[Diletto] 環境雅致 食物精緻

由尖東站嚟到Diletto，入口面向漆咸道南，都幾易搵到。



呢度嘅樓底好高，格局有啲似酒店嘅餐廳。



絲花遍佈唔同角落，環境雅致。



抬頭一望都係花，裝修嘅感覺好女仔。



餐廳嘅午餐價錢大約百幾左右，亦有唔同嘅散叫菜式。我哋就叫咗兩份午餐，另加兩份甜品試試。



侍應先拎咗籃麵包嚟，麵包籃設計好特別，仲跟咗橄欖油同黑醋用嚟點麵包食。



午餐包一份沙律或餐湯，我哋揀咗各一。Daily Soup，忌廉湯入面有甘筍同黃椒粒等等。



Marinated Prawn and Pomelo Salad，用蝦肉、柚子、車厘茄、藜麥同酸忌廉砌成環形，望落精緻。蝦肉表面蘸滿青醬，食起上嚟惹味。柚子就多汁，藜麥有咬口，酸忌廉香軟，成個配搭都好開胃。



Garlic Calamari Spaghetti with Chili Flake, White wine, Parsley，嗰幾瓣花瓣令賣相升級唔少。魷魚口感彈牙，當中仲有車厘茄同蒜片。雖然加咗辣椒片，但食起嚟唔覺得辣，對我嚟講個味道夠，又唔會太濃。



Pan-Fried Salmon Fillet, Sautee Potato and Broccoli，三文魚扒嘅魚皮煎得脆口，魚肉嫩滑。



伴碟有西蘭花、炒薯仔片同炒洋蔥，炒洋蔥有少少甜味，既好食又解膩。



餐飲方面揀咗熱檸檬茶，餐廳用嘅茶壺茶杯款式都好女仔，就咁睇都覺得開心。



Tiramisu，用咗一粒粒嘅疑似手指餅點綴，簡單但幾靚。食起嚟咖啡味對我嚟講啱啱好，仲有淡淡酒香，甜味又唔會太高。



Creme Brulee，隻鴨仔好似晌度浸緊泡泡浴咁，好得意。



鴨仔係用白朱古力整，而泡泡同花瓣都可以食架。



另外，碟上面仲鋪咗黃色海綿蛋糕、藍色啫喱、花形白朱古力同酸酸哋嘅碎糖，成件事好色彩繽紛。



撥開浴缸上面嘅泡泡，下層就係有啲軟身嘅法式燉蛋，入面仲有雲呢嗱籽，味道討好。

服務方面，侍應會不時走嚟收碟或加水，舉手又會即時嚟幫手。食物方面就幾有心思，三文魚扒更見出色，份量對女仔嚟講就啱啱好。

[Layback Cafe & Bar] 鬧市咖啡店

嚟到呢間位於尖沙咀鬧市，嘉威大厦入面嘅Layback Cafe & Bar。



餐廳嘅面積唔算大亦唔算細，入到去有少少似去咗人哋屋企嘅感覺。



由佈置睇嚟，似乎花咗唔少心思。



佢哋另外仲有室外座。



走出去八卦一下，座位比室內仲多呢！



呢度仲有個有少少日式feel嘅高台位，坐晌上面食嘢嘅話應該幾得意。



食物方面選擇唔太多，主要以意粉同小食為主。



佢哋始終係間樓上咖啡店，所以飲品餐牌就豐富得多。



呢次叫咗幾樣嘢試，等咗陣店員就拎到嚟喇。



芝士煙肉焗有機大燒烤菇，幾乎每次睇到餐牌入面有類似嘅菜式嘅話都會叫嚟食，因為配搭穩陣又唔易失手。



大燒烤菇juicy，中間嘅芝士有微微拉絲效果，配埋煙肉絲，正常嚟講無可能唔好食。



香蒜白酒蜆肉露筍扁意粉，用四隻連殼蜆肉點綴，賣相吸引。扁意粉軟硬度適中，蒜味香濃，微辣惹味。當中仲有唔少蜆肉、磨菇片同露筍，以一間樓上咖啡店嚟講水準唔錯。



貢菊杞子茶，睇住啲花晌壺入面飄浮，唔知點解有種莫名嘅治癒感。



菊花芳香撲鼻，杞子清肝明目，飲起上嚟仲有陣陣甜味，好順喉。



士多啤梨朱古力沙冰，餐牌寫係新出嘅。同士多啤梨一齊打碎，令朱古力多咗份果味酸甜。



藍莓芝士蛋糕，上面嘅藍莓醬都幾多。芝士蛋糕香軟微酸，完全唔覺得漏。

雖然離尖沙咀地標The OXX唔遠，但就有種幽靜嘅感覺。平日夜晚嚟到，食完嘢之後都無被催促離座，睇嚟係個唔錯嘅休息地方。

[肚餓了串燒烤焗專門店] 人氣串燒店

早年已經聽過亞士厘道嘅肚餓了串燒烤焗專門店，以為熱潮會冷卻，到埗後見座無虛席，睇嚟食串燒真係無興唔興呢樣嘢。



選擇都幾豐富，呢次我哋就叫咗幾樣嘢嚟試。



檯上面已經放咗一系列調味料，例如係孜然粉、辣粉、黑椒同鹽，不過我覺得串燒已經夠味，所以都無另外再加喇！



叫完嘢食無耐，店員就陸續將啲串燒拎嚟。

惹味燒厚切牛舌，的確好似個名咁切得好厚，口感爽口，牛味濃郁。



惹味燒安格斯牛柳粒，表面醬汁香，肉質軟嫩。

兩款牛類串燒之中，我比較鍾意牛舌多啲，原本仲叫咗串燒京蔥牛舌尖，可惜當日已經賣晒無緣一試。



脆燒日本鰻魚，食起上嚟軟綿綿咁。



蒜蓉燒原條茄子，面層嘅蒜蓉好惹味，不過啲油就比較多。



汁燒雞髀菇，醬汁微鹹中帶甜味，同埋切成幾件，食起上嚟幾方便。

汁燒秋葵，外層爽脆，入面就有潺滑口感。



紫金甜薯串，食啲甜甜哋嘅嘢可以中和一下。



黃金薯條，呢個係佢哋嘅名物之一，薯條炸得脆身，表面仲蘸滿起沙嘅鹹蛋黃，既邪惡又美味。



四式燒蠔，分別加咗芝士、黑松露香菇醬、蒜蓉、黃金醬燒成。芝士鹹香兼可以拉絲、黑松露香菇醬濃郁、蒜蓉香甜、黃金醬微酸同埋撈咗粟米同蟹柳絲。四款口味各有特色，我比較鍾意黑松露香菇醬，不過就將蠔肉本身嘅味道蓋過。



冬陰公汁烤焗翡翠螺，拎到嚟時香噴噴，湯汁幾有鮮味，對於我呢類算食到辣嘅人嚟講辣度都唔弱，真係估佢唔到。主角嘅翡翠螺有十幾隻，全部都肥大彈牙，仲有啲金菇、冬菇、雞髀菇晌度，成份個份量都真係幾多。



呢晚仲試埋Pear Cider，啤酒味唔會太濃，對女仔嚟講幾易入口。

[Mimosa Pudica] 荔枝角午餐

最近知道億利工業中心入面新開咗呢間Mimosa Pudica，呢日就嚟試試。入口附近擺咗怕羞草，同店名首尾呼應。

入面環境唔錯，窗上面嘅小鹿玻璃貼好夢幻呀！



餐墊嘅樹林圖案，都幾有特色。



檯上面嘅橄欖油黑醋樽既可以用嚟做裝飾，又有實際用途。



佢哋午餐價錢由七十幾到百幾不等，下午茶就由四十幾至八十幾左右。



我叫咗份午餐，先嚟嘅係番茄沙律，除咗番茄之外仲有牛油生菜、紫生菜、紫椰菜、櫻桃蘿蔔，蔬菜爽脆，配埋芝麻醬幾開胃。



周打海鮮湯，入面有唔少蜆肉、魷魚同切粒西芹等等。跟埋嘅牛油蒜蓉多士烘到脆脆哋，用佢蘸湯食都唔錯。



紐西蘭西冷牛扒配馬沙拿燒汁，伴碟有燒茄子、意大利青瓜、西蘭花同薯蓉。



西冷扒煎得香口，食起嚟唔會太濃又啱啱夠味。



我仲加多咗份Tiramisu，口感軟綿都算討好。



蝶豆花梳打，呈漸變紫紅色，味道唔濃，以賣相取勝。