[Doodie Cafe Bar] 唔算特別，但唔係hea

呢晚同朋友嚟到荃灣嘅Doodie Cafe Bar，兩個人分別叫咗：

番茄salsa醬熱狗（$48），個醬整得有啲怪，有少少泰菜feel，但又唔係話難食，只係唔算討好。

小食拼盤（$58），即係德國香草豬肉腸、芝士豬肉腸拼啤酒薯條。啲腸係切開一片片上，食起上嚟都幾方便。薯條係用啤酒炸漿炸，外皮脆口，入面就保留咗薯仔本身嗰種質感。

炸魷魚圈（$88），額外有個他他醬跟埋一齊食，都OK。

 我哋兩個另外叫咗支啤酒（$60）同Mojito（$70），Mojito啲薄荷同青檸嘅味道唔係好出，一般般。

唔知係唔係我哋兩個揀嘅嘢唔係好啱，感覺上唔算特別，不過都睇得出係花過心機，唔係hea嗰種嚟嘅。

[錦榮餐廳] 芝士下午茶

去葵涌廣場買衫，search咗附近有咩食，被錦榮餐廳啲拉絲芝士吸引咗，咁就順便去食個下午茶。

都係一貫港式茶餐廳格局，燈光充足、裝修簡潔。下午茶餐除咗有三文治、多士外，仲有炒粉麵等等，定價$28至$30不等，包一杯熱飲，都算合理。

我呢次係為咗芝士而嚟，原本想叫芝士肉醬焗通心粉，不過怕食得太飽，見有芝士肉醬焗多士（$28），就轉軚要佢。

厚多士塗滿番茄肉醬同碎芝士，再入爐焗脆，當日嘅芝士拉絲效果唔明顯，好彩芝士份量多，完全滿足到我呢個芝士控。唯一要彈係番茄肉醬質感比較濕，令到麵包變得腍身，味精濃度亦唔輕，食完都幾口渴。

熱奶茶，茶味稍淡，不過整體都幾順滑嘅。

芝士比例慷慨，以定價廿幾三十蚊嘅港式下午茶嚟講，都已經算叫有誠意。

[津津有味] 彩虹雞蛋仔

去咗天水圍同家人食飯，好耐都冇去新北江呢頭喇，晌IG留意咗津津有味啲雞蛋仔好耐，就趁機買嚟食吓。

四色星星雞蛋仔，清楚見到紫、綠、紅同啡四種顏色，分別代表香芋、蜜瓜、士多啤梨同朱古力四隻口味，除咗後三款之外，香芋嗰款係完全食唔出有香芋味，另外嘅就係人工化香料味（尤其係蜜瓜），不過食得呢類色彩繽紛嘢都預咗。

大部份雞蛋仔入面都釀咗粒蜜糖星星，食起嚟脆卜卜。

整體嚟講偏硬，唔算好好食，但都幾得意過癮。

[媽咪雞蛋仔] 番薯雞蛋仔

呢間同平時嘅小食店有啲分別，佢係設有堂食座位，除雞蛋仔外，仲有窩夫、雪糕三文治等等。

 俾錢後等咗陣，我嘅番薯雞蛋仔（$22）就整好喇。

撕咗一粒落嚟，見到入面填滿咗紫心同黃心番薯蓉，都算係咁啦。

如其他食家所講，番薯蓉令到雞蛋仔有啲濕同腍，除咗頭先嗰粒外，其他都唔能夠撕出完整一粒。冇外皮脆、內餡如小蛋糕嘅質感，只係番薯蓉比例多呢part優勝。

今次食呢款口味純粹為追求新鮮感，下次都係食返原味算喇。

[牧羊少年咖啡茶酒館] 飲嘢

同朋友去咗牧羊少年咖啡茶酒館飲嘢。


Mojito，個樣都幾靚，係用青檸、薄荷葉、梳打水同酒溝出嚟，酒精味唔濃，好易入口。


我就飲玫瑰綠茶，可以美顏同抗氧化嘛。


已經食咗嘢喇，所以只係叫咗個小食，呢個拼盤有春卷、咖哩角、薯條、洋蔥圈、魷魚圈、腸仔、芝士腸、八爪魚丸、魚柳、雞翼同雞肉串，樣樣幾件幾件，拼埋一齊都幾豐富。食落香口同脆身，可以蘸埋茄汁、沙律同芥辣一齊食。

靜靜哋咁偈吓飲吓，都OK。

[美滿餐廳] 價錢唔平，不過都算對得起個價錢

今日陪家人行吓買吓嘢，求其去咗VCity對面嘅美滿餐廳，坐低先發現其實都唔係好平。叫咗兩份睇落比其他餐抵少少嘅特餐，都要$42一份架。

 熱奶茶、熱阿華田，熱奶茶無茶香，似飲緊淡奶咁。

鮮茄薯仔肉碎湯螺絲粉、鮮茄薯仔肉碎湯米線，番茄、西芹、薯仔同紅蘿蔔嘅份量算多，酸酸甜甜，食起嚟都冇咩太重味精，尚可，不過螺絲粉就煮得腍咗少少。

奶油脆豬仔包配鮮奶炒蛋及豬頸肉、牛角包配鮮奶炒蛋及香煎豬扒，我係食豬頸肉嗰份，奶油脆豬仔包脆口，鮮奶炒蛋都幾滑，但豬頸肉油份好多，碟上清楚見到有一小灘油，幸好調味OK，配搭上對得起四十幾蚊呢個價錢。

價錢唔平，唔難食但又唔算非常好食，勝在蔬菜比例多，比平日嘅茶餐廳特餐「健康」。