呢間The Captain’s House同其他晌H8嘅餐廳一樣，其中兩邊係玻璃窗。
日頭可以採納唔少自然光，加上十八樓中高層位置，既開揚又光猛。
呢邊就掛咗氫氣球吊飾，都幾別緻。
為咗方便食客進食甲殼類海鮮，佢哋仲提供咗不織布圍裙，咁就唔怕整污糟衫褲喇。
同埋有拆殼用嘅較剪同小工具。
西餐廳嘅海鮮拼盤多數係凍食，呢度馳名嘅熱船長海鮮拼盤就係熱食嘅，聽講係參考美國新奧爾良人食海鮮嘅方法，呢日嚟到就決定試試。餐廳先將海鮮煮好，之後將所有食材同醬汁放入耐熱袋，再用魚網袋包住，就好似一袋漁獲咁。
侍應主動幫我哋影相之後，猛力搖幾搖個袋令到醬汁均勻咁沾晌食材之上，跟住小心翼翼咁將佢打開，蒸氣同香氣即時冒出。
醬汁揀咗卡疆蒜蓉汁，辣度啱啱好惹味，食起嚟仲有蒜蓉甜味，都幾香濃，只係有啲啲偏油。
海鮮就試咗其中五款，當日嘅麵包蟹非常大隻。
八爪魚仔就有嚼勁，扇貝彈牙，蜆同青口屬中型大小，配埋醬汁一齊食幾美味。
除咗海鮮之外，當中仲有新薯、肉腸同粟米，令口感更豐富。
食海鮮最適合飲酒精類飲品，不過對cocktail嘅認識唔深，有見餐牌詳列出各款式嘅成份，於是試咗以前無飲過嘅Peach Bellini，餐牌寫係用桃、青檸汁同Prosecco調配，飲起嚟酒味濃郁，有少少辛喉感。
同樣係第一次試嘅Flambe Yellow就用桃、荔枝、橙汁、菠蘿汁同Vodka調成，既有果酸甜香，又有酒精餘味，似係果汁咁，對女仔而言比較易接受。
沒有留言:
張貼留言