[Sky726] 睇出廚師心思

好姐妹轉新工有一段時間，沒都無好好同佢慶祝一下。呢晚我哋就去咗位於旺角彌敦道726號嘅大廈，前排已經食過其中一層嘅韓國菜，發現差唔多全棟都係食肆，呢次就試吓最頂層二十五樓嘅Sky726。

 lift門一打開，落地玻璃鬧市景已盡入眼簾，餐廳中間位置係酒吧，座位就分佈晌旁邊唔同位置，感覺就似圍住一個小型舞台咁。

由另一個角度睇，入口附近有個用繩結編織而成嘅巴黎鐵塔，如果再企正中啲，就會出現畫晌lift門嗰對翅膀晌鐵塔間伸出嚟嘅錯覺，似乎有啲特別意思。

 連後樓梯同男女廁門上都畫咗唔同嘅畫作，幾有型格。

 餐廳最尾係廚房，可透過半身玻璃窗一睹廚師工作嗰陣嘅風采。

 最吸引人嘅地方係呢列落地玻璃，自問經常去旺角，卻係首次居高臨下咁欣賞佢嘅景色。

嗰日仲係日落時分，景致醉人浪漫，都幾適合情侶。

 睇過靚景，係時候將焦點放返晌餐牌上。

佢哋細分咗幾個類別，包括沙律、前菜、湯、配菜、主菜同甜品，亦提供數款由三百多到四百嘅set dinner，另有平板電腦俾人揀cocktail類飲品。

 侍應先安排咗餐包俾我哋，麵包經烘暖質感鬆軟，可以配橄欖油同黑醋汁一齊食。

 Very Berry，餐牌寫係用士多啤梨、藍莓、紅桑子、鮮檸檬汁、蘋果汁同菠蘿梳打調配而成。飲落有雜莓酸香，幾開胃。

Mojito，呢個係用鮮青檸、薄荷葉、Bacardi Carta Blanca（百家得蘭姆酒）、Angostura Bitters、梳打水同糖漿調配。青檸同薄荷葉味道突出，然後係帶啲苦澀但討好嘅酒香，對於唔太識飲酒嘅人嚟講係入門級選擇。

煙三文魚沙律，切成薄片嘅青瓜圍住外邊，中間分別放咗煙三文魚、紅洋蔥、車厘茄、酸豆同雜菜。從呢個角度睇煙三文魚仲有啲似朵玫瑰花，蔬菜鮮嫩爽口，配上廚師自家製醬汁，食落清新。

 燒番茄大茴香雞絲濃湯，中間放咗啲雞絲，湯內係滿滿嘅番茄蓉，對我嚟講幾啱胃口。

 香煎鵝肝伴青豆蓉焦糖洋蔥，呢道菜嘅擺盤非常靚。鵝肝灑有蔬菜等等，底層墊有用焦糖炒過嘅洋蔥，入口即溶而帶焦香，碟上仲有creamy嘅青豆蓉同埋酸酸哋、甜甜哋嘅醬汁，蘸少少一齊食可以將鵝肝嘅膩感中和。

 煎慢煮煙燻羊冧，早已聽聞用慢煮方式去處理肉類，可以保持佢嘅鮮味同肉汁。煎羊冧肉嫩腍軟羶味適中，面層鋪上輕輕燒過嘅黑白芝麻等果仁碎，甜香有嚼勁。

 扒波托貝洛蘑菇雜菜配香草意大利粉，呢款係素食版菜式。波托貝洛蘑菇（Portobello）即係我哋平日食嘅大啡菇，另外仲有黃色同綠色嘅意大利青瓜同雜菌，意大利青瓜其實係西方版翠玉瓜，甜香爽脆。不過用香草同黑椒等調味嘅意大利粉煮得較硬身，如喜好軟身質感嘅話就要留意返喇。

焦糖燴啤梨，平時成日食紅酒燴嘅，用焦糖燴就係第一次試。啤梨入味香甜，同酸勁十足嘅紅桑子、脆口嘅杏仁片同混入呍呢嗱籽嘅雪糕一齊食，甜度平衡。因為我自己偏好酸味食物，所以較喜歡平時嘅紅酒燴啤梨多啲啲。

呢度無論係環境、食物賣相都好靚，可以晌每道菜中睇得出廚師嘅心思，服務上亦可以講係一絲不苟。

[達人包車] 又係芝士嘢

想試尖沙咀間達人包車好耐，原來最近佢哋晌銅鑼灣新開咗分店，咁就同晌港島區返工嘅朋友一齊去食。


叫嘢食可以按檯上嘅鐘仔，侍應就會自動走過來。觀察所得店內嘅oppa（男侍應）全都係韓國人，須以韓語或英語溝通，女侍應就較多係香港人。


前菜有醃蘿蔔青瓜、粟米沙律、泡菜。醃蘿蔔青瓜微酸、粟米沙律偏甜，泡菜就唔係好辣，三款嘅味道都係稍輕，應該係怕會喧賓奪主吧。


Mango Ade，係用芒果汁等等調配，飲落偏甜。


芝士排骨（五件），一向鍾情芝士類食物，難得朋友都鍾意，就揀咗嚟試試。


加熱至半溶嘅芝士拉絲效果幾強，oppa以純熟嘅手勢將芝士纏繞晌豬肋骨上，隨後我哋DIY時就顯得有啲狼狽。食落醬汁甜辣惹味，肉質軟腍鬆化唔癡牙，仲可以輕易同肋骨分離，就算單用筷子食都算方便。平底鍋上面仲有韓式年糕、脆皮腸、芽菜、車厘茄、紫菜芝麻飯糰，我自己比較鍾意用佢啲韓式年糕點芝士嚟食，煙煙韌韌幾有咬口。惟醬汁入面嘅水份揮發後，有越煮越辣嘅感覺，平日唔太食得辣嘅人可能要注意一下。

當晚冷氣強度一般，加上我哋揀咗鍋類食物，感覺上就熱上加熱。

[川燒] 好多芝士

呢日去咗佐敦間川燒，個招牌好中式嘅感覺，好似黃飛鴻電影嗰種武館咁，幾得意。


串燒嘅選擇幾多，有啲仲係出面唔常見，因為第一次嚟，好多都想試。


佢哋每檯放咗竹籤座、孜然粉同辣粉，不過當晚啲嘢食本身夠味，我都無用到佢哋喇。

青檸話梅梳打，鹹鹹酸酸，話梅仲可以促進口水分泌同消滯。


燒墨魚香腸，外表唔吸引，食落就甜甜哋，中間包住爽口嘅墨魚肉，我自己覺得唔洗蘸沙律醬就咁食都OK。


川香肉碎燒茄子，正常情況下燒茄子都唔會差得去邊，佢哋加咗肉碎、青蔥、番紅花（一直以為係薑絲）同白芝麻，仲有微微辣嘅醬汁，上碟之前預先切咗數小件，食得幾過癮。


燒芝士脆脆餅，呢個係新嘢嚟，外層非常脆口，餡料就有煙肉同芝士等等。我哋對佢個外皮充滿疑問，總之唔似一般麵包等等嘅質感，不過又唔記得問到底係咩嚟。


黃金芝士燒原隻龍蝦，個賣相好靚。原隻龍蝦面層用香草、洋蔥、芝士同酸酸甜甜嘅醬汁覆蓋，另外有蟹籽等作點綴。因為原隻燒嘅關係，龍蝦鉗有少少乾，不過龍蝦身就肉質彈牙，當日個龍蝦頭入面仲擠滿蝦膏。


蘋果雪葩，以為係一球球嗰種，原來係原個蘋果上嘅，入口冰涼清甜，都唔錯。

[一起果醬] 無肉午餐

呢日去咗尖沙咀嘅一起果醬。

 薄荷綠色嘅門面，門外仲泊咗架用嚟裝飾嘅單車。

 仲有個類似吧檯嘅位置。

 另一邊就展示咗佢哋啲自家手工果醬。

入面其中一面牆上有JAM字樣，另一邊就係仿草披牆。

個裝修都幾靚。

去到嗰陣過咗午餐時間，但未到晚餐時間，只可以散叫。呢日想食得健康啲，所以只係揀無肉類嘅食物。

大啡菇沙律配玫瑰蘋果油醋汁，賣相唔算出眾。 玫瑰蘋果油醋汁微酸，大啡菇肉厚juicy，入面仲有雜菜同車厘茄，都幾清新。

黑松露野菌意大利燴飯，相對起來呢個嘅外表就吸引得多。對我嚟講意大利米煮得軟硬度恰好，當中仲有雜菌例如係雞脾菇、香菇等，另加入洋蔥同芝士提味。黑松露夠又唔會太嗆，食落惹味。

 玫瑰蘋果茶，總算甜香討好。

水果森林，睇咗佢哋個fxxxbook專頁嘅介紹，於是叫嚟試試。侍應將茶壺同茶杯拎嚟時，仲跟埋個沙漏，等上面啲沙全部流到下面（三分鐘）就可以飲喇。

根據佢哋fxxxbook所講，呢款茶係用洛神花、青提子乾、玫瑰果、橙皮、黑莓葉同幾種果乾如士多啤梨乾、蘋果片、菠蘿片、芒果片、木瓜片等等沖泡而成。

聞落有啲似香薰蠟燭嘅感覺，飲落就酸酸甜甜。

 最後仲試埋果醬九宮格多士。


烘至微脆鬆軟嘅麵包上有九款唔同口味嘅自家手工果醬，其中以雜莓、士多啤梨、肉桂蘋果較為突出，同麵包一齊食嘅話甜度就剛好。

[Valerie] 罪惡感唔大

早已對佢哋嘅Salute to Rocher（向金莎致敬）略有所聞，佢哋只有工場，不設門市，所有蛋糕都要預訂，可以晌舖頭自取或指定地鐵站等等地方交收，訂滿指定金額有上門送貨服務。


睇咗佢哋網站，呢次就訂咗幾款小試一下。

三件minicakes分別用兩個紙盒裝住，裡面仲有小冰袋保溫，同埋用透明膠袋包好（冰袋），以防水氣沾濕，都幾細心。每件minicakes嘅紙托下貼咗膠紙，我晌人潮最旺時攞住佢哋，中途左穿右插咁閃避啲人，返到屋企都仲完好無缺。



Tofu Garden，當日嗰件無網站參考圖嘅食用花，不過賣相都好靚。上面有士多啤梨、黑莓、芒果點綴，反光效果來自生果本身，唔係好似某啲連鎖式餅店咁掃一層魚膠水。芝士蛋糕食落軟滑，豆味突出，底層消化餅壓得既平均又鬆化。整件甜度輕微，配上雜莓醬、柑橘醬同薄荷葉，味道清新。


The Summer Cake，同樣無咗食用花，但用薄荷葉裝飾，嗰兩小片白金箔仲令佢有幾分貴氣。佢係用紅桑子鏡面啫喱、椰子慕絲、斑蘭蛋白蛋糕、菠蘿啫喱同朱古力脆脆組合成七層，一齊食嘅話先係試到紅桑子酸香，隨後椰子味慢慢透出嚟，當中仲混有椰絲。最底嘅朱古力脆脆帶啲榛子味，有啲似金莎。食落都幾有層次，亦無乜膩感。


Salute to Rocher（向金莎致敬），用咗金色錫紙包住，從表面睇的確好似一粒放大咗少少嘅金莎。


最外層係混有榛子碎嘅朱古力脆皮，中層雲呢拿慕絲清淡，內裡包住軟滑嘅朱古力榛子醬，仲有朱古力脆脆同原粒榛子。


起初係貪得意試試，以為會甜到漏，實際味道卻平衡討好。


迷你宇治抹茶月餅禮盒（四件裝）。


個職員仲細心咁提醒月餅嘅建議保質期，存放室溫係七日，冷藏就一個月。


月餅個子小小，佢哋聲稱採用京都宇治抹茶粉整嘅。外皮香脆鬆化，餡料微甜富奶香，食完有回甘。

感覺上佢哋啲出品甜度唔重，加上無防腐劑，食完後罪惡感都唔大。