港島區唔少位置都見小精靈蹤影，身邊嘅訓練員完成任務後。就去離鰂魚涌地鐵站數分鐘步程嘅Bake N Grill食晚餐，順便捉多幾隻返去。
以粉紅色做主調，好女仔嘅感覺。
呢度仲有室外座。
話就話係室外，不過就有帆布帳篷作擋雨遮陰之用，加上有冷風機，晌度都幾涼快嘅。
室外掛上唔同圖案嘅木牌。
都幾有特色。
餐牌係佢哋自行釘裝，但睇得出花咗啲心思。
食物嘅選擇講真唔多，前菜、湯、意粉、扒類等等各平均有三數款，反而飲品同酒精類就非常非常非常豐富。
我哋就叫咗意粉餐同扒餐各一，同埋小食嚟試試。
鍾意飲酒嘅朋友叫咗呢支gwei.lo 鬼佬，係本地手工啤酒，飲落麥味重同較一般啤酒甜。
我就想試cocktail，餐牌只標示大約價錢，卻無列出實際款式，向店員了解有咩選擇，佢就建議由我出題等佢調配，因為我只飲過Mojito，所以就叫呢款。店員話佢哋仲有自家種植某啲香草，又話杯入面啲薄荷葉係新鮮摘嘅，佢仲特意將青檸搗爛拌勻，並加入啡糖等調味。飲一啖，先係試到薄荷清香，再來就係青檸酸香，最後係淡淡酒香。我覺得青檸味比外邊飲到嘅較突出，都幾啱女仔口味。
我哋仲叫咗款名為Ball Ball嘅佐酒小食，係幾個用薄薄炸漿包著碎牛肉、洋蔥、麵包糠同蛋黃混合成嘅小圓球，醬汁估計用類似Tabasco嘅墨西哥辣椒汁調製。
小圓球外層微鹹，中層碎牛肉鬆化，當中仍有較大嘅肉粒，內層夾著芝士，仲可以拉絲。
然後就係兩客套餐包括嘅食物，先係呢盤原味同麥味硬法包，係佢哋自家焗製，質感香脆。
另附上牛油同羅勒醬，羅勒醬由廚師自製，除討好嘅羅勒味外，仲有橄欖油同蒜蓉等嘅蹤影。
空運蔬菜沙律配檸檬橄欖油馬蘇里拉芝士，馬蘇里拉芝士（Mozzarella cheese）、牛油果同番茄一齊食，再配雜菜同檸檬橄欖油，食味輕盈。
君度果凍鴨肉批，上面嘅果凍係用君度橙酒同橙皮製作，中間則由一絲絲鴨肉組成，兩者加埋一齊出奇地夾，配上豆苗、黑醋同硬法包，連平日唔太好鴨肉嘅我都幾鍾意。
經典蜆肉雜燴濃湯（後），入面有蜆肉、洋蔥、煙肉碎、烘麵包粒等等，配料幾豐富，飲落奶味較重。
傳統焗法式洋蔥湯，面層芝士焗至微焦，聽佢哋講係用馬蘇里拉、巴馬臣同另一款可以拉絲嘅芝士混合而成。烹調時仲加埋酒精入高湯度，每口湯除有洋蔥絲外，食味亦頗香甜，中間嘅麵包仲吸滿湯汁，我哋兩個覺得比蜆肉雜燴濃湯出色。
卡邦尼汁煙肉意粉，主要由煙肉、洋蔥、巴馬臣芝士片、忌廉等煮成，食之前先將溫泉蛋刺破拌勻，意粉係偏硬身嗰種質感。發現每間餐廳出品嘅卡邦尼均各有特色，有啲偏乾身、有啲偏濕潤，有啲偏重芝士、有啲食材平衡。如果要替佢歸類，就係較多汁同食材平衡嗰種，但對喜好芝士味濃人士而言，就可能會有啲失望。
美國頂級肋眼牛排，我哋揀咗七成熟，軟腍富肉汁而有炭燒香，肥脂部份都易於咀嚼。旁邊醬汁係用牛骨湯熬煮，仲混入原粒黑椒，幾重口味。底下墊有薯角，另有焗到甜香煙韌嘅原個蒜頭，無咗平日辛口嘅感覺，可就咁食或塗於牛排表面食。
四季花茶，即係玫瑰花、洛神花、茉莉花同菊花，酸味較出，都幾消滯醒神。
