[酒鍋] 穩陣午餐

上次試過銅鑼灣酒鍋嘅點心覺得唔錯，呢次就試試尖沙咀店嘅午餐。



裝修都係新派路線，窗邊就透咗唔少天然光。



佢哋以火鍋馳名，不過午市就係飯、麵、壽司、刺身為主，同埋免收加一。



揀午餐嘅話可以加配草本茶，分別係竹庶茅根同紫貝天葵，前者甘甜討好，後者酸香清熱，同埋用咗燈泡造型嘅杯，玩味十足。



當日嘅沙律係青瓜絲、蟹柳同蟹籽，咬起嚟幾爽脆。



原隻灌湯小籠包用細細個嘅蒸籠裝住，賣相可愛。不過就無蒸籠紙，小籠包個包底有少少癡住，雖然有啲可惜，但佢外皮煙韌，總算唔錯。



牛肉籠仔飯嘅表面灑咗蔥花，蒸飯之上仲鋪滿牛肉、木耳、魚仔乾、秀珍菇等等，牛肉係比較有嚼勁嘅肥牛片，其他配料都幾惹味。要留意餐牌寫佢係微辣，實際辣度都唔弱，平時唔太食辣嘅人就要注意一下。



海鮮籠仔飯同樣灑咗蔥花，不過就用蒜蓉調味，打開蒸籠蓋時香氣極之誘人。



入面有大量青口、珊瑚蚌、帶子、蝦、墨魚仔、秀珍菇等等，各款海鮮口感彈牙。米飯蒸得粒粒分明，有咬口但又唔會太硬，同埋吸滿海鮮精華，相對而言表現就出色好多。



最後就係豬骨湯，湯色奶白，個味都幾濃。

午餐嘅選擇驚喜度唔大，但味道係唔錯嘅。對佢哋嘅火鍋非常非常非常有興趣，有機會都想試試。