[巴希雅海灣重慶燒烤] 自助重慶燒

呢篇係之前仲凍凍哋嗰陣嫁喇，有朋友提議去大美督附近嘅巴希雅海灣重慶燒烤，我哋成班book咗三點，不過當日所見都冇咩人，似乎walk in都唔係問題，夜少少就難講啲。

呢度係要先俾錢，再入場，有分露天同有瓦遮頭嘅位，因為嗰日有毛毛雨，所以就坐咗有瓦遮頭嗰邊。自助任食三小時，包一罐飲品，再飲嘅話要加錢買，另收紙巾費同開爐費，蜜糖都要另外買。

蝦、蜆、金菇、菠蘿同香蕉都係按人頭計配給，其他嘢食就自己攞。

以自助燒烤場嚟講，呢度啲蔬菜類都幾多：冬菇、雞髀菇、翠玉瓜、茄子、南瓜、粟米、青椒、尖椒、蕃茄、韭菜、菜心，甚至有白果、蒜頭、大蔥、洋蔥。

肉類就都係大路嗰啲羊架、羊肉、豬頸肉、牛柳粒、芝士丸、多春魚、香腸、紅腸等。

重慶風味嘅燒烤爐，呢度係用環保炭，火唔夠猛，不過就襟燒啲，同埋無咁易燻黑啲食物。

燒烤場已經將食物用竹籤串好，唔洗自己叉。我哋食咗蒜蓉包、豬頸肉、魷魚、雞翼、多春魚、蝦等等，呢啲只係冰山一角，因為掛住食，都冇逐樣影相。

不過食物本身冇咩調味，要自己晌燒嗰陣掃啲辣粉、孜然粉、豉油、辣椒豉油之類。大家都話呢度啲豉油同辣椒豉油好稀，唔知係唔係溝咗水？不過食物本身質素係算OK嘅。

我哋都有燒菜，我覺得雞髀菇同粟米最好食，冬菇燒起嚟就易乾啲，都幾難燒。至於配給嘅菠蘿同香蕉就最好味，唔怪得要按人頭配給啦！

燒到咁上吓，就放個砂煲晌爐上面。

入面係先前配給嘅蜆，蜆肉都幾鮮甜同冇沙。

食完蜆之後，大家就用個砂煲整雜菜煲喇，仲特登攞啲杯去洗手間攞食水，再加入個煲入面。冇啦啦變咗炭爐版打邊爐，但係咁食好似仲快熟過燒呢！

以自助燒烤嚟講都唔錯，不過比較貴同出眾嘅食物就要配給或另外買。

[Cafe Marco] 唔驚喜，係好在食到最尾都仲會refill

同朋友去咗Cafe Marco食自助餐，因為掛住食，都唔詳細講其他嘢喇。

 食咗風乾火腿、煙三文魚、芝士同沙律之類，基本上都OK，不過椰菜苗就澀咗啲。

見啲海鮮呀嗰啲太多人拎，咁就轉去食甜品先。芝士蛋糕同檸檬撻酸酸哋都唔錯，呢度嘅macaron有唔同味，我拎咗焦糖、抹茶同朱古力，食呢樣都預咗係甜喇，不過都算分到咩味，唔係齋得個甜字。

呢兩款甜品個樣好似人哋啲分子料理咁，後面嗰杯係白酒果凍，前面係奶凍（唔記得叫咩名），上面啲粒粒其實係爆珠，賣相係幾靚，不過食落嘅話就唔係太啱我。

呢度仲有生蠔呀，不過每次只可以拎三隻，見少咗啲人排隊我就去拎喇。感覺上嗰晚啲生蠔比較細隻，肉質唔算肥厚。

趁人少少，拎咗凍嘅龍蝦，跟住去拎埋即煮開邊龍蝦，都係每人限取一隻，聞落好香，因為加咗黑椒之類去調味，食落比凍食嘅仲惹味。

食到尾聲，啲人開始食甜品，我哋見海鮮嗰邊refill咗啲長腳蟹，於是就拎咗幾隻返嚟，食落幾鮮味，唔怪得頭先俾人拎晒啦。

呢度嘅嘢食唔係太驚喜，不過就要有嘅都有，同埋仲有生蠔食，受歡迎嘅嘢食到最尾都仲會refill。原本想食雪糕，係mövenpick嚟，因為食得太飽，就放棄咗。