煮得軟身但仍然有啲爽脆感，蝦醬就香口得來味道啱啱好唔太鹹。


五味炸子雞，清遠雞雞皮炸得薄脆，雞肉極嫩滑有油香，但對女仔嚟講肥脂好似多咗少少少少少。


佢之所以叫做五味，其實係指嗰五款醬汁，蘸嚟食嘅話就有唔同感覺。逐一蘸少少嚟試試，洛神花醬，輕甜、可以減去雞肉嘅膩感；藍莓醬，稍甜同有果香；南乳醬，濃稠而較重口味；龍井淮鹽，鹹香中有少少茶味；鮮檸檬汁，清新同埋有清一清味覺嘅作用。

五者之中我哋都比較鍾意洛神花醬，味道溫和，同雞肉都幾夾。


香港炒飯，配料有蝦乾、叉燒、鹹蛋黃、欖菜、蔬菜粒、香蔥等等，飯炒得粒粒分明，油份可接受，啱啱好沾晌米粒表面，係一個既豐富又美味嘅炒飯。


蛋白杏仁茶，平時好怕飲比較假味人工化嘅杏仁茶，好彩佢香甜討好，杏仁仲可以養顏，當中仲加咗蛋白花增加咬口。

嚟之前以為係食舊派中菜，估唔到菜式會係內外兼備，味道令我滿足之餘又夠美觀吸引。服務就媲美西式嘅高級餐廳，入座時侍應會幫食客拉櫈同埋放餐巾，又久唔久走嚟加水收碟等等，整體嚟講係一次唔錯嘅體驗。

[Day and Nite by Master Kama] 第一印象唔錯

嚟到旺角山東街嘅Day and Nite by Master Kama。


稍早前捲起一股龍蝦包熱潮，有關食店相繼開業，呢間就係其中一員。


店入面嘅色調係淺藍同白色為主，牆上仲畫咗龍蝦圖案，不過距離太遠，加上當日餐廳食客幾多，走來走去嘅話好似唔太恰當，所以只係由遠處影下相咋。


卡位旁邊係一列玻璃窗，向出面望係波鞋街街景。


餐牌封面用咗多個唔同設計嘅logo合併而成，玩味十足。


翻一翻內頁，原來除咗西式菜式外，餐廳亦有串燒、烏冬等等日式食物供選擇，呢個真係有啲意想不到。然而呢次我哋係為龍蝦而嚟，所以主力試相關菜式，另加兩杯飲品。


隻碟印咗唔同圖案，簡單但幾靚。


想試Unicorn Dream，淺藍同粉紅色咁睇落好夢幻，不過應該係杯色素為主嘅飲品，啱啱好見附近有檯叫咗Cookie & Mint，個樣望落都幾靚，配搭亦好似比較啱口味同穩陣，於是就試咗佢。淺綠色嘅薄荷沙冰打得細碎，入面仲有幾多曲奇碎，甜度恰好，最頂層仲用咗oreo夾心曲奇同薄荷朱古力點綴。

眾多款飲品好似係為咗女仔而設，好多都係以外觀為先，就試咗已經算係冇咁花巧嘅Mint Lemonade，沙冰夾雜咗打碎嘅薄荷葉，檸檬味稍淡，但薄荷味濃郁，既提神又無負擔。


侍應推介龍蝦匯套餐，可惜我唔太想食烏冬，於是決定散叫兩款菜式。

烤蒜蓉牛油龍蝦，拎到出嚟已傳來陣陣香氣，賣相極為吸引。


半邊龍蝦上灑有蒜蓉等等，烤得剛好嫩滑唔韌，蒜蓉令龍蝦肉更鮮甜，而且仲有唔少肉汁，亦無任何雪味。


龍蝦包，用咗厚身嘅甜排包夾住半隻起咗肉嘅龍蝦。


龍蝦鉗大隻而完整，龍蝦肉同樣鮮味可口，麵包又烘得鬆軟有牛油香。


兩款菜式嘅木板上都跟咗一瓣烤檸檬同一小碗檸檬牛油，唧少少鮮檸檬汁就可以提味，檸檬牛油就creamy微鹹，淡口得嚟又有啲似芝士醬，用嚟蘸龍蝦肉食都唔錯。


雜菜沙律就有櫻桃蘿蔔、車厘茄、紫椰菜、紫生菜、菊苣同有啲似莧菜嘅小葉菜，上面灑咗啲睇落係即磨嘅巴馬臣芝士碎，仲加咗橄欖油，食落清新爽脆。


雙重炸薯條炸得外皮脆，表面灑咗啲鹽粒，金黃色嘅炸馬鈴薯口感較粉、偏橙黃色嘅炸番薯就軟糯微甜，我覺得炸番薯都幾好味，亦都比較特別。

未食過其他餐廳嘅龍蝦包，所以未能作出比較。不過第一次試，印象都唔錯嘅。